ଲୋଇସିଂହା, (କେପିଏନ୍ଏସ୍) : ଲୋଇସିଂହା ଅଞ୍ଚଳର ଅଗ୍ରଣୀ ଅନୁଷ୍ଠାନ ମାଁ କୁଶଙ୍ଗାଇ କଳା ପରିଷଦର ବାର୍ଷିକ ଉତ୍ସବ ସକାଶେ ପ୍ରସ୍ତୁତି ବୈଠକ କୁଶମେଲ ଗ୍ରାମର ରାମଜୀ ମନ୍ଦିର ପ୍ରାଙ୍ଗଣରେ ଅନୁଷ୍ଠିତ ହୋଇଯାଇଛି । ବରିଷ୍ଠ କଳାକାର କାଶିନାଥ ସିଂଙ୍କ ଅଧ୍ୟକ୍ଷତାରେ ହୋଇଥିବା ଏହି ବୈଠକରେ ଅନେକ ଲୋକ କଳା ଦଳର ସଭ୍ୟସଭ୍ୟା ଯୋଗଦେଇ ଚଳିତ ବର୍ଷ ବାର୍ଷିକ ଉତ୍ସବକୁ କିପରି ଆହୁରି ଜାକଜମକରେ କରାଯାଇପାରିବ । ସେ ନେଇ ମତାମତ ଉପସ୍ଥାପନ କରିଥିଲେ । ଏଥି ସହିତ ଅଞ୍ଚଳରେ ହଜି ଯାଉଥିବା ପୁରାତନ ଲୋକ କଳାର ପୁନରୁଦ୍ଧାର ସାଙ୍ଗକୁ ବରିଷ୍ଠ କଳାକାରମାନଙ୍କୁ କଳାକାର ଭତ୍ତା ପ୍ରଦାନ ଦିଗରେ ସଚେତନ କରିବା ନେଇ ବୈଠକରେ ଆଲୋଚନା କରାଯାଇଥିଲା । ଆବାହକ ଲମ୍ବୋଦର ସାହୁ ସମସ୍ତ କଳାକାର ଏକଜୁଟ ହୋଇ କଳାକାରମାନଙ୍କ ବିଭିନ୍ନ ସମସ୍ୟାର ସମାଧାନ ଦିଗରେ ସଂସ୍କୃତି ବିଭାଗ ତଥା ସରକାରଙ୍କ ଦୃଷ୍ଟିକୁ ଆଣିବାକୁ ପରାମର୍ଶ ଦେଇଥିଲେ । ପରିଶେଷରେ ବରିଷ୍ଠ କଳାକାର ମଧୁ ମାଝୀ ଧନ୍ୟବାଦ ଅର୍ପଣ କରିଥିଲେ ।