- ପ୍ରତିଭା ରାୟ ଭାରତୀୟ ସାହିତ୍ୟର ଜୀବନ୍ତ କିମ୍ବଦନ୍ତୀ
ଭୁବନେଶ୍ୱର, (ପିଆଇବି) : ଭୁବନେଶ୍ୱରର ସଂସ୍କୃତିଭବନ ସଭାଗୃହରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ସାହିତ୍ୟ ଏକାଡେମି ପକ୍ଷରୁ ପ୍ରସିଦ୍ଧ ଓଡ଼ିଆ ଲେଖିକା ଏବଂ ବିଦୁଷୀ ଡକ୍ଟର ପ୍ରତିଭା ରାୟଙ୍କୁ ଫେଲୋସିପ୍ ପ୍ରଦାନ କରାଯାଇଛି । ପ୍ରାରମ୍ଭରେ ଡକ୍ଟର ଆଦ୍ୟାଶା ଦାସଙ୍କ ଆବାହନୀ ଗୀତ ପରିବେଷଣ କରିଥିଲେ । ସାହିତ୍ୟ ଏକାଡେମିର ସଚିବ ଡକ୍ଟର ବରୁଣ ଗୁଲାଟି ପ୍ରାରମ୍ଭିକ ମନ୍ତବ୍ୟ ଉପସ୍ଥାପନ କରିଥିଲେ ଏବଂ ଫେଲୋସିପର ପ୍ରଶସ୍ତି ପାଠ କରିଥିଲେ । ସାହିତ୍ୟ ଏକାଡେମିର ସଭାପତି ଡକ୍ଟର ମାଧବ କୌଶିକ ଡକ୍ଟର ରାୟଙ୍କୁ ଫେଲୋସିପ୍ ଫଳକ ପ୍ରଦାନ କରିବା ପୂର୍ବକ ସଭାପତି ଭାଷଣ ଦେଇଥିଲେ । ସେ କହିଥିଲେ ଯେ, ଡକ୍ଟର ରାୟ ହେଉଛନ୍ତି ଭାରତୀୟ ସାହିତ୍ୟର ଜୀବନ୍ତ କିମ୍ବଦନ୍ତୀ । ଏହି ଅବସରରେ ଏକ ସମ୍ବାଦ କାର୍ଯ୍ୟକ୍ରମ ଆୟୋଜିତ ହୋଇଥିଲା ଯେଉଁଥିରେ ସାହିତ୍ୟ ଏକାଡେମିର ଓଡ଼ିଆ ଉପଦେଷ୍ଟା ମଣ୍ଡଳୀର ଆବାହକ ଡକ୍ଟର ଗୌରହରି ଦାସ ଅଧ୍ୟକ୍ଷତା କରିଥିଲେ । ଡକ୍ଟର ଦାସ କହିଥିଲେ ଯେ, ଡକ୍ଟର ରାୟ ହେଉଛନ୍ତି ଓଡ଼ିଶାର ପ୍ରଥମ ଲେଖିକା ଯିଏ ସାହିତ୍ୟ ଏକାଡେମିର ଫେଲୋସିପ୍ ପାଇଛନ୍ତି । ବିଶିଷ୍ଟ ଲେଖକ ଦେବପ୍ରସାଦ ଦାଶ, ପ୍ରଫେସର ସଂଘମିତ୍ରା ମିଶ୍ର ଏବଂ ପ୍ରଫେସର ପ୍ରଫୁଲ୍ଲ କୁମାର ମହାନ୍ତି ପ୍ରତିଭା ରାୟଙ୍କ ଜୀବନୀ ଏବଂ କୃତି ଉପରେ ବକ୍ତବ୍ୟ ଦେଇଥିଲେ ।