- ନବୀନ ବିଶ୍ୱବନ୍ଧୁ
ଗଲ ଯେ’ ଗଲ !
ନାଇଁ ଆଏଲ।
କାହିଁ ଗଲ, କାଣା କଲ
କିଏ ଜାନେ…
କା’ର୍ ସୁରେ,କେତେ ଧୂରେ
କେନ୍ ଠାନେ ?
ତମେ ପଲାଲାକେ ଅକାଲ୍-କାଲ୍,
ପଡ଼ିଆ ପଡ଼ଲା ଗଜ୍-ବାହାଲ୍,
ମାଲେ ମାଲେ ଗଲା ମାଲ୍-ଖେକାରୀ,
ଭାଲୁ କଅଁଲାଲା କୁଶେର୍ ବାରୀ,
କୁକୁରା ଖାଏଲା ଘଉବିଲେଇ…
ଆଏଲ ନାଇଁ !
ତମର୍ ଗୁଡ଼େ କାଣା ଗୁରେହି ହେଇଛେ
ବାର-ବୋଡ଼ା, ତେର-ଜାତି-ଧର୍ସା…
କାଏଁ କାକର୍,
କାଏଁ ଝଉ ବର୍ଷା ?
କି’ କିଏ ଭରିଛେ ତମର୍ ମୁଡ଼େ
ଆଠ୍ ନାଗ୍, ସୁଲ୍ହ ଚିତିର୍ ମହରା…
ମନ୍ ମରା,
ତନ୍ ହରା ??
ତମକୁ ଟାଖି ଟାଖି
ବାଟ୍ ଦେଖି ଦେଖି
ବର୍ ଗଛର୍ ଓର୍ ବାଗିର୍
ଭୂଇଁ ହେଲି ଜାକି !
ଘାଏ ହେଲେ ଆଏତ !
ଛନେ ଘଡ଼େ ବଏତ,
ଦୁଃଖ୍-ସୁଖ୍ ହେତ,
ତମର୍ ଯେତେ ରାଗ୍-ରୁଷା, ହୁଡ଼ା-କୁଦା,
ବିଧା-ଠୁସା ଦେତ ।
ମୋର୍ ହେତେ କୁଲାକୁଲି,
ମିଠାଗାଲି,ଚୁମା-ଚଟା ନେତ,
ପଲାତ !
ଗଲ ଯେ’ ଗଲ,
ମିତ !
ଲେହେଁଟି ନାଇଁ ଦେଖି
ନୁକୋ ନାଇଁ କଲ ।
ମୋ.ନଂ. : ୮୧୪୪୧୬୯୦୯୧