ମ.ରାମପୁର, (ହେମନ୍ତ ସାହୁ) : କଳାହାଣ୍ଡି ଜିଲ୍ଲା ମ.ରାମପୁର ସରସ୍ୱତୀ ଶିଶୁ ବିଦ୍ୟା ମନ୍ଦିର ତଥା ଦୁର୍ଗାମାଧବ ସରକାରୀ ଉଚ୍ଚ ବିଦ୍ୟାପୀଠର ପୂର୍ବତନ ଛାତ୍ର ବିଷ୍ଣୁ ଗୋବିନ୍ଦ ଓଏଏସ୍ ପାଇଛନ୍ତି । ପିତା ଗୋପାଳକୃଷ୍ଣ ବାରିକ ଏବଂ ମାତା ଗୀତାଞ୍ଜଳି ବେହେରାଙ୍କ ପୁତ୍ର ବିଷ୍ଣୁ ମ.ରାମପୁରରେ ରହି ନିଜ ଛାତ୍ର ଜୀବନ ଅତିବାହିତ କରିଥିଲେ । ତାଙ୍କ ବାପା ମ.ରାମପୁର ଭାରତୀୟ ଷ୍ଟେଟ ବ୍ୟାଙ୍କରେ କର୍ମଚାରୀ ଭାବରେ କାର୍ଯ୍ୟରତ ଥିଲେ । ପରବର୍ତ୍ତୀ ସମୟରେ ବିଷ୍ଣୁ ଗୋବିନ୍ଦ ଭୁବନେଶ୍ୱର ବିଜେବି ଜୁନିଅର୍ କଲେଜରେ ଯୁକ୍ତ ଦୁଇ, ଭୁବନେଶ୍ୱର ସିଲିକନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନଲୋଜିରେ ଇଞ୍ଜିନିୟରିଂ ପାଶ୍ କରିବା ପରେ ଇନଫୋସିସ୍ ଏବଂ ଟିସିଏସ୍ରେ ଇଞ୍ଜିନିୟର ଭାବରେ କାର୍ଯ୍ୟ କରୁଥିଲେ । ସେ ୨୦୧୮ ମସିହାରେ ଓସିଏସ୍ରେ ୭୬ ର୍ୟାଙ୍କ୍ ରଖି ପାଶ କରିବା ସହିତ ସହକାରୀ ଜିଏସଟି ଅଫିସର ଭାବରେ କେନ୍ଦ୍ରାପଡ଼ାରେ କାର୍ଯ୍ୟ କରୁଛନ୍ତି । ତେବେ ସେ ପୁଣିଥରେ ଚଳିତ ବର୍ଶ ଓପିଏସସି ପରୀକ୍ଷାରେ ୭୪ ର୍ୟାଙ୍କ୍ ରଖି କୃତକାର୍ଯ୍ୟ ହେଇଛନ୍ତି । ଏଭଳି ଏକ ପରୀକ୍ଷାରେ ଦୁଇ ଥର ସଫଳତାର ସହିତ ପାଶ୍ କରିଥିବାରୁ ନିଜେ ଖୁବ୍ ଖୁସି ଥିବା ସହିତ ଏହି ସଫଳତାର ଶ୍ରେୟ ନିଜର ପିତା, ମାତା, ଗୁରୁଜୀ, ଗୁରୁମା, ଶିକ୍ଷକ, ଶିକ୍ଷୟିତ୍ରୀଙ୍କୁ ପ୍ରଦାନ କରିଛନ୍ତି । ଏହି ଖବର ପ୍ରଚାର ହେବା ପରେ ମ.ରାମପୁରରେ ଖୁସିର ଲହରୀ ଖେଳିଯାଇଛି ।