କଣ୍ଟାବାଞ୍ଜି, (କେପିଏନ୍ଏସ୍) : ଛତିଶଗଡ଼ ସରକାରଙ୍କ ଦିବ୍ୟାଙ୍ଗଜନ ଅର୍ଥ ଓ ବିକାଶ ନିଗମର ଅଧ୍ୟକ୍ଷ ତଥା ରାଜ୍ୟମନ୍ତ୍ରୀ ପାହ୍ୟାପ୍ରାପ୍ତ ଲୋକେଶ କାୱଡିଆଙ୍କ କଣ୍ଟାବାଞ୍ଜି ଗସ୍ତ ସମ୍ପନ୍ନ ହୋଇଛି । ଏହି ଅବସରରେ କଣ୍ଟାବାଞ୍ଜି ପ୍ରେସ୍ କ୍ଲବ୍ ପକ୍ଷରୁ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା । ତାଙ୍କ ସହ ଛତିଶଗଡ଼ ଦିବ୍ୟାଙ୍ଗଜନ ଅର୍ଥ ଓ ବିକାଶ ନିଗମର ପ୍ରବନ୍ଧ ନିର୍ଦ୍ଦେଶକ ପଙ୍କଜ ବର୍ମାଙ୍କ ସମେତ ବିଜେପି ଅଳ୍ପସଂଖ୍ୟକ ମୋର୍ଚ୍ଚାର ସେବା ସଂକଳ୍ପ ଅଭିଯାନର ସହ-ସଂଯୋଜକ ତଥା ଉତ୍ତରାଖଣ୍ଡ, ଝାଡ଼ଖଣ୍ଡ ଓ ପଶ୍ଚିମବଙ୍ଗ ପ୍ରଭାରୀ ରାକେଶ ଜୈନ ଉପସ୍ଥିତ ଥିଲେ । ଏହି ଅବସରରେ ସ୍ଥାନୀୟ ପ୍ରେସ୍ କ୍ଲବ୍ କାର୍ଯ୍ୟାଳୟରେ ଏକ ସଭା ଆୟୋଜିତ ହୋଇଥିଲା । ସଭାରେ ପ୍ରେସ୍ କ୍ଲବ୍ କଣ୍ଟାବାଞ୍ଜିର ସଭାପତି ପ୍ରଭଜିତ ସିଂହ ସଲୁଜା ଅଧ୍ୟକ୍ଷତା କରିଥିଲେ । ସଭାରେ ଲୋକେଶ କାୱଡିଆ ଦିବ୍ୟାଙ୍ଗମାନଙ୍କୁ ଆତ୍ମନିର୍ଭରଶୀଳ କରିବା ଦିଗରେ ତାଙ୍କର ଲକ୍ଷ୍ୟ ଓ ଯୋଜନା ସମ୍ପର୍କରେ ବିସ୍ତୃତ ଭାବେ ଉପସ୍ଥାପନ କରିଥିଲେ । ସେ କହିଥିଲେ ଯେ, ଛତିଶଗଡ଼ ସରକାର ଓ ତାଙ୍କ ନିଗମ ପକ୍ଷରୁ ଏଭଳି ପ୍ରୟାସ କରାଯାଉଛି, ଯାହାଦ୍ୱାରା କୌଣସି ଦିବ୍ୟାଙ୍ଗ ବ୍ୟକ୍ତି ଅନ୍ୟ କାହା ଉପରେ ନିର୍ଭରଶୀଳ ନ ହୋଇ ଆତ୍ମନିର୍ଭର ହୋଇ ସମ୍ମାନର ସହିତ ଖୁସିରେ ଜୀବନଯାପନ କରିପାରିବେ । ଏହି ସମୟରେ ଦିବ୍ୟାଙ୍ଗମାନଙ୍କ ଦ୍ୱାରା ପ୍ରସ୍ତୁତ ବିଭିନ୍ନ ସାମଗ୍ରୀ ପ୍ରଦର୍ଶିତ କରାଯାଇଥିଲା ଏବଂ ସେଗୁଡ଼ିକ ସମ୍ପର୍କରେ ସମ୍ପୂର୍ଣ୍ଣ ସୂଚନା ଦିଆଯାଇଥିଲା । ଦିବ୍ୟାଙ୍ଗମାନଙ୍କ ପାଇଁ ଉପଲବ୍ଧ ବିଭିନ୍ନ ଆତ୍ମନିର୍ଭର ଯୋଜନା, ସରକାରୀ ଋଣ ସୁବିଧା, ଆର୍ଥିକ ପ୍ୟାକେଜ୍ ଏବଂ ତାଲିମ ପ୍ରଦାନ ପାଇଁ ଚାଲିଥିବା ବିଭିନ୍ନ ପ୍ରକଳ୍ପ ସମ୍ପର୍କରେ ମଧ୍ୟ ଆଲୋଚନା କରାଯାଇଥିଲା । ଏହି ଅବସରରେ ପ୍ରେସ୍ କ୍ଲବ୍ କଣ୍ଟାବାଞ୍ଜିର ସଚିବ ସୁରଦାସ ବାଗ, କୋଷାଧ୍ୟକ୍ଷ ହନି ସିଂହ, ଉପସଭାପତି ମନୋଜ ଶର୍ମା, ସହ-ସଚିବ ବିଶିକେଶନ ମାଝୀ, ପରାମର୍ଶଦାତା ଆଶିଷ ଖେତାନ, ସଦସ୍ୟ ଶୈଳୁ ଜୈନ, ତେରାପନ୍ଥ ଯୁବକ ପରିଷଦର ପୂର୍ବତନ ସଭାପତି ମନୀଷ ଜୈନ, ସାମ୍ବାଦିକ ସଂଘର ସଭାପତି ମୋହନ ସୋନି, ସାମ୍ବାଦିକ ପ୍ରମୋଦ ବେହେରାଙ୍କ ସମେତ ବହୁ ସଂଖ୍ୟକ ଜନସାଧାରଣ ଉପସ୍ଥିତ ଥିଲେ । କାର୍ଯ୍ୟକ୍ରମ ସମୟରେ ସ୍ଥାନୀୟ ପୁଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା ।