ରାଉରକେଲା, (ସସ୍ମିତା ପ୍ରଧାନ) : ଶାରିରୀକ ଓ ମାନସିକ ସୁସ୍ଥତା ସୁସ୍ଥ ସମାଜ ଗଠନରେ ସହାୟକ ହୋଇଥାଏ । ଯୋଗ ଏମିତି ଏକ ବିଦ୍ୟା ଯାହା ଦୈନନ୍ଦିନ ଜୀବନର ପ୍ରତିଟି କାର୍ଯ୍ୟ ପାଇଁ ଶକ୍ତି ଦିଏ । ସାମ୍ପ୍ରତିକ ସ୍ଥିତିରେ ମଣିଷର ବ୍ୟସ୍ତତା, କାର୍ଯ୍ୟଚାପ ଓ ଅବସାଦ ବୃଦ୍ଧି ଯୋଗୁଁ ନିଜ ଶରୀରଚର୍ଯ୍ୟା ପାଇଁ ସମୟ ଦେଇପାରୁନାହିଁ । ତେବେ ରୋଗମୁକ୍ତ ଜୀବନ, କାର୍ଯ୍ୟଦକ୍ଷତା ବୃଦ୍ଧି ପାଇଁ ଶରୀରର ଯତ୍ନ ଜରୁରୀ । ଏଥିପାଇଁ ଦୈନନ୍ଦିନ କିଛି ବ୍ୟାୟାମ, ଯୋଗ ଆଦିର ଆବଶ୍ୟକତା ରହିଛି । ଯଦି ଦୈନିକ ଅଧଘଣ୍ଟା କିମ୍ବା ଘଣ୍ଟାଏ ବ୍ୟାୟାମ ବା ଯୋଗ କରାଯାଏ ତେବେ ଶରୀର ସୁସ୍ଥ ଏବଂ ମନରେ ଫୁର୍ତ୍ତି ରହିଥାଏ । ଦିନସାରା ସତେଜ ଲାଗେ । ଦୈନିକ ଚାଲିବା, ସାଇକେଲ ଚଲାଇବା, ଯୋଗବ୍ୟାୟାମ କରିବା ପ୍ରତି ଏବେ ସମଗ୍ର ରାଜ୍ୟ, ଦେଶ, ବିଶ୍ୱରେ ଆଗ୍ରହ ବଢୁଥିବା ଦେଖିବାକୁ ମିଳୁଛି । ସମଗ୍ର ବିଶ୍ଵ ଏବେ ଯୋଗ ବ୍ୟାୟାମର ଗୁରୁତ୍ୱ ବୁଝୁଥିବାରୁ ଏହାର ଆଦର ବଢ଼ିଛି । ମଣିଷକୁ ସଚେତନ କରିବା ଲକ୍ଷ୍ୟରେ ଯୋଗ ଦିବସ ମଧ୍ୟ ପାଳନ କରାଯାଉଛି । ଏହି କ୍ଷେତ୍ରରେ ଆମ ଇସ୍ପାତ ନଗରୀ ମଧ୍ୟ ପଛରେ ପଡ଼ିନାହିଁ । ଇସ୍ପାତ କାରଖାନା କର୍ତ୍ତୁପକ୍ଷ ଓ ରାଜ୍ୟ ପ୍ରଶାସନ ତରଫରୁ ବିଭିନ୍ନ ସ୍ଥାନରେ ଫିଟନେସ ପାଥ୍ ଓ ବ୍ୟାୟାମ ଉପକରଣ ସହ ବ୍ୟାୟାମଶାଳା ମାନ ତିଆରି କରାଯାଇଛି । ଶରୀର ସୁସ୍ଥ ରଖିବା ପାଇଁ ଇଛୁକ ଥିବା ଯୁବକ, ବୃଦ୍ଧ ବୃଦ୍ଧା ଓ଼ ମହିଳା ଦୈନିକ ବ୍ୟାୟାମ ଓ ଯୋଗକରି ନିଜକୁ ସୁସ୍ଥ ରଖିପାରୁଛନ୍ତି । ଏହା ସୁସ୍ଥ ସମାଜ ଗଠନରେ ସହାୟ ହେଉଛି । ୨୦୦୭ ମସିହାରେ ଆରଏସପି ତରଫରୁ ତିଆରି ହୋଇଥିବା ଇସ୍ପାତ ଫିଟନେସ ପାଥରେ ଯୋଗ ବ୍ୟାୟାମ କରୁଥିବା କିଛି ବ୍ୟକ୍ତିଙ୍କୁ ଆମେ ଭେଟି ଏସମ୍ପର୍କରେ ଆଲୋଚନା କରିଥିଲୁ । ସର୍ବଶ୍ରୀ ଅବକାଶ ବେହେରା, ଅଜୟ ପୂଜାରୀ, ଶେଖର ନାରାୟଣ, ଜ୍ଞାନ ରଞ୍ଜନ ଦାସ, ଜଗନ୍ନାଥ ପଣ୍ଡା, ବିନତୀ ଦାସ, ମୋନାଲିସା ସାହୁ, ହେମଶୁଭ୍ରା ଦଳେଇ, ବିଷ୍ଣୁଚରଣ ବେହେରା, ପ୍ରଫୁଲ୍ଲ ଦାସ ପ୍ରମୁଖ ଯୋଗ ଓ ବ୍ୟାୟାମର ଉପକାରିତା ସମ୍ପର୍କରେ ମନ୍ତବ୍ୟ ଦେବା ସହ ଏହାଦ୍ୱାରା ଖୁସି ଅନୁଭବ ହେଉଛି ବୋଲି ମତ ରଖିଥିଲେ ।
