ଟିଟିଲାଗଡ଼, (ସଞ୍ଜୟ କୁମାର ନାୟକ) : ରବିବାର ଦିନ ପବିତ୍ର ରାମ ନବମୀ । ରାମ ନବମୀ ମନାଇବା ପାଇଁ ଟିଟିଲାଗଡ଼ ସହର ଚଳଚଞ୍ଚଳ ହୋଇପଡିଛି । ଏହି ନବମୀ ପାଳନ କରିବାକୁ ସହରରେ ଥିବା ସମସ୍ତ ହନୁମାନ ଓ ରାମ ମନ୍ଦିରର କମିଟି ସଦସ୍ୟଙ୍କ ଦ୍ୱାରା ବ୍ୟାପକ ପ୍ରସ୍ତୁତି କରାଯାଉଛି । ତେବେ ଏହାକୁ ଦୃଷ୍ଟିରେ ରଖି ଥାନାଧିକାରୀ କଲ୍ୟାଣୀ ବେହେରାଙ୍କ ସଭାପତିତ୍ୱରେ ଏସଡିପିଓ ଯଶୋବନ୍ତ ନାରାୟଣ ପ୍ରଧାନଙ୍କ ଉପସ୍ଥିତିରେ ଶୁକ୍ରବାର ସନ୍ଧ୍ୟାରେ ଟିଟିଲାଗଡ଼ ଥାନା ସମ୍ମିଳନୀ କକ୍ଷରେ ସହରର ସବୁ ଧର୍ମର କମିଟି ସଦସ୍ୟଙ୍କୁ ଡକାଇ ଏକ ଶାନ୍ତି ବୈଠକ ଅନୁଷ୍ଠିତ ହୋଇଯାଇଛି । ସମସ୍ତ ଧର୍ମର ସଦସ୍ୟଙ୍କ ଉପସ୍ଥିତିରେ କିଭଳି ସମସ୍ତେ ଭାଇଚାରାର ପରିଚୟ ଦେବା ସହ ଶାନ୍ତି ଶୃଙ୍ଖଳାର ସହିତ ଏହି ପର୍ବ ପାଳନ କରିହେବ ସେ ନେଇ ଆଲୋଚନା କରିଥିଲେ । କୌଣସି ପ୍ରକାର ଅପପ୍ରଚାର କିମ୍ବା କାହାର କଥା ଶୁଣିବାକୁ ମନା କରିବା ସହ ଯଦି କାହାର କିଛି ସମସ୍ୟା ହୁଏ ସଙ୍ଗେ ସଙ୍ଗେ ପୋଲିସକୁ ଜଣାଇବାକୁ ଥାନାଧିକାରୀ କହିଥିଲେ । ସେହିପରି ପୋଲିସ ପକ୍ଷରୁ ସହର ସାରା ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ ବୋଲି ଏସ ଡିପି ଓ ପ୍ରଧାନ ସୁଚନା ଦେଇଥିଲେ ।