ନିର୍ଭୟା ପାଣ୍ଠିରୁ ୨୦୨୧-୨୨ରେ ଓଡ଼ିଶାକୁ ମିଳିଛି ୨୬.୫୪ କୋଟି ଟଙ୍କା

● ‘ୱାନ ଷ୍ଟପ୍ ସେଣ୍ଟର’ ଖୋଲିବା ଏବଂ ପରିଚାଳନା ଲାଗି ହୋଇଛି ଅର୍ଥ ବିନିଯୋଗ
● ମହିଳା ଓ ଶିଶୁ ବିକାଶ ମନ୍ତ୍ରଣାଳୟ ପକ୍ଷରୁ ନିର୍ଭୟା ପାଣ୍ଠିରେ ମୋଟ୍ ୬୨୧୨.୮୫ କୋଟି ଟଙ୍କା ଆବଣ୍ଟନ କରାଯାଇଛି

ନୂଆଦିଲ୍ଲୀ, (ପିଆଇବି) : ନିର୍ଭୟା ପାଣ୍ଠି ମାଧ୍ୟମରେ କେନ୍ଦ୍ର ସରକାର ୨୦୨୧-୨୨ ରେ ଓଡ଼ିଶାକୁ ୨୬.୫୪ କୋଟି ଟଙ୍କା ଯୋଗାଇ ଦେଇଛନ୍ତି । ମହିଳା ବିରୋଧୀ ହିଂସା ଘଟଣାର ନିରାକରଣ ପାଇଁ ‘ୱାନ ଷ୍ଟପ୍ ସେଣ୍ଟର’ ଖୋଲିବା ଏବଂ ପରିଚାଳନା କରିବା ଲାଗି ଏହି ଅର୍ଥ ବିନିଯୋଗ କରାଯାଇଛି । କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ସ୍ମୃତି ଇରାନୀ ଆଜି ରାଜ୍ୟ ସଭାରେ ଏହି ସୂଚନା ଦେଇଛନ୍ତି ।
ନିର୍ଭୟା ପାଣ୍ଠି ସଂକ୍ରାନ୍ତ ଏକ ପ୍ରଶ୍ନର ଉତ୍ତର ଦେଇ ଶ୍ରୀମତୀ ଇରାନୀ କହିଥିଲେ ଯେ ମହିଳାଙ୍କ ବିରୋଧରେ ହିଂସା ଘଟଣାର ନିରାକରଣ ନିମନ୍ତେ କେନ୍ଦ୍ର ସରକାର ବିଭିନ୍ନ ଯୋଜନା ଏବଂ କାର୍ୟ୍ୟକ୍ରମ ହାତକୁ ନେଉଛନ୍ତି । ନିର୍ଭୟା ପାଣ୍ଠି ମାଧ୍ୟମରେ ଏସବୁ ଯୋଜନାର କାର୍ୟ୍ୟକାରିତା ପାଇଁ ଅର୍ଥ ଯୋଗାଇ ଦିଆଯାଉଛି । ମହିଳା ଓ ଶିଶୁ ବିକାଶ ମନ୍ତ୍ରଣାଳୟ ପକ୍ଷରୁ ଏବେ ସୁଦ୍ଧା ନିର୍ଭୟା ପାଣ୍ଠିରେ ୬୨୧୨.୮୫ କୋଟି ଟଙ୍କା ଆବଣ୍ଟନ କରାଯାଇଛି । ସେଥିମଧ୍ୟରୁ ୪୩୬୬.୮୯ କୋଟି ଟଙ୍କା ବିଭିନ୍ନ ପ୍ରକଳ୍ପ ଏବଂ ଯୋଜନା କାର୍ୟ୍ୟକାରୀ କରିବା ଲାଗି ସମ୍ପୃକ୍ତ ମନ୍ତ୍ରଣାଳୟ ଏବଂ ବିଭାଗକୁ ଜାରି କରାଯାଇଛି । କେନ୍ଦ୍ର ମନ୍ତ୍ରୀ କହିଛନ୍ତି ଯେ, ମୁଖ୍ୟତଃ ଚାହିଦା ଆଧାରରେ ନିର୍ଭୟା ପାଣ୍ଠିର ଅର୍ଥ ବିନିଯୋଗ କରାଯାଇଥାଏ । ନିର୍ଭୟା ପାଣ୍ଠିର ବ୍ୟବସ୍ଥା ଅନୁଯାୟୀ ଏକ କ୍ଷମତାପ୍ରାପ୍ତ କମିଟି ଗଠନ କରାଯାଇଛି । ପାଣ୍ଠି ଅଧୀନରେ ବରାଦ ହେଉଥିବା ଅର୍ଥ ବ୍ୟୟ କରିବା ନିମନ୍ତେ ଏହି କମିଟିକୁ ଅବଗତ କରାଯାଇଥାଏ ଏବଂ କମିଟି ଏଥିପାଇଁ ଆବଶ୍ୟକ ସୁପାରିସ ମଧ୍ୟ କରିଥାଏ । ନିର୍ଭୟା ପାଣ୍ଠି ଅଧୀନରେ କାର୍ୟ୍ୟକାରୀ ହେଉଥିବା ବିଭିନ୍ନ ଯୋଜନା ଏବଂ କାର୍ୟ୍ୟକ୍ରମର କାର୍ୟ୍ୟକାରିତା ମଧ୍ୟ ଏହି କ୍ଷମତାପ୍ରାପ୍ତ କମିଟି ଅନୁଧ୍ୟାନ କରିଥାଏ । ରାଜ୍ୟ ଏବଂ କେନ୍ଦ୍ର ଶାସିତ ପ୍ରଶାସନ ସ୍ତରରେ ମଧ୍ୟ ଯୋଜନା କାର୍ୟ୍ୟକାରିତାର ଅନୁଧ୍ୟାନ ଏବଂ ନିରୀକ୍ଷଣ କରାଯାଇଥାଏ । ତେବେ ନିର୍ଭୟା ପାଣ୍ଠି ଅଧୀନରେ ଅଧିକାଂଶ ପ୍ରକଳ୍ପ ରାଜ୍ୟ ସରକାର ଏବଂ କେନ୍ଦ୍ର ଶାସିତ ପ୍ରଦେଶ ପ୍ରଶାସନ ମାଧ୍ୟମରେ କାର୍ଯ୍ୟକାରୀ କରାଯାଇଥାଏ । ମଞ୍ଜୁରି ପ୍ରାପ୍ତ ଅବଧି ମଧ୍ୟରେ ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶ ପ୍ରଶାସନ ତୃଣମୂଳ ସ୍ତରରେ ଯୋଜନାକୁ କାର୍ୟ୍ୟକାରୀ କରିଥାନ୍ତି ।

ଏପରି କେତେକ ଯୋଜନା ରହିଛି ଯାହାର ଆବର୍ତ୍ତି ବ୍ୟୟ ରହିଛି । ଏଥିପାଇଁ ବିନିଯୋଗ ପ୍ରମାଣପତ୍ର (ୟୁସି) ଏବଂ ଖର୍ଚ୍ଚର ବିବରଣୀ ଦାଖଲ କରିବା ପରେ ମନ୍ତ୍ରଣାଳୟ ପକ୍ଷରୁ ପାଣ୍ଠି ଆବଣ୍ଟନ କରାଯାଇଥାଏ । ରାଜ୍ୟ ଏବଂ କାର୍ଯ୍ୟକାରୀ ଏଜେନ୍ସିମାନେ ବିନିଯୋଗ ପ୍ରମାଣପତ୍ର ଦାଖଲ କରିଥାନ୍ତି । ଯେଉଁ ଆର୍ଥିକ ବର୍ଷରେ ପ୍ରାରମ୍ଭିକ ପାଣ୍ଠି ଆବଣ୍ଟନ କରାଯାଇଥାଏ ସେହି ବର୍ଷ ପରବର୍ତ୍ତୀ ୧୨ ମାସ ମଧ୍ୟରେ ୟୁସି ଦାଖଲ କରିବାର ନିୟମ ରହିଛି । ତେଣୁ କେତେକ କ୍ଷେତ୍ରରେ ୟୁସି ମିଳିବାରେ ବିଳମ୍ବ ହୋଇଥିବାରୁ ଖର୍ଚ୍ଚ ପରିମାଣ ଅଧିକ ହେବାର ସମ୍ଭାବନା ରହିଛି । କୋଭିଡ୍ ୧୯ କାରଣରୁ ଯୋଜନା ଏବଂ କାର୍ୟ୍ୟକ୍ରମର କାର୍ୟ୍ୟକାରିତାରେ ବାଧା ଉତ୍ପନ୍ନ ହୋଇଛି । ଏହି କାରଣରୁ ଯୋଜନାରେ ଆବଣ୍ଟିତ ହୋଇଥିବା ଅର୍ଥର ବାସ୍ତବ ବ୍ୟୟ ପରିମାଣ ଅଧିକ ହୋଇପାରେ ବୋଲି କେନ୍ଦ୍ର ମନ୍ତ୍ରୀ ସୂଚନା ଦେଇଛନ୍ତି ।

Leave A Reply

Your email address will not be published.