ବାଙ୍କୀ : ହରିରାଜପୁର ଗ୍ରାମ ପଞ୍ଚାୟତର ନୂଆସାହି ତ୍ରିନାଥ ମଣ୍ଡପ କୋଠା ଘରେ ମୃତଦେହ ଉଦ୍ଧାର । ମୃତ ଯୁବକ ଜଣକ ଶୀତଳ ସାହୁ । ସୂଚନା ଅନୁସାରେ, ଗାଁରେ ଥିବା ପୂଜା ଘରେ ସବୁଦିନ ରହିଥାନ୍ତି ଶୀତଳ । ଗାଁ ସ୍ତ୍ରୀ ଲୋକ ପୂଜା ପାଇଁ କବାଟ ବାଡେଇଲେ କବାଟ ଖୋଲନ୍ତି । ସବୁଦିନ ଭଲି ଗୁରୁବାର ରାତିରେ ବି ଶୀତଳ ଶୋଇଥିଲେ ସେହି ଘରେ । ସକାଳୁ ସକାଳୁ ସ୍ତ୍ରୀ ଲୋକମାନେ ପୂଜା କରିବାକୁ କବାଟ ବାଡେଇଥିଲେ । ହେଲେ ଦୀର୍ଘ ସମୟ କବାଟ ନଖୋଲିବାରୁ ସେମାନଙ୍କୁ ସନ୍ଦେହ ହୋଇଥିଲା । କବାଟକୁ ଭାଙ୍ଗିବାକୁ ଚେଷ୍ଟା କରିବାରୁ ଖୋଲିଯାଇଥିଲା । ପରେ ସେଠାରେ ଶୀତଳଙ୍କ ରକ୍ତ ଜୁଡୁବୁଡୁ ମୃତଦେହ ପଡିଥିଲା । ଏହା ଜାଣିବା ପରେ ଲୋକେ ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିଲା । ତେବେ ଘରର କବାଟରେ ରକ୍ତ ଛିଟା ଲାଗିଥିବା ବେଳେ ଭିତର ପଟୁ କବାଟ ବନ୍ଦ ରହିଛି, କୋଠ ଘରଠାରୁ ଶହେ ମିଟର ଦୁରରେ ଚପଲ, ମୋବାଇଲ ଓ ଧାରୁଆ ଅସ୍ତ୍ର, ଖଣ୍ଡା ପଡ଼ିଛି । ପଥର ଓ ଇଟାରେ ରକ୍ତ ଛିଟା ଲାଗିଛି ତେଣୁ କେହି ଖଣ୍ଡାରେ ଆକ୍ରମଣ କରି ପଥରରେ ଛେଚି ହତ୍ୟା କାଣ୍ଡ ଘଟାଇ ଥାଇପାରେ ବୋଲି ସନ୍ଦେହ କରାଯାଉଛି । ଘଟଣା ସ୍ଥଳରେ ବାଙ୍କୀ ଏସଡିପିଓ ଓ ଥାନା ଆଇଆଇସି ପହଞ୍ଚି ତଦନ୍ତ ଜାରି କରିଛି ।