ଲୋଇସିଂହା, (କେପିଏନ୍ଏସ୍) : ବଲାଙ୍ଗିର-ବରଗଡ଼ ୨୬ ନମ୍ବର ଜାତୀୟ ରାଜପଥ ଲୋଇସିଂହା ବସଷ୍ଟାଣ୍ଡ ନିକଟରେ ଆଜି ଦିନ ପ୍ରାୟ ୨ଟାରେ ଏକ ସ୍କର୍ପିଓ ଗାଡ଼ି (ନଂ-ଓଡ଼ି ୧୪ ଏ ୫୦୫୨) ବଲାଙ୍ଗିର ପଟୁ ଆସୁଥିବା ବେଳେ ଲୋଇସିଂହା ବସଷ୍ଟାଣ୍ଡ ଠାରେ ଏକ ସ୍କୁଟିକୁ ଧକ୍କା ଦେଇଥିଲା । ଫଳରେ ସ୍କୁଟିରେ ବସିଥିବା ସ୍ଥାନୀୟ ପତ୍ରାପାଲିର ରଞ୍ଜନ ପଧାନ, ବ୍ରଜ ପଧାନ ଓ ରମେଶ ମାଝୀ ଗୁରୁତର ଆହତ ହୋଇଥିଲେ । ସୂଚନା ପାଇ ପୋଲିସ ଘଟଣା ସ୍ଥଳରେ ପହଂଚି ଉଭୟ ସ୍କୁଟି ଓ ଗାଡିକୁ ଜବତ କରିବା ସହ ଆହତ ୩ ଜଣଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଥିଲା । ଦୁର୍ଘଟଣା ଘଟିବା ପରେ ସ୍କର୍ପିଓ ଚାଳକ ସମେତ ସେଥିରେ ଥିବା ଅନ୍ୟ ଦୁଇଜଣ ଘଟଣାସ୍ଥଳରୁ ଫେରାର ହୋଇ ଯାଇଥିଲେ । ଫଳରେ ପୋଲିସର ସନ୍ଦେହ ବଢିଥିଲା । ସ୍ଥାନୀୟ ଯୁବକ ଗୋପବନ୍ଧୁ ନାଗଙ୍କ ସହାୟତା କ୍ରମେ ପୋଲିସ ସ୍କର୍ପିଓ ଗାଡ଼ିକୁ ଥାନା ପରିସରକୁ ଆଣିବା ପରେ ଗାଡି ଭିତରେ ପଲିଥିନ ପ୍ୟାକେଟରେ କିଛି ଥିବା ଦେଖିବାକୁ ପାଇଥିଲା । ପ୍ୟାକେଟ ଗୁଡିକରେ ଗଞ୍ଜେଇ ରହିଥିବା ସନ୍ଦେହ କରାଯାଉଛି ବୋଲି ପୋଲିସ ସୂଚନା ଦେଇଥିଲେ ହେଁ ପ୍ରକୃତ ଘଟଣାଟି ସାମ୍ନାକୁ ଆସି ପାରିନାହିଁ । ବୁଧବାର ମାଜିଷ୍ଟ୍ରେଟଙ୍କ ଉପସ୍ଥିତିରେ ସ୍କର୍ପିଓ ଗାଡି ଯାଞ୍ଚ କରାଯିବ ବୋଲି ପୋଲିସ ସୂଚନା ଦେଇଛି ।
