ନୂଆପଡା, (ନିରାକାର ମେହେର) : ନୂଆପଡା ଜିଲ୍ଲା ସିନାପାଲି ଥାନା ଅନ୍ତର୍ଗତ ସିଙ୍ଗଝର ପଂଚାୟତ ସୋନଭରଷା ଗ୍ରାମର ଜଣେ ବିବାହିତ ମହିଳାଙ୍କୁ ସେହି ଗ୍ରାମର ଯୁବକ ବସନ୍ତ ରାଉତ ଦୁଷ୍କର୍ମ କରିଥିବା ନେଇ ଥାନାରେ ଅଭିଯୋଗ ହୋଇଛି । ସୂଚନା କ୍ରମେ ଉକ୍ତ ଗ୍ରାମର ମହିଳା ଜଣକ ସକାଳ ୬ଟା ରେ ଗାଁ ପାଖ ପୋଖରୀରୁ ଗାଧୋଇ ଫେରୁଥିବା ବେଳେ ସେନଭରଷା ଗାଁର ଛୋଟିବୁଢ଼ୀ ମନ୍ଦିର ନିକଟରେ ବସନ୍ତ ତାଙ୍କୁ ଅଟକାଇଥିଲା । ଏକାକୀ ମହିଳା ଜଣଙ୍କୁ ଦେଖିଲା ପରେ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ତାଙ୍କୁ ତଳେ ପକାଇ ଦୁଷ୍କର୍ମ ଉଦ୍ୟମ କରିଥିଲା । ମହିଳା ଜଣକ ଚିତ୍କାର କରିବାରୁ ଉକ୍ତ ଗ୍ରାମର ୨ଜଣ ବ୍ୟକ୍ତି ସେଠାରେ ପହଂଚିଥିଲେ । ତେବେ ସେମାନଙ୍କୁ ଦେଖି ବସନ୍ତ ଫେରାର ମାରିଥିଲା । ପରେ ଦୁଷ୍କର୍ମର ଶିକାର ହୋଇଥିବା ମହିଳା ଜଣକ ଥାନାରେ ଏତଲା ଦେଇଛନ୍ତି । ପୋଲିସ ମାମଲା ରୁଜୁ କରି ତଦନ୍ତ ଚଳାଇଥିବା ଥାନା ଭାରପ୍ରାପ୍ତ ଅଧିକାରୀ ଡମ୍ବରୁଧର ପ୍ରଧାନ ସୂଚନା ଦେଇଛନ୍ତି ।