ପୋର୍ଟବ୍ଲେୟାର ବୀର ସଭରକର ଆନ୍ତର୍ଜାତିକ ବିମାନବନ୍ଦରର ନୂତନ ସମନ୍ୱିତ ଭବନ ପ୍ରଧାନମନ୍ତ୍ରୀଙ୍କ ଦ୍ୱାରା ଉଦଘାଟିତ
- ପୋର୍ଟବ୍ଲେୟାର ନୂତନ ରହଣିସ୍ଥଳ ଭବନ ଯାତ୍ରା ସୁବିଧା ଏବଂ ବ୍ୟବସାୟ ଓ ସଂଯୋଗୀକରଣକୁ ସୁଗମ କରିବ
- ଅନ୍ତର୍ଭୁକ୍ତୀକରଣର ଏକ ନୂତନ ମଡେଲ ଭାରତକୁ ଆସିଛି । ଏହି ମଡେଲ ହେଉଛି ‘ସବକା ସାଥ ସବକା ବିକାଶ
- ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜର ବିକାଶ ଦେଶର ଯୁବଶକ୍ତି ନିମନ୍ତେ ଏକ ପ୍ରେରଣାର ଉତ୍ସ ହୋଇଛି
- ବିକାଶ ସମସ୍ତ ପ୍ରକାର ସମାଧାନ ଆଣି ଆସିଥାଏ
- ତଟବର୍ତ୍ତୀ ଛୋଟ ଛୋଟ ଦେଶ ଓ ଦ୍ୱୀପର ଅନେକ ଉଦାହରଣମାନ ରହିଛି ଯେଉଁମାନେ ଆଜି ବିଶ୍ୱରେ ଅଭୁତପୂର୍ବ ପ୍ରଗତି କରିଛନ୍ତି
ନୂଆଦିଲ୍ଲି,( ପିଆଇବି) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଆଭାସୀ ମାଧ୍ୟମରେ ପୋର୍ଟବ୍ଲେୟାର ଠାରେ ବୀର ସଭରକର ଆନ୍ତର୍ଜାତିକ ବିମାନବନ୍ଦରର ନୂତନ ସମନ୍ୱିତ ରହଣି ସ୍ଥଳ ଭବନର ଉଦ୍ଘାଟନ କରିଛନ୍ତି । ୭୧୦ କୋଟି ଟଙ୍କା ବ୍ୟୟରେ ନିର୍ମିତ ଏହି ନୂତନ ରହଣି ସ୍ଥଳ ଭବନର ବାର୍ଷିକ ୫୦ ଲକ୍ଷ ଯାତ୍ରୀ ପରିବହନ କ୍ଷମତା ରହିଛି । ସମବେତ ଜନତାଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଆଜି ଯଦିଓ କାର୍ଯ୍ୟକ୍ରମ ପୋର୍ଟପ୍ଲେୟାରରେ ହେଉଛି, ତଥାପି ସମଗ୍ର ଦେଶ ବୀର ସଭରକର ଆନ୍ତର୍ଜାତିକ ବିମାନବନ୍ଦରର ଯାତ୍ରୀ ପରିବହନ ସାମର୍ଥ୍ୟ ବୃଦ୍ଧି ଘଟଣାକୁ ଖୁବ୍ ଉତ୍ସୁକତାର ସହ ଦେଖୁଛି ଯାହା ଆଜି ସଫଳ ହୋଇଛି । ପ୍ରଧାନମନ୍ତ୍ରୀ ମଧ୍ୟ ଏହି ଅବସରରେ ସ୍ୱୟଂ ଉପସ୍ଥିତ ରହିବାର ଇଚ୍ଛା ପ୍ରକଟ କରିଥିଲେ । ସେ ଏହି ସୁଖଦ ମୁହୂର୍ତ୍ତର ଅଭିଜ୍ଞତା ଅର୍ଜନ କରିବା ସହ ନାଗରିକମାନଙ୍କ ଖୁସୀର ମୁହଁ ଦେଖିଥାନ୍ତେ ବୋଲି କହିଥିଲେ । “ଆଣ୍ଡାମାନ ପରିଦର୍ଶନରେ ଆସିବାକୁ ଉତ୍ସୁକ ବ୍ୟକ୍ତିମାନେ ମଧ୍ୟ ଏକ ଅଧିକ ସାମର୍ଥ୍ୟଯୁକ୍ତ ବିମାନବନ୍ଦର ପାଇଁ ଦାବି କରୁଥିଲେ” ବୋଲି ସେ କହିଥିଲେ ।
ପୋର୍ଟବ୍ଲେୟାରରେ ବିମାନବନ୍ଦର ସମ୍ପ୍ରସାରଣ ସୁବିଧା ନେଇ ପ୍ରଧାନମନ୍ତ୍ରୀ ଆହୁରି କହିଥିଲେ ଯେ ବର୍ତ୍ତମାନ ପର୍ୟ୍ୟନ୍ତ ଟର୍ମିନାଲର ସାମର୍ଥ୍ୟ ୪୦୦୦ ପର୍ଯ୍ୟଟକ ପରିବହନ ଥିବାବେଳେ ନୂତନ ଟର୍ମିନାଲରେ ୧୧ ହଜାର ପର୍ଯ୍ୟନ୍ତ ପର୍ଯ୍ୟଟନ ପରିବହନ ହେବା ସହ ଯେକୌଣି ସମୟରେ ଦଶଟି ପର୍ଯ୍ୟନ୍ତ ବିମାନ ରହଣି ସୁବିଧା ହେବ । ଅଧିକ ବିମାନ ଓ ପର୍ଯ୍ରଟନ ଆଗମନ ଯୋଗୁ ଏହି ଅଞ୍ଚଳରେ ଅଧିକ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି ହେବ । ପୋର୍ଟବ୍ଲେୟାରର ନୂତନ ଟର୍ମିନାଲ ଭବନ ଭ୍ରମଣ, ବ୍ୟବସାୟ ଓ ସଂଯୋଗର ସୁଗମତା ବୃଦ୍ଧି କରିବ ବୋଲି ସେ କହିଥିଲେ ।
ଭାରତରେ ଦୀର୍ଘଦିନ ଧରି ବଡ଼ ବଡ଼ ନଗରୀ ଗୁଡ଼ିକରେ ବିକାଶର ପରିସର ସୀମିତ ଥିଲା ବୋଲି କହିବା ସହ ଆଦିବାସୀ ଓ ଦ୍ୱୀପାଞ୍ଚଳ ଗୁଡ଼ିକର ବିକାଶ କିପରି ଦୀର୍ଘଦିନ ଧରି ବାଧିତ ଥିଲା ତା’ ଉପରେ ଆଲୋକପାତ କରିଥିଲେ । ଗତ ୯ ବର୍ଷ ମଧ୍ୟରେ ବର୍ତ୍ତମାନର ସରକାର ପୂର୍ବତନ ସରକାରଙ୍କ କେବଳ ତ୍ରୁଟି ବିଚ୍ୟୁତିର ସଂଶୋଧନ କରିନାହାନ୍ତି ବରଂ ଅତ୍ୟନ୍ତ ସମ୍ବେଦନଶୀଳ ହୋଇ ନୂତନ ପଦ୍ଧତି ମଧ୍ୟ ଆପଣାଇଛନ୍ତି । ବିକାଶର ଅନ୍ତର୍ଭୁକ୍ତୀକରଣ ପାଇଁ ଏକ ମଡେଲ ମଧ୍ୟ ବିକଶିତ ହୋଇଛି ଓ ତାହା ହେଲା ‘ସବକା ସାଥ, ସବକା ବିକାଶ’ ବୋଲି ପ୍ରଧାନମନ୍ତ୍ରୀ କହିଥିଲେ । ସେ ବୁଝାଇ କହିଥିଲେ ଯେ ଏହି ବିକାଶ ମଡେଲ ହେଉଛି ଖୁବ୍ ବ୍ୟାପକ । ଏଥିରେ ପ୍ରତ୍ୟେକ ଅଞ୍ଚଳ, ସମାଜର ପ୍ରତ୍ୟେକ ବର୍ଗ, ଶିକ୍ଷା, ସ୍ୱାସ୍ଥ୍ୟ ଓ ସଂଯୋଗୀକରଣ ଭଳି ଜୀବନର ସମସ୍ତ କ୍ଷେତ୍ର ରହିଛି ।
ପ୍ରଧାନମନ୍ତ୍ରୀ କହିଥିଲେ ଯେ ଗତ ନଅ ବର୍ଷ ମଧ୍ୟରେ ଆଣ୍ଡାମାନରେ ବିକାଶର ନୂତନ କାହାଣୀ ଲେଖାହୋଇଛି । ଏଇ ନଅ ବର୍ଷ ପୂର୍ବ ସରକାରଗଣ ଆଣ୍ଡାମାନ ଓ ନିକୋବରକୁ ବଜେଟରେ ୨୩ ହଜାର କୋଟି ଟଙ୍କା ଦେଇଥିବା ବେଳେ, ବର୍ତ୍ତମାନର ସରକାର ଗତ ନଅ ବର୍ଷ ମଧ୍ୟରେ ୪୮ ହଜାର କୋଟି ଟଙ୍କା ବଜେଟ୍ ମାଧ୍ୟମରେ ପ୍ରଦାନ କରିଛନ୍ତି । ନଅ ବର୍ଷ ପୂର୍ବେ ସରକାରଙ୍କ ଅମଳରେ ୨୮ ହଜାର ଘରକୁ ପାଇପ ଜଳ ଯୋଗାଯାଇଥିବା ବେଳେ ବର୍ତ୍ତମାନର ସରକାର ଗତ ନଅ ବର୍ଷରେ ୫୦ ହଜାର ଘରକୁ ଏହା ଯୋଗାଇ ଦେଇଛନ୍ତି । ଆଜି ଆଣ୍ଡାମାନ ଓ ନିକୋବରରେ ସମସ୍ତଙ୍କ ପାଖରେ ବ୍ୟାଙ୍କ ଖାତା ଥିବାବେଳେ ଗୋଟିଏ ଦେଶ ଗୋଟିଏ ରାସନକାର୍ଡ ସୁବିଧା ରହିଛି । ବର୍ତ୍ତମାନର ସରକାର ପୋର୍ଟବ୍ଲେୟାରରେ ଗୋଟିଏ ଭେଷଜ ମହାବିଦ୍ୟାଳୟ ଖୋଲିଥିବା ବେଳେ ପୂର୍ବରୁ ସମଗ୍ର କେନ୍ଦ୍ରଶାସିତ ଅଞ୍ଚଳରେ ଏହା ନ ଥିଲା । ପୂର୍ବରୁ ଇଣ୍ଟରନେଟ୍ କେବଳ ଉପଗ୍ରହ ଉପରେ ନିର୍ଭରଶୀଳ ଥିବାବେଳେ, ବର୍ତ୍ତମାନର ସରକାର ଶହ ଶହ କିଲୋମିଟର ସମୁଦ୍ର ଭିତରେ ଅପ୍ଟିକାଲ ଫାଇବର ବିଛାଇବା ପାଇଁ ପଦକ୍ଷେପ ନେଇଛନ୍ତି ।
“ବିକାଶ ଓ ଐତିହ୍ୟ ଏକାଠି ଯାତ୍ରା କରୁଥିବା ଆଣ୍ଡାମାନ ବର୍ତ୍ତମାନ ବିକାଶର ଏକ ମହାମନ୍ତ୍ରର ଉଦାହରଣ ପାଲଟିଛି” ବୋଲି ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଯଦିଓ ଲାଲକିଲ୍ଲାରେ ତ୍ରିରଙ୍ଗା ଉଡ଼ିବାର ବହୁ ପୂର୍ବରୁ ଆଣ୍ଡାମାନରେ ତ୍ରିରଙ୍ଗା ପତାକା ଉତ୍ତୋଳନ ହୋଇଥିଲା ତଥାପି ଯେକୌଣସି ବ୍ୟକ୍ତି ଦ୍ୱୀପରେ କେବଳ ଦାସତ୍ୱର ଛାପ ଦେଖିବାକୁ ପାଇବ । ନେତାଜୀ ସୁବାଷ ଚନ୍ଦ୍ର ବୋଷ ଯେଉଁ ସ୍ଥାନରେ ତ୍ରିରଙ୍ଗା ଉତ୍ତୋଳନ କରିଥିଲେ ଠିକ୍ ସେହି ସ୍ଥାନରୁ ପତାକା ଉତ୍ତୋଳନ କରିବାର ସୁଯୋଗ ପାଇଥିବା ଶ୍ରୀ ମୋଦୀ ସେଥିପାଇଁ କୃତଜ୍ଞତା ଜଣାଇଥିଲେ। ବର୍ତ୍ତମାନର ସରକାର ରସ୍ ଦ୍ୱୀପକୁ ନେତାଜୀ ସୁବାଷ ଚନ୍ଦ୍ର ବୋଷଙ୍କ ନାମରେ ନାମିତ କରିଥିଲେ । ଆବଲକ, ସ୍ୱରାଜ ଓ ନୀଲ ଦ୍ୱୀପକୁ ଶହୀଦ ଦୀପର ନାଁ ଦେଇଥିଲେ । ୨୧ଟି ଦ୍ୱୀପର ନାମକରଣ ପରମବୀର ଚକ୍ର ସମ୍ମାନ ବିଜେତାଙ୍କ ନାମରେ ନାମିତ ହୋଇଥିବା ମଧ୍ୟ ସେ ପ୍ରକାଶ କରିଥିଲେ । “ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜର ବିକାଶ ଦେଶର ଯୁବଗୋଷ୍ଠୀ ନିମନ୍ତେ ପ୍ରେରଣାର ସ୍ରୋତ” ବୋଲି ସେ କହିଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ ଗତ ୭୫ ବର୍ଷ ମଧ୍ୟରେ ଭାରତ ନିଶ୍ଚିତ ଭାବେ ନୂତନ ଶିଖର ଛୁଇଁ ପାରିଥାନ୍ତା କାରଣ ଭାରତୀୟମାନଙ୍କ ସାମର୍ଥ୍ୟ ଉପରେ କାହାର ସଂଦେହ ନାହିଁ । ମାତ୍ର ଦୁର୍ନୀତି ଓ ବଂଶଗତ ରାଜନୀତି ସବୁବେଳେ ସାଧାରଣ ନାଗରିକଙ୍କ ଶକ୍ତି ପ୍ରତି ଅନ୍ୟାୟ କଲା । କେତେକ ଦଳର ସୁବିଧାବାଦୀ ରାଜନୀତି ଉପରେ ମଧ୍ୟ ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ସେ ମଧ୍ୟ ଜାତିବାଦ ଓ ଦୁର୍ନୀତି ରାଜନୀତିର ସମାଲୋଚନା କରିଥିଲେ । ଦୁର୍ନୀତିର ବାହୁଛାୟା ତଳେ ଥିବା ଓ କେତେକ କ୍ଷେତ୍ରରେ ଜାମିନରେ ଆସିଥିବା ଅଭିଯୁକ୍ତ ହୋଇଥିବା ବ୍ୟକ୍ତିଙ୍କୁ ରାଜନୀତିରେ ଗ୍ରହଣକୁ ମଧ୍ୟ ସେ ସମାଲୋଚନା କରିଥିଲେ । ସେ ସମ୍ବିଧାନକୁ ପଣବନ୍ଦୀ ଭଳି ରଖିବାର ମାନସିକତାକୁ ମଧ୍ୟ ନିନ୍ଦା କରିଥିଲେ । ସେଭଳି ବ୍ୟକ୍ତିମାନେ କେବଳ ସ୍ୱାର୍ଥପର ପାରିବାରିକ ଲାଭ ଉପରେ ନଜର ରଖିଥାନ୍ତି, ସାଧାରଣ ନାଗରିକମାନଙ୍କ ବିକାଶ ପ୍ରତି ନୁହେଁ, ପ୍ରତିରକ୍ଷା ଓ ଷ୍ଟାର୍ଟଅପ କ୍ଷେତ୍ରରେ ଭାରତୀୟ ଯୁବପିଢ଼ି ଶକ୍ତିର ପ୍ରଶଂସା କରିବା ସହ ଯୁବଶକ୍ତିର ଏହି ଦିଗ ପ୍ରତି ନ୍ୟାୟ ହୋଇ ନ ଥିବାରୁ ସେ ଏହାର ସମାଲୋଚନା କରିଥିଲେ ।
ଦେଶର ବିକାଶ ପାଇଁ ନିଜକୁ ଉତ୍ସର୍ଗ କରିବା ଉପରେ ଗୁରୁତ୍ୱ ଆରୋପ କରି ପ୍ରଧାନମନ୍ତ୍ରୀ ତାଙ୍କ ଅଭିଭାଷଣ ଶେଷ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଆଜି ବିଶ୍ୱରେ ଅନେକ ତଟବର୍ତ୍ତୀ ଦେଶ ଓ ଦ୍ୱୀପର ଉଦାହରଣ ରହିଛି ଯେଉଁମାନେ ଅସ୍ୱାଭାବିକ ପ୍ରଗତି ହାସଲ କରିଛନ୍ତି । ପ୍ରଗତିର ପଥରେ ଅନେକ ଆହ୍ୱାନ ରହିଥିଲେ ମଧ୍ୟ ଯେତେବେଳେ ବିକାଶ ହୁଏ, ତାହା ସବୁର ସମାଧାନ କରିଥାଏ । ଆଣ୍ଡାମାନ ଓ ନିକୋବର ଦ୍ୱୀପରେ ହେଉଥିବା ବିକାଶମୂଳକ କାର୍ୟ୍ୟ ସମଗ୍ର ଅଞ୍ଚଳର ଆହୁରି ଶକ୍ତି ବୃଦ୍ଧି କରିବ ।
ପୃଷ୍ଠଭୂମି-
ସଂଯୋଗୀକରଣ ଭିତ୍ତିଭୂମି ବୃଦ୍ଧି ସରକାରଙ୍କ ଏକ ମୁଖ୍ୟ କାର୍ଯ୍ୟ ହୋଇଛି । ୭୧୦ କୋଟି ଟଙ୍କା ବ୍ୟୟରେ ନିର୍ମିତ ନୂତନ ସମନ୍ୱିତ ଟର୍ମିନାଲ କେନ୍ଦ୍ରଶାସିତ ଅଞ୍ଚଳର ଏହି ଦ୍ୱୀପକୁ ସଂଯୋଗୀକରଣ ବୃଦ୍ଧି କରିବ । ୪୮,୦୦୦ ବର୍ଗ କିଲୋମିଟର ପରିମିତ ଅଞ୍ଚଳରେ ନିର୍ମିତ ଏହି ଟର୍ମିନାଲ ବାର୍ଷିକ ପ୍ରାୟ ୫୦ ଲକ୍ଷ ଯାତ୍ରୀ ପରିବହନ କରିପାରିବ । ୮୦ କୋଟି ଟଙ୍କାରେ ପୋର୍ଟବ୍ଲେୟାର ବିମାନ ବନ୍ଦରରେ ଦୁଇଟି ବୋଇଂ ଓ ଦୁଇଟି ଏୟାର ବସ୍ ନିମନ୍ତେ ଏକ ଅପ୍ରୋନ ତିଆରି ହୋଇଛି ଯାହାଫଳରେ ସେଠାରେ ଦଶଟି ଏୟାରକ୍ରାଫ୍ଟ ପାର୍କିଂ କରିପାରିବେ ।
ସମୁଦ୍ର ଓ ଦ୍ୱୀପର ଚିତ୍ରଣ କରି ବିମାନବନ୍ଦର ଟର୍ମିନାଲ ଗୋଟିଏ ଶାମୁକାର ପରିପାଟୀ ଭଳି ହୋଇଛି । ଏହି ନୂତନ ବିମାନବନ୍ଦର ଟର୍ମିନାଲରେ ଗରମ କମାଇବା ପାଇଁ ଡବଲ ଇନସୁଲେଟେଡ ରୁଫିଂ ସିଷ୍ଟମ, କୃତ୍ରିମ ଆଲୋକ ହ୍ରାସ କରି ପର୍ଯ୍ୟାପ୍ତ ସୂର୍ଯକିରଣ ଉପଯୋଗ ଏଲଇଡି ବ୍ୟବସ୍ଥା ଇତ୍ୟାଦି ରହିଛି ।
ବର୍ଷାଜଳ ସଂରକ୍ଷଣ ନିମନ୍ତେ ଉନ୍ନତ ଟ୍ୟାଙ୍କ, ବର୍ଜ୍ୟ ଜଳର ଶତପ୍ରତିଶତ ଉପଯୋଗ ବ୍ୟବସ୍ଥା, ୫୦୦ କିଲୋୱାଟ ସୌର ଶକ୍ତି ପ୍ଲାଣ୍ଟ ଓ ଅନ୍ୟାନ୍ୟ ବୈଶିଷ୍ଟ୍ୟ ଏହି ଟର୍ମିନାଲର ପ୍ରମୁଖ ଆକର୍ଷଣ ହୋଇଥିବା ବେଳେ ଯେପରି ଦ୍ୱୀପର ପରିବେଶ ଉପରେ ପ୍ରତିକୂଳ ପ୍ରଭାବ ନ ପଡ଼ିବ ତା’ ଉପରେ ଯଥେଷ୍ଟ ଧ୍ୟାନ ଦିଆଯାଇଛି ।
ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜର ମୌଳିକ ଓ ଅକ୍ଷୁଣ୍ଣ ପ୍ରବେଶ ଦ୍ୱାର ପୋର୍ଟବ୍ଲେୟାର ହେଉଛି ପର୍ଯ୍ୟଟକମାନଙ୍କ ଏକ ଲୋକପ୍ରିୟ ଲକ୍ଷ୍ୟସ୍ଥଳ । ପର୍ଯ୍ୟାପ୍ତ ସ୍ଥାନ ବିଶିଷ୍ଟ ଏହି ନୂତନ ଟର୍ମିନାଲ ସେ ଅଞ୍ଚଳର ପର୍ଯ୍ୟଟନ ବୃଦ୍ଧିରେ ସହାୟକ ହେବ । ଏହା ମଧ୍ୟ ସ୍ଥାନୀୟ ଅଧିବାସୀଙ୍କ ନିଯୁକ୍ତି ସୁଯୋଗ ବୃଦ୍ଧି କରିବା ସହ ଆଞ୍ଚଳିକ ଆର୍ଥିକ ବିକାଶ ଘଟାଇବ ।