ଟିଟିଲାଗଡ଼, (ସଞ୍ଜୟ କୁମାର ନାୟକ) : ଡିସେମ୍ବର ୨୬ ତାରିଖ ହେଉଛି ବିଜୁ ଜନତା ଦଳର ପ୍ରତିଷ୍ଠା ଦିବସ । ଏହି ଉପଲକ୍ଷେ ଟିଟିଲାଗଡ଼ ବିଜୁ ଜନତା ଦଳର ନେତ୍ରୀ ଶ୍ରୀମତୀ ଟୁକୁନି ସାହୁଙ୍କ ନେତୃତ୍ଵରେ ପ୍ରଥମେ ଟିଟିଲାଗଡ଼ ଥାନା ସମ୍ମୁଖରେ ଥିବା ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ ଟିଟିଲାଗଡ଼ର ପୂର୍ବତନ ବିଧାୟିକା ତଥା ମନ୍ତ୍ରୀ ଶ୍ରୀମତୀ ଟୁକୁନି ସାହୁ । ଏହାପରେ ଟିଟିଲାଗଡ଼ ବିଜୁ ଜନତା ଦଳ କାର୍ଯ୍ୟାଳୟରେ ଏକ କର୍ମୀ ସମ୍ମିଳନୀ ଅନୁଷ୍ଠିତ ହୋଇଥିଲା । ସେଠାରେ ଆଗାମୀ ଦିନରେ ଦଳକୁ କିପରି ଆହୁରି ମଜବୁତ କରି ଲୋକଙ୍କ ପାଇଁ ପୁଣି କାମ କରି ଲୋକଙ୍କ ଆସ୍ଥା ଭାଜନ ହୋଇପାରିବେ ସେନେଇ ଆଲୋଚନା ହୋଇଥିଲା । ପ୍ରବାଦ ପୁରୁଷ ବିଜୁବାବୁଙ୍କ ନୀତି ଆଦର୍ଶ ଏବଂ ନେତା ନବୀନ ପଟ୍ଟନାୟକଙ୍କ ନେତୃତ୍ୱରେ ଆଜିର ଦିନରେ ଓଡିଶାବାସୀଙ୍କ ଅର୍ଥପୂର୍ଣ୍ଣ ବିକାଶ ଓ ସୁଖଦୁଃଖର ସାଥୀ ହେବା ପାଇଁ ଗଠିତ ଆଞ୍ଚଳିକ ରାଜନୈତିକ ଦଳ ବିଜୁ ଜନତା ଦଳ ଦୀର୍ଘ ୨୭ ବର୍ଷର ସଫଳ ଯାତ୍ରା ଏବଂ ପ୍ରତିଟି କର୍ମୀଙ୍କ ନିଷ୍ଠା ଓ ଉତ୍ସର୍ଗୀକୃତ ସେବା ପାଇଁ ଓଡିଶା ଆଜି ସବୁ କ୍ଷେତ୍ରରେ ଦେଶ ବିଦେଶରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି । ଯାହାକୁ ନେଇ ପ୍ରତ୍ୟେକ ଓଡିଶାବାସୀ ଗର୍ବିତ । ବିଜେଡି କେତେଦିନ କ୍ଷମତାରେ ରହିଲେ ନରହିଲେ ବଡ କଥା ନୁହେଁ, ଓଡ଼ିଶାବାସୀଙ୍କ ଆସ୍ଥା ବିଶ୍ୱାସ ଓ ଭଲପାଇବା ଅତୁଟ ରହିବା ହେଉଛି ଆମର ବଡ ପୁଞ୍ଜି ଯାହା ୨୮ବର୍ଷ ପଦାର୍ପଣରେ ଅବ୍ୟାହତ ରହିଛି । ଓଡ଼ିଶାର ହକର ଲଢ଼େଇରେ ବିଜୁ ଜନତା ଦଳ କେବେ ପଛଘୁଞ୍ଚା ଦେବ ନାହିଁ । ୨୮ତମ ପ୍ରତିଷ୍ଠା ଦିବସ ପାଳନ ଅବସରରେ ସମସ୍ତଙ୍କୁ ଅଭିନନ୍ଦନ ଓ ଶୁଭେଚ୍ଛା ଜଣାଇ ନିଜ ବକ୍ତବ୍ୟରେ କହିଥିଲେ ବିଜୁ ଜନତା ଦଳର ଜିଲ୍ଲା ସଭାପତି ତଥା ପୂର୍ବତନ ମନ୍ତ୍ରୀ ଶ୍ରୀମତୀ ଟୁକୁନି ସାହୁ । ଏହି ଶୁଭ ଦିବସରେ ପ୍ରିୟ ନେତା ନବୀନ ପଟ୍ଟନାୟକଙ୍କ ନେତୃତ୍ୱରେ ସଙ୍କଳ୍ପବଦ୍ଧ ହୋଇ ଓଡ଼ିଶାବାସୀଙ୍କ ସେବାରେ ଲଢ଼େଇକୁ ସମସ୍ତେ ଜୋରଦାର କରିବା ବୋଲି ଉପସ୍ଥିତ କର୍ମୀଙ୍କୁ ଉଦବୋଧନ ଦେଇଥିଲେ ଶ୍ରୀମତୀ ସାହୁ । ଏହି ଦିବସ ପାଳନ ଅବସରରେ ବିଜୁ ଜନତା ଦଳର ନେତା ପ୍ରେମ ଜୈନ, ଗୋବର୍ଦ୍ଧନ ନାଗ, ଲାଲା ବର୍ମା, ବୁଲୁ ସେଠ, ରାଜେଶ ପ୍ରଧାନ, ବ୍ଲକ ଅଧ୍ୟକ୍ଷ ଶ୍ରୀମତୀ ସଂଯୁକ୍ତା ନାଏକ, ପୌର ଉପାଧ୍ୟକ୍ଷା ଶ୍ରୀମତୀ ପୁଷ୍ପା ମଞ୍ଜରୀ ଜାଲ, ଜିଲ୍ଲା ପରିଷଦ ଗୀତା ବିଶି, ବୁଲ୍ବୁଲ୍ ମେହେର, ପୁସୁ ଜୈନ, ସଞ୍ଜୁ ଅଗ୍ରୱାଲ, ଅରୁଣ ବାଗ, ହେମନ୍ତ ସାହୁ, ଧ୍ରୁବ ସାହୁଙ୍କ ସମେତ ଅନ୍ୟାନ୍ୟ ବହୁ ସଦସ୍ୟ ସାମିଲ ହୋଇଥିଲେ ।