ଖପ୍ରାଖୋଲ, (କେପିଏନଏସ) : ଖପ୍ରାଖୋଲ ଠାରୁ ଚାରି କିଲୋମିଟର ଦୂର ହରିଶଙ୍କର ଛକ ଚାଉଳବାଞ୍ଜି ରାସ୍ତାରେ ଏକ ବାଇକ ଏବଂ ଅଜଣା ଗାଡ଼ି ମଧ୍ୟରେ ଧକ୍କା ଲାଗିଥିବା ବେଳେ ଅଜଣା ଗାଡିଟି ସେଠାରୁ ଫେରାର ହୋଇଯାଇଛି ।
ବାଇକ ଚାଳକ ଗୁରୁତର ହୋଇପଡିଥିବା ବେଳେ ତାଙ୍କୁ ଉଦ୍ଧାର କରାଯାଇ ଖପ୍ରାଖୋଲ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଖବର ନେବାରୁ ଜଣାପଡିଛି ସ୍ଥାନୀୟ ଜୁନାନୀବାହାଲ ଗ୍ରାମର ଦୁର୍ଯ୍ୟାଧନ ଭୋଇଙ୍କ ପୁତ୍ର ପ୍ରଭାତ ଭୋଇ(୨୨) ସୋମବାର ବାଇକରେ ବଡ ଭଉଣୀଙ୍କୁ ସାଙ୍ଗରେ ଧରି ବଲାଙ୍ଗିର ନିକଟସ୍ଥ ଚାଣ୍ଟିମୁଣ୍ଡା ଗ୍ରାମକୁ ଯାଇଥିଲେ । ସେଠାରେ ଭଉଣୀକୁ ଛାଡି ବାଇକରେ ଏକୁଟିଆ ଫେରୁଥିବା ବେଳେ ଚାଉଳବାଞ୍ଜି ଗ୍ରାମ ପୂର୍ବରୁ ହରିଶଙ୍କର ପଟୁ ଆସୁଥିବା ଏକ ଚାରିଚକିଆ ଗାଡ଼ି ତାଙ୍କୁ ଧକ୍କା ଦେଇଥିଲା । ଗାଡିଟି ଧକ୍କା ଦେଇ ଫେରାର ହୋଇଥିବା ବେଳେ ଅନ୍ଧାର ହୋଇଥିବାରୁ ସ୍ଥାନୀୟ ଅଞ୍ଚଳବାସୀ ଗାଡିଟିକୁ ଚିହ୍ନିତ ପାରିନଥିଲେ । ଦୁର୍ଘଟଣାରେ ବାଇକ ଚାଳକ ପ୍ରଭାତ ଗୁରୁତର ହୋଇପଡି ରାସ୍ତା ଉପରେ ପଡିରହିଥିଲେ । ତାଙ୍କର କାନ୍ଧ ଭାଙ୍ଗି ଯିବା ସହିତ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଛି । ଖବର ପାଇ ତାଙ୍କ ପରିବାର ଲୋକ ଅଞ୍ଚଳବାସୀଙ୍କ ସହଯୋଗରେ ଖପ୍ରାଖୋଲ ଡାକ୍ତରଖାନାକୁ ଚିକିତ୍ସା ପାଇଁ ଆଣିଥିଲେ । ତାଙ୍କର ଅବସ୍ଥା ଗୁରୁତର ହେବାରୁ ତାଙ୍କୁ ପାଟଣାଗଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଖବର ଲେଖା ହେବା ପର୍ଯ୍ୟନ୍ତ ଏନେଇ କୌଣସି ଅଭିଯୋଗ ଖପ୍ରାଖୋଲ ଥାନାରେ ହୋଇନଥିବା ଜଣାପଡିଛି । ସେହିପରି ନିକଟସ୍ଥ କପସିପାଲି ଗ୍ରାମ ମୁଖ୍ୟ ରାସ୍ତାରେ ଗୋଟିଏ ବାଇକ ଦୁର୍ଘଟଣା ଗ୍ରସ୍ତ ହୋଇଥିବା ଜାଣିବାକୁ ମିଳିଛି ଏଥିରେ ବାଇକ ଚାଳକ ଏବଂ ସାଙ୍ଗରେ ବସିଥିବା ଆରୋହୀ ଜଣକ ଭାରସାମ୍ୟ ହରାଇ ବାଇକରୁ ଖସିପଡିଥିଲେ । ଦୁର୍ଘଟଣାରେ ଉଭୟ ଆହତ ହୋଇଥିଲେ ଖବର ପାଇ ଖପ୍ରାଖୋଲ ଅଗ୍ନିଶମ ବିଭାଗ ଉଭୟଙ୍କୁ ଖପ୍ରାଖୋଲ ଡାକ୍ତରଖାନାକୁ ଆଣି ଚିକିତ୍ସା କରାଇଥିଲେ