ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ପୁଇଁତଲା ଥାନା ଛତାପିପଲ ଗାଁ ପୋଖରୀରୁ ଜଣେ ବ୍ୟକ୍ତିଙ୍କ ଶବ ଉଦ୍ଧାର ଘଟଣା ଯୋଗୁଁ ଏବେ ଉତ୍ତେଜନା ଦେଖିବାକୁ ମିଳିଛି । ଅଗ୍ନିଶମ ବିଭାଗ ଶବ ଉଦ୍ଧାର ପାଇଁ ପହଂଚିଥିବା ବେଳେ ଗ୍ରାମବାସୀ ଜିଲ୍ଲାପାଳ ନ ଆସିବା ଯାଏଁ ତଥା ମଦ ବିକୁଥିବା ବ୍ୟକ୍ତିଙ୍କ ଘର ଭଂଗା ନହେବା ପର୍ଯ୍ୟନ୍ତ ଶବ ଉଦ୍ଧାର କରିବାକୁ ଦିଆଯିବ ନାହିିଁ ବୋଲି ଅଡ଼ି ବସିଛନ୍ତି । ଏହା ଏକ ହତ୍ୟା ଘଟଣା ବୋଲି ଅଭିଯୋଗ ଆଣିଛନ୍ତି ଗାଁ ଲୋକେ । ସୂଚନା ଅନୁସାରେ ଗାଁର କାଲୁ ଦୀପ(୬୦) ଗତ ୧୧ ତାରିଖରୁ ନିଖୋଜ ଥିଲେ । ପରିବାର ଲୋକେ ନିଖୋଜ ହୋଇଥିବା ନେଇ ପୁଇଁତଲା ଥାନାରେ ଲିଖିତ ଭାବେ ଜଣାଇଥିଲେ । ଗତକାଲି ସକାଳୁ କାଲୁଙ୍କ ଶବ ପୋଖରୀରେ ଭାସୁଥିବା ଦେଖିଥିଲେ ଗାଁ ଲୋକେ । ପୋଖରୀ ହିଡରେ ଲୋକଙ୍କ ଭିଡ ବଢ଼ିବା ସହ ପୋଖରୀ ପାଖରେ ଥିବା ରୁକୁଙ୍କ ଘର ଭଂଗାଯିବା ସହ ତାଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ଦାବୀ କରିଛନ୍ତି । ୧୧ ତାରିଖ ଦିନ କାଲୁ ଗାଁର ଅନ୍ୟ କିଛି ଲୋକଙ୍କ ସହିତ ପୋଖରୀ ହିଡରେ ଜୁଆ ଖେଳୁଥିଲେ । ତେଣୁ ସେହି ଲୋକମାନେ ହତ୍ୟା କରି ପୋଖରୀରେ ଫିଙ୍ଗି ଦେଇଥିବା ଅଭିଯୋଗ କରୁଛନ୍ତି ଗାଁ ଲୋକେ ।