ନୂଆଦିଲ୍ଲୀରେ ୧୮ତମ ବ୍ରିକ୍ସ ଶିଖର ସମ୍ମିଳନୀ ଅବସରରେ ନାଇଜେରିଆର ଉପରାଷ୍ଟ୍ରପତିଙ୍କୁ ଭେଟିଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ, (ପିଆଇବି) : ନୂଆଦିଲ୍ଲୀରେ ଅନୁଷ୍ଠିତ ବ୍ରିକ୍ସ ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନାଇଜେରିଆର ଉପରାଷ୍ଟ୍ରପତି ଶ୍ରୀ କାଶିମ୍ ସେତ୍ତିମା ମୁସ୍ତଫାଙ୍କୁ ଭେଟିଥିଲେ । ଉପରାଷ୍ଟ୍ରପତି କାଶିମ୍ ସେତ୍ତିମା ମୁସ୍ତଫା ନୂଆଦିଲ୍ଲୀରେ ଆୟୋଜିତ ବ୍ରିକ୍ସ ସମ୍ମିଳନୀ ପାଇଁ ନାଇଜେରିଆ ପ୍ରତିନିଧି ଦଳର ନେତୃତ୍ୱ ନେଉଛନ୍ତି । ଏହି ପ୍ରତିନିଧି ଦଳରେ ବୈଦେଶିକ ବ୍ୟାପାର; ଶିଳ୍ପ, ବାଣିଜ୍ୟ ଓ ନିବେଶ; ଯୋଗାଯୋଗ, ନବାଚାର ଓ ଡିଜିଟାଲ ପ୍ରଯୁକ୍ତିବିଦ୍ୟା; ମାନବୀୟ ବ୍ୟାପାର ଓ ଦାରିଦ୍ର୍ୟ ହ୍ରାସ; ମହିଳା ବ୍ୟାପାର ତଥା ବିଜ୍ଞାନ ଓ ପ୍ରଯୁକ୍ତିବିଦ୍ୟା ବିଭାଗର ମନ୍ତ୍ରୀମାନଙ୍କ ସମେତ ଅନେକ ମନ୍ତ୍ରୀ ସାମିଲ ଅଛନ୍ତି ।
ଉଭୟ ନେତା ଭାରତ-ନାଇଜେରିଆ ମଧ୍ୟରେ ଥିବା ବହୁମୁଖୀ ସମ୍ପର୍କର ସମୀକ୍ଷା କରିଥିଲେ ଏବଂ ବିଭିନ୍ନ କ୍ଷେତ୍ରରେ ହୋଇଥିବା ନିରନ୍ତର ଅଗ୍ରଗତି ଉପରେ ସନ୍ତୋଷ ବ୍ୟକ୍ତ କରିଥିଲେ । ସେମାନଙ୍କ ଆଲୋଚନା ବାଣିଜ୍ୟ ଓ ନିବେଶ, ପ୍ରତିରକ୍ଷା ଓ ସୁରକ୍ଷା, ଶକ୍ତି ଭାଗୀଦାରୀ, କୃଷି, ସ୍ୱାସ୍ଥ୍ୟ ଏବଂ ଡିଜିଟାଲ ପ୍ରଯୁକ୍ତିବିଦ୍ୟା ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ର ଉପରେ କେନ୍ଦ୍ରିତ ଥିଲା । ସେମାନେ ଭାରତ-ନାଇଜେରିଆ ରଣନୀତିକ ଭାଗୀଦାରୀକୁ ଆହୁରି ମଜବୁତ କରିବା ପାଇଁ ନିଜର ପ୍ରତିବଦ୍ଧତା ଦୋହରାଇଥିଲେ ।
ପ୍ରଧାନମନ୍ତ୍ରୀ ମୋଦୀ ଏବଂ ଉପରାଷ୍ଟ୍ରପତି ସେତ୍ତିମା ମୁସ୍ତଫା ପାରସ୍ପରିକ ସ୍ୱାର୍ଥର ଆଞ୍ଚଳିକ ଓ ବିଶ୍ୱସ୍ତରୀୟ ପ୍ରସଙ୍ଗ ଉପରେ ମଧ୍ୟ ମତାମତ ଆଦାନପ୍ରଦାନ କରିଥିଲେ, ଯେଉଁଥିରେ ଗ୍ଲୋବାଲ୍ ସାଉଥ୍ର ପ୍ରାଥମିକତା ଓ ଚିନ୍ତାଧାରା ଅନ୍ତର୍ଭୁକ୍ତ ଥିଲା । ସେମାନେ ବହୁପକ୍ଷୀୟ ମଞ୍ଚରେ ସହଯୋଗ ବୃଦ୍ଧି କରିବା ଏବଂ ଅଧିକ ପ୍ରତିନିଧିମୂଳକ, ସମାବେଶୀ ତଥା ବହୁଧ୍ରୁବୀୟ ଅନ୍ତର୍ଜାତୀୟ ବ୍ୟବସ୍ଥା ଦିଗରେ ମିଳିତ ଭାବେ କାର୍ଯ୍ୟ କରିବାର ମହତ୍ୱ ଉପରେ ଜୋର ଦେଇଥିଲେ ।
ପ୍ରଧାନମନ୍ତ୍ରୀ ମୋଦୀ ନାଇଜେରିଆ ସହିତ ଭାଗୀଦାରୀକୁ ସୁଦୃଢ଼ କରିବା ଏବଂ ଆଫ୍ରିକା ସହିତ ଭାରତର ସମ୍ପର୍କକୁ ଅଧିକ ଗଭୀର କରିବା ଦିଗରେ ଭାରତର ନିରନ୍ତର ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ । ଉପରାଷ୍ଟ୍ରପତି ସେତ୍ତିମା ମୁସ୍ତଫା ଭାରତର ବିକାଶ ଅଭିଜ୍ଞତା ତଥା ନାଇଜେରିଆରେ କ୍ଷମତା ନିର୍ମାଣ ଓ ଅର୍ଥନୈତିକ ବିକାଶ କ୍ଷେତ୍ରରେ ଭାରତର ଅବଦାନକୁ ପ୍ରଶଂସା କରିଥିଲେ ।
ଏହି ବୈଠକ ଉଭୟ ଦେଶ ତଥା ବ୍ୟାପକ ଗ୍ଲୋବାଲ୍ ସାଉଥ୍ ଅଞ୍ଚଳରେ ଶାନ୍ତି, ସମୃଦ୍ଧି ଓ ବିକାଶରେ ଯୋଗଦାନ ଦେବା ଲକ୍ଷ୍ୟରେ ଏକ ସୁଦୃଢ଼ ଓ ଭବିଷ୍ୟତମୁଖୀ ଭାଗୀଦାରୀ ଗଠନ କରିବା ଦିଗରେ ଭାରତ ଓ ନାଇଜେରିଆର ମିଳିତ ପ୍ରତିବଦ୍ଧତାକୁ ପୁନଃ ନିଶ୍ଚିତ କରିଥିଲା ।