କୋରାପୁଟ : କିରଣ୍ଡୁଲ-କୋତବାଲାସା(କେଆର) ରେଳଲାଇନର ବୋରାଗୁହାଲୁଠାରେ ରେଳଟ୍ରାକ ଉପରେ ପଥର ଧସିଛି । ଫଳରେ ଏହି ରେଳ ପଥରେ ଟ୍ରେନ୍ ଚଳାଚଳ ବ୍ୟାହତ ହୋଇଛି । ଘଟଣାସ୍ଥଳକୁ ବିଭାଗୀୟ ସୁରକ୍ଷା ଓ ଉଦ୍ଧାରକାରୀ ଟିମ୍ ପହଞ୍ଚି ରାସ୍ତା ସଫା କାର୍ୟ୍ୟ ଜାରି ରଖିଛନ୍ତି । ଏହି ରାସ୍ତାରେ ୪ଟି ଟ୍ରେନ ବାତିଲ କରାଯାଇଛି ।
ସେଗୁଡ଼ିକ ହେଲା ବିଶାଖାପାଟଣା-କିରଣ୍ଡୁଲ ଓ କିରଣ୍ଡୁଲ-ବିଶାଖାପାଟଣା ଏକ୍ସପ୍ରେସ ଏବଂ ବିଶାଖାପାଟଣା-କିରଣ୍ଡୁଲ ଓ କିରଣ୍ଡୁଲ- ବିଶାଖାପାଟଣା ପସେଞ୍ଜର । ତେବେ କିରଣ୍ଡୁଲ-ବିଶାଖାପାଟଣା ସ୍ୱତନ୍ତ୍ର ଏକ୍ସପ୍ରେସକୁ ରାୟଗଡ଼ା ଦେଇ ଚଳାଚଳ କରାଯାଇଥିବା ବିଭାଗ ପକ୍ଷରୁ ସୂଚନା ଦିଆଯାଇଛି । ଖବର ଲେଖାଯିବା ପର୍ୟ୍ୟନ୍ତ ଅର୍ଥାତ ରାତି ୯ଟା ଯାଏଁ ସଫେଇ କାର୍ୟ୍ୟ ସମ୍ପୂର୍ଣ୍ଣ ହୋଇ ନଥିବା ଜଣାପଡ଼ିଛି । ବିଭାଗ ପକ୍ଷରୁ ଏହି ଘଟଣାର ତଦନ୍ତ ଚାଲିଛି । ତେବେ ଟ୍ରେନ୍ ଆସୁଥିବା ବେଳେ ପଥର ଖସିଥିଲେ ବଡ ଦୁର୍ଘଟଣା ଘଟିଥାନ୍ତା ବୋଲି ଅଞ୍ଚଳବାସୀ କହିଛନ୍ତି ।