କଳାହାଣ୍ଡି, (ପି.କେ. ସାହୁ) ଭବାନୀପାଟଣା ସ୍ଥିତ ଦେଵାନ୍ ସାହିବ ପଡାରେ ସୋମବାର ସାମ୍ବାଦିକମାନଙ୍କ ବ୍ୟବହାର ପାଇଁ ଜିଲ୍ଲା ସାମ୍ବାଦିକ ଭବନକୁ ଜିଲ୍ଲାପାଳ ଡ.ଗାଭାଲି ପରାଗ ହର୍ଷଦ୍ ତଥା ଜିଲ୍ଲା ପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର କୁମାର ସିଂହଦେଓ ଉଦ୍ଘାଟନ କରିଥିଲେ । ଏହି ଜିଲ୍ଲା ସାମ୍ବାଦିକ ଭବନ ବର୍ତ୍ତମାନ ଏକ ସରକାରୀ କ୍ୱାର୍ଟରକୁ ସାମୟିକ ଭାବେ ବ୍ୟବହାର ପାଇଁ ଜିଲ୍ଲାପାଳ ଅନୁମତି ଦେଇଛନ୍ତି ଓ ରାସ୍ତା ଓ ଗୃହ ନିର୍ମାଣ ବିଭାଗ ଏହି ଭବନର ମରାମତି କାର୍ଯ୍ୟ କରି ହସ୍ତାନ୍ତର କରିଛନ୍ତି । ଉଦ୍ଘାଟନ ସମୟରେ ପୂର୍ତ୍ତ ବିଭାଗର ଅଧିକ୍ଷଣ ଯନ୍ତ୍ରୀ ଅଜିତ ବାବୁ, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ମନୋଜ ବେହେରା, ଯୋଜନା ଓ ସ୍ଵମନ୍ୱୟର ଉପ ନିର୍ଦ୍ଦେଶକ ଶ୍ରୀକାନ୍ତ ଦଳେଇ, ବରିଷ୍ଠ ସାମ୍ବାଦିକ ଉମା ଶଙ୍କର କର, ଶାନ୍ତନୁ ବେହେରାଙ୍କ ସମେତ ପ୍ରିଣ୍ଟ ଓ ଇଲେକ୍ଟ୍ରୋନିକ ମିଡିଆର ଜିଲ୍ଲା ପ୍ରତିନିଧି ଗଣ ଉପସ୍ଥିତ ଥିଲେ । ଉଦ୍ଘାଟନ ପରେ ସ୍ଥାନୀୟ ଡିଡି ପ୍ଲାନିଂ ସମ୍ମିଳନୀ ଗୃହରେ ସାମ୍ବାଦିକମାନଙ୍କ ଦ୍ଵାରା ଏକ ସଭାର ଆୟୋଜନ କରାଯାଇ ଜିଲ୍ଲାପାଳଙ୍କୁ ପୁଷ୍ପଗୁଚ୍ଛ ଓ ମୋମେଣ୍ଟୋ ଦେଇ ବିଦାୟ ସମ୍ବର୍ଦ୍ଧନା ଦିଆଯାଇଥିଲା । ଏହି ଅବସରରେ ବରିଷ୍ଠ ସାମ୍ବାଦିକ ଶାନ୍ତନୁ ବେହେରା ସଭା ପରିଚାଳନା କରିଥିବା ବେଳେ ସାମ୍ବାଦିକ ମନ ପ୍ରଧାନ ଧନ୍ୟବାଦ୍ ଦେଇଥିଲେ । ସାମ୍ବାଦିକ ଗଣ ଜିଲ୍ଲାପାଳଙ୍କ ଦୀର୍ଘ ୪ ବର୍ଷ ଅବସ୍ଥାନରେ ଜିଲ୍ଲାରେ ବିଭିନ୍ନ ନୂତନ ପ୍ରକଳ୍ପର ବିକାଶ, କାୟକଳ୍ପ ପୁରସ୍କାର, ନୀତି ଆୟୋଗର ପୁରସ୍କାର, ଅଗ୍ରଣୀ ଜିଲ୍ଲା ଭାବେ ନାମ ଓ ସର୍ବୋପରି ୧୨୯ ଟି ହାଇସ୍କୁଲ ରୂପାନ୍ତରଣ, କେସିଙ୍ଗାରେ ପୁନର୍ବାସ କଲୋନୀ, ନୂତନ ବସଷ୍ଟାଣ୍ଡର ନିର୍ମାଣ, ଟାଉନ ହଲ, କୋଭିଡ ପରିଚାଳନା ଇତ୍ୟାଦି, ଗମନାଗମନ, ସ୍ୱାସ୍ଥ୍ୟ, ଶିକ୍ଷା, ଆଦିବାସୀ ଅଞ୍ଚଳକୁ ପ୍ରାଧାନ୍ୟ, ଜିଲ୍ଲାପାଳଙ୍କ ଦୂରଦର୍ଶିତା ଓ କାର୍ଯ୍ୟକୁ ଭୂୟସୀ ପ୍ରଶଂସା କରିଥିଲେ । ଜିଲ୍ଲା ପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର ସିଂହଦେଓ ଜିଲ୍ଲାପାଳଙ୍କୁ ପ୍ରଶଂସା କରି ଏଭଳି କର୍ତ୍ତବ୍ୟନିଷ୍ଠ ପ୍ରଶାସନିକ ଅଧିକାରୀଙ୍କ ବଦଳି ମୋ ପାଇଁ ବହୁତ କଷ୍ଟ ଆଣିଛି ବୋଲି କହିଥିଲେ । ସୂଚନାଯୋଗ୍ୟ ଯେ, ଜିଲ୍ଲା ସାମ୍ବାଦିକ ଭବନ ବହୁ ଦିନରୁ ଦାବୀ ହୋଇ ଆସୁଥିଲା ଏବଂ ଜିଲ୍ଲାପାଳଙ୍କ ଜରିଆରେ ସାମ୍ବାଦିକ ମାନଙ୍କ ପାଇଁ ଏହା ଉପହାର ବୋଲି ଉପସ୍ଥିତ ସମସ୍ତ ସାମ୍ବାଦିକ ଆନନ୍ଦ ପ୍ରକାଶ କରିଥିଲେ । ଏହି ସାମ୍ବାଦିକ ଭବନ ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ, କଳାହାଣ୍ଡିଙ୍କ ନିୟନ୍ତ୍ରଣରେ ରହିବା ଓ ଏହା ଜିଲ୍ଲାରେ କାର୍ଯ୍ୟରତ ପଞ୍ଜିକୃତ ସାମ୍ବାଦିକଙ୍କ ପାଇଁ ଉଦ୍ଦିଷ୍ଟ। ସାମ୍ବାଦିକ ବନ୍ଧୁ ଏଠାରେ ପ୍ରେସ ସମ୍ବନ୍ଧୀୟ କାର୍ଯ୍ୟ, ଜିଲ୍ଲାର ବିକାଶ, ଐତିହ୍ୟ, ସଂସ୍କୃତି ପାଇଁ ଆଲୋଚନାଚକ୍ର ଇତ୍ୟାଦି ଗଠନ ମୂଳକ କାର୍ଯ୍ୟ କରିପାରିବେ । କାର୍ଯ୍ୟରତ ପଞ୍ଜିକୃତ ସାମ୍ବାଦିକ ଏହାର ସଦ୍ ବ୍ୟବହାର କରି ଜିଲ୍ଲାର ବିକାଶରେ ସହଯୋଗ କରିବେ । ଭବିଷ୍ୟତରେ ନିଜସ୍ଵ ପ୍ରେସ୍ କ୍ଲବର ନିର୍ମାଣ ଉପରେ ମଧ୍ୟ ଆଲୋଚନା ହୋଇଥିଲା ।
