ତୁଷୁରା, (ଲକ୍ଷ୍ମୀକାନ୍ତ ସାହୁ) : ଗୁଡଭେଲା ବ୍ଲକ୍ ଅନ୍ତର୍ଗତ ତୁଷୁରା ସରକାରୀ ବାଳକ ଉଚ୍ଚ ପ୍ରାଥମିକ ବିଦ୍ୟାଳୟର ଦ୍ୱିତୀୟ ବାର୍ଷିକ ଖେଳକୁଦ ସମାରୋହ ଉଦ୍ଯାପିତ ହୋଇଯାଇଛି । ପ୍ରଧାନ ଶିକ୍ଷକ ହେମନ୍ତ କୁମାର ଦାଶଙ୍କ ଅଧ୍ୟକ୍ଷତାରେ ଉଦ୍ଘାଟନୀ ସଭା ଅନୁଷ୍ଠିତ ହୋଇଥିଲା । ଉକ୍ତ ଖେଳକୁଦ ସମାରୋହକୁ ଗୁଡଭେଲା ବ୍ଲକ୍ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ବିପିନ ବାଗ ଉଦ୍ଘାଟନ କରିଥିଲେ । ଏଥିରେ ବିଶିଷ୍ଟ ଅତିଥିଭାବେ ବିଶିଷ୍ଟ ସମାଜସେବୀ ରାଧାରମଣ କେଡିଆ ଯୋଗଦେଇ ଶିଶୁମାନଙ୍କୁ ଆଶ୍ରୀବଚନ ପ୍ରଦାନ କରିଥିଲେ । ଅପରାହ୍ନରେ ଅନୁଷ୍ଠିତ ଉଦ୍ଯାପନୀ ସମାରୋହରେ ଉପ ସଭାପତି ଜନନୀ ଧରୁଆଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ ମୁଖ୍ୟ ଅତିଥି ଭାବେ ଯୁବ ସମାଜସେବୀ ଗଗନ କେଡିଆ ଯୋଗଦେଇ କୃତୀ ପ୍ରତିଯୋଗୀମାନଙ୍କୁ ମେଡାଲ ଦେଇ ସମ୍ମାନିତ କରିଥିଲେ । ଏଥିରେ ସମ୍ମାନିତ ଅତିଥିଭାବେ ତୁଷୁରା ସରସ୍ଵତୀ ଶିଶୁ ବିଦ୍ୟା ମନ୍ଦିରର ପ୍ରଧାନ ଆଚାର୍ଯ୍ୟ ସୁଶୀଳ କୁମାର ଦାସ ଓ ତୋଷାଳୀ ବିଦ୍ୟା ମନ୍ଦିର ତୁଷୁରାର ପରିଚାଳନା ନିର୍ଦ୍ଦେଶକ ଦେବାଶିଷ ମହାପାତ୍ର ଯୋଗଦେଇଥିଲେ । ପ୍ରଧାନ ଶିକ୍ଷକ ହେମନ୍ତ କୁମାର ଦାଶ ସଭା ସଞ୍ଚାଳନ କରିଥିଲେ ଓ ବରିଷ୍ଠ ଶିକ୍ଷୟିତ୍ରୀ ପ୍ରଶାନ୍ତି ଦାସ ଧନ୍ୟବାଦ ଅର୍ପଣ କରିଥିଲେ । ସହକାରୀ ଶିକ୍ଷୟିତ୍ରୀ ରଞ୍ଜିତା ନାଗ, ବିନ୍ଦୁ ମହାଣା, ଆକାଂକ୍ଷା ରାଣୀ ଯୋଶୀ, ଆଚାର୍ଯ୍ୟା ହେମବନ୍ତୀ ଭାଟି, ଆଚାର୍ଯ୍ୟ ବବଲୁ ସାହୁ ଓ ମାଧବ ବେହେରା ସର୍ବ କନିଷ୍ଠ, କନିଷ୍ଠ ଓ ବରିଷ୍ଠ ବିଭାଗର ବାଳକ,ବାଳିକା ବର୍ଗର ମୋଟ ୩୦ଟି କ୍ରୀଡା ପରିଚାଳନା କରିଥିଲେ । ଅଭିଭାବକମାନଙ୍କ ବସ୍ତାଦୌଡ ଓ ଅଭିଭାବିକାମାନଙ୍କ ମ୍ୟୁଜିକ୍ ଚେୟାର ପ୍ରତିଯୋଗିତା ଖୁବ୍ ଚିତ୍ତାକର୍ଷକ ଥିଲା । ବରିଷ୍ଠ ବିଭାଗର ବାଳକ ବର୍ଗରେ ତପନ ସାହୁ ଓ ବାଳିକା ବର୍ଗରେ ଆଶ୍ରିତା ଦଣ୍ଡସେନା, କନିଷ୍ଠ ବିଭାଗର ବାଳକ ବର୍ଗରେ ଲିକୁନ୍ ମହାଲିଙ୍ଗ ଓ ବାଳିକା ବର୍ଗରେ ଫାଲଗୁନି ନାଗ ଏବଂ ସର୍ବ କନିଷ୍ଠ ବିଭାଗର ବାଳକ ବର୍ଗରେ ଗୌତମ କୁମ୍ଭାର ଓ ବାଳିକା ବର୍ଗରେ ଆଦିତି ବାରିକ ଚାମ୍ପିଅନ ହୋଇଥିଲେ ।