ବଙ୍ଗୋମୁଣ୍ଡା, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ବ୍ଲକର ଖଇରା ସ୍ଥିତ ସତ୍ୟ ମହିମା ସଂସ୍କୃତ ବିଦ୍ୟାପୀଠ ପରିସରରେ ଗିରିଧାରୀ ତ୍ୟାଗୀଙ୍କ ଅବସର ଉପଲକ୍ଷେ ଏକ ଭାବପୂର୍ଣ୍ଣ ବିଦାୟକାଳୀନ ସମ୍ବର୍ଦ୍ଧନା ସଭା ଆୟୋଜିତ ହୋଇଯାଇଛି । ଏହି ସଭାରେ ଶିକ୍ଷକ, ଛାତ୍ରଛାତ୍ରୀ, ଗ୍ରାମବାସୀ ଓ ଶୁଭେଚ୍ଛୁମାନଙ୍କ ଉପସ୍ଥିତିରେ ଏକ ଭାବବିହ୍ୱଳ ପରିବେଶ ସୃଷ୍ଟି ହୋଇଥିଲା । ସଭାରେ ସତ୍ୟ ମହିମା ସଂସ୍କୃତ ବିଦ୍ୟାପୀଠର ପ୍ରଧାନପଣ୍ଡିତ ଅକ୍ଷୟ କୁମାର ତ୍ୟାଗୀ, ସଭାପତିତ୍ୱରେ ସମ୍ମାନିତ ଅତିଥି ଭାବେ ସିଆରସିସି ଜିତାମିତ୍ର ବିଶି, ଅବସରପ୍ରାପ୍ତ ଆଦର୍ଶ ଶିକ୍ଷକ ନାରାୟଣ ମିଶ୍ର, ପ୍ରଧାନଶିକ୍ଷକ ହରିରାମ ସତନାମୀ ଯୋଗଦେଇଥିଲେ । ଏହି ଅବସରରେ ବକ୍ତାମାନେ ଗିରିଧାରୀ ତ୍ୟାଗୀଙ୍କ ଦୀର୍ଘ ଶିକ୍ଷକ ଜୀବନ, କର୍ତ୍ତବ୍ୟନିଷ୍ଠା, ଛାତ୍ରଛାତ୍ରୀଙ୍କ ପ୍ରତି ସ୍ନେହ ଓ ଶିକ୍ଷା କ୍ଷେତ୍ରରେ ତାଙ୍କର ଅବଦାନକୁ ସ୍ମରଣ କରିଥିଲେ । ଜଣେ ଆଦର୍ଶ ଶିକ୍ଷକ ଭାବେ ସେ ଛାତ୍ରଛାତ୍ରୀଙ୍କ ଜୀବନ ଗଠନରେ ଯେଉଁ ଭୂମିକା ନିର୍ବାହ କରିଛନ୍ତି, ତାହା ସର୍ବଦା ସ୍ମରଣୀୟ ହୋଇରହିବ ବୋଲି ଅତିଥିମାନେ ମତପ୍ରକାଶ କରିଥିଲେ । ଅବସର ସମ୍ବର୍ଦ୍ଧନା ଅବସରରେ ଶ୍ରୀ ତ୍ୟାଗୀଙ୍କୁ ଉତ୍ତରୀୟ, ପୁଷ୍ପଗୁଚ୍ଛ ଓ ମାନପତ୍ର ପ୍ରଦାନ କରି ସମ୍ମାନିତ କରାଯାଇଥିଲା । ତାଙ୍କର ନିଷ୍ଠାପର ଶିକ୍ଷାଦାନ, ଶୃଙ୍ଖଳା, ସରଳ ଜୀବନଶୈଳୀ ଓ ଛାତ୍ରବତ୍ସଳ ମନୋଭାବକୁ ସମସ୍ତେ ଉଚ୍ଚ ପ୍ରଶଂସା କରିଥିଲେ । ଏହି ସମ୍ବର୍ଦ୍ଧନା କେବଳ ଜଣେ ଶିକ୍ଷକଙ୍କୁ ବିଦାୟ ନୁହେଁ, ବରଂ ତାଙ୍କର ଦୀର୍ଘଦିନର ନିଷ୍ଠା ଓ ସେବା ପ୍ରତି ସମାଜର କୃତଜ୍ଞତାର ପ୍ରତୀକ ବୋଲି ମତ ପ୍ରକାଶ ପାଇଥିଲା । ଅବସର ହେଉଛି କର୍ମମୟ ଜୀବନର ଏକ ପର୍ଯ୍ୟାୟର ସମାପ୍ତି, କିନ୍ତୁ ଜଣେ ଆଦର୍ଶ ଶିକ୍ଷକଙ୍କ ଜ୍ଞାନ, ଆଦର୍ଶ ଓ ମୂଲ୍ୟବୋଧ କେବେ ଅବସର ନିଏ ନାହିଁ । ତାଙ୍କ ଦ୍ୱାରା ଅନୁପ୍ରାଣିତ ଛାତ୍ରଛାତ୍ରୀ ଓ ସମାଜ ମଧ୍ୟରେ ତାଙ୍କର ଶିକ୍ଷା ଓ ସ୍ମୃତି ସବୁଦିନ ଜୀବନ୍ତ ରହିବ ବୋଲି ଉପସ୍ଥିତ ବ୍ୟକ୍ତିମାନେ ମତପ୍ରକାଶ କରିଥିଲେ । ସଭାରେ ଭଜମନ ବିଶ୍ୱାଳ, ଶଶୀ ଖମାରୀ, ତୀବ୍ରରାଜ ମେହେର, ମିନିକେତନ ମାଝୀ, ଡେଭିଡ୍ ସିଂ ବରିହା, ରଘୁମଣି ଭୋଇ, ପ୍ରଭାକର ଦାସ, ସୁଧାକର ସାହୁ, ସୀତାକାନ୍ତ ଭୋଇ, ଝଞ୍ଚନ୍ଦ୍ର, ତୀର୍ଥବାସୀ ଭୋଇ, ନିରଞ୍ଜନ ରଣା, ଚକ୍ରଧର ଜାନୀ, ରୋହିତ ରଣା, ବୀର ତାଣ୍ଡି , ଜିତେନ୍ଦ୍ର ଭତ୍ରା ଓ କୌଲସ୍ତି ଭୋଇଙ୍କ ସମେତ ଅନେକ ଶିକ୍ଷକ ଓ ଶୁଭେଚ୍ଛୁ ଉପସ୍ଥିତ ଥିଲେ । ଛାତ୍ରଛାତ୍ରୀଙ୍କ ସହ ଗ୍ରାମର ମାଆ ଓ ଭଉଣୀମାନେ ମଧ୍ୟ ଯୋଗଦେଇ ଶ୍ରୀ ତ୍ୟାଗୀଙ୍କ ପ୍ରତି ନିଜର ଶ୍ରଦ୍ଧା ଓ ସମ୍ମାନ ଜଣାଇଥିଲେ । ଶେଷରେ ଗିରିଧାରୀ ତ୍ୟାଗୀଙ୍କ ଅବସର ପରବର୍ତ୍ତୀ ଜୀବନ ସୁସ୍ଥ, ସୁଖମୟ ଓ ଶାନ୍ତିପୂର୍ଣ୍ଣ ହେଉ ବୋଲି ସମସ୍ତେ କାମନା କରିଥିଲେ । ଜଣେ ଆଦର୍ଶ ଶିକ୍ଷକଙ୍କୁ ବିଦାୟ ଦେବାର ଏହି ମୁହୂର୍ତ୍ତ ଉପସ୍ଥିତ ସମସ୍ତଙ୍କ ମନରେ ଅଭୁଲା ସ୍ମୃତି ହୋଇ ରହିଥିଲା । ତାଙ୍କର ଶିକ୍ଷାଦାନ ଓ ସେବାମୟ ଜୀବନ ଆଗାମୀ ପିଢ଼ି ପାଇଁ ସର୍ବଦା ପ୍ରେରଣାର ଉତ୍ସ ହୋଇରହିବ ।