କଟକ : ରେଭେନ୍ସା ବିଶ୍ୱବିଦ୍ୟାଳୟର ସମାଜଶାସ୍ତ୍ର ବିଭାଗ ପକ୍ଷରୁ ଜାତୀୟ ଆଲୋଚନାଚକ୍ର ଅନୁଷ୍ଠିତ ହୋଇଛି । ସମାଜଶାସ୍ତ୍ରରେ ଗବେଷଣାର ପଦ୍ଧତି ଶୀର୍ଷକରେ ଆଲୋଚନାଚକ୍ର ହୋଇଛି । ଏଥିରେ ବନାରସ୍ ହିନ୍ଦୁ ବିଶ୍ୱବିଦ୍ୟାଳୟର ପ୍ରଫେସର ଶ୍ଵେତା ପ୍ରସାଦ ମୁଖ୍ୟବକ୍ତା ରୂପେ ଯୋଗ ଦେଇ ଆଲୋଚନା କରିଥିଲେ । ଏହି ଆଲୋଚନାଚକ୍ରରେ ସମାଜଶାସ୍ତ୍ର ସହ ଅନ୍ୟାନ୍ୟ ବିଭାଗର ଅଧ୍ୟାପକ, ଅଧ୍ୟାପିକା, ଗବେଷକ, ଗବେଷିକା ଏବଂ ଛାତ୍ରଛାତ୍ରୀ ପ୍ରତିଭାଗୀ ରୂପେ ଯୋଗ ଦେଇଥିଲେ । ପ୍ରଫେସର ବିକ୍ରମ କେଶରୀ ମିଶ୍ର ସ୍ୱାଗତ ସମ୍ଭାଷଣ ପ୍ରଦାନ କରିଥିଲେ । ବିଭାଗର ଅଧ୍ୟାପକ ମନୋରଞ୍ଜନ ଦାସ ଅତିଥି ପରିଚୟ ପ୍ରଦାନ କରିଥିଲେ । ମୁଖ୍ୟବକ୍ତା ପ୍ରଫେସର ଶ୍ଵେତା ପ୍ରସାଦ ଶୀର୍ଷକ ସମ୍ପର୍କରେ ମତ ଦେଇ କହିଥିଲେ ସମାଜ ଶାସ୍ତ୍ରର ପାଠ୍ୟକ୍ରମ ଏବଂ ଗବେଷଣାର ଭିତ୍ତି ଅଙ୍ଗାଅଙ୍ଗୀ ଭାବେ ଜଡିତ । ଏଥି ସହିତ ଗବେଷଣା, ଗବେଷକର ଦୃଷ୍ଟିକୋଣ ଏବଂ ନିରପେକ୍ଷତା ଉପରେ ନିର୍ଭର କରେ ବୋଲି ମତ ପୋଷଣ କରିଥିଲେ । ସମାଜ ଶାସ୍ତ୍ରର ଅଧ୍ୟାପିକା ଡକ୍ଟର ମନୋସ୍ମିତା ମହାପାତ୍ର କାର୍ଯ୍ୟକ୍ରମ ସଂଯୋଜନା କରିଥିଲେ । ଅଧ୍ୟାପକ ଡକ୍ଟର ଈଶ୍ୱର ଚନ୍ଦ୍ର ନାୟକ ଧନ୍ୟବାଦ ଅର୍ପଣ କରିଥିଲେ । ବିଭାଗର ଅଧ୍ୟାପକ ଡ଼କ୍ଟର ଜ୍ଞାନ ରଞ୍ଜନ ପୃଷ୍ଟି, ଅଧ୍ୟାପିକା ଲୁସି ମିଶ୍ର ଏବଂ ଡ଼କ୍ଟର ରୋଶିନା ୟୁସୁଫି, ଛାତ୍ର ରଶ୍ମି ରଞ୍ଜନ ବଳ, ରୋହିତ କୁମାର ଦାସ ଏବଂ ଛାତ୍ରୀ ଅନମୋଲ୍ ଘୋଷାଲ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ ।