ସୁବର୍ଣ୍ଣପୁର, (ରାଜ କିଶୋର ତ୍ରିପାଠୀ) : ଜାତୀୟ ଯୁବ ଉତ୍ସବ ୨୦୨୬ ପାଳନ ପରିପ୍ରେକ୍ଷୀରେ ଜିଲ୍ଲା ସ୍ତରରୁ ରାଜ୍ୟ ସ୍ତରକୁ ପ୍ରତିଯୋଗୀ ପଠାଇବା ନିମନ୍ତେ ଜିଲ୍ଲାପାଳଙ୍କ ସମ୍ମିଳନୀ କକ୍ଷ ଠାରେ ଅତିରିକ୍ତ ଜିଲ୍ଲାପାଳ(ସାଧାରଣ) ଅଞ୍ଜଳିନା ପ୍ରଧାନଙ୍କ ପୌରାହିତ୍ୟରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ଜିଲ୍ଲାସ୍ତରୀୟ ପ୍ରତିଯୋଗିତା ଆସନ୍ତା ଡ଼ିସେମ୍ବର ୪ରେ ଆୟୋଜନ କରିବା ପାଇଁ ନିଷ୍ପତ୍ତି ନିଆଯାଇଛି । ପ୍ରତିଯୋଗିତାରେ ଭାଗ ନେବା ପାଇଁ ପ୍ରତିଯୋଗୀ ଉକ୍ତ ଦିନ ସକାଳ ୮ଟାରୁ ୧୦ ଘଟିକା ମଧ୍ୟରେ ନିଜର ନାମ ପଞ୍ଜିକରଣ କରାଇପାରିବେ । ପ୍ରତିଯୋଗିତାରେ ଅଂଶ ଗ୍ରହଣ ପାଇଁ ଆବଶ୍ୟକୀୟ ବୟସ ୧୫ରୁ ୨୯ ବର୍ଷ ହୋଇଥିବା ବେଳେ ବ୍ୟକ୍ତିଗତ ତଥା ଦଳଗତ ବର୍ଗରେ ବିଭିନ୍ନ ୭ ଗୋଟି ପ୍ରତିଯୋଗିତା ଆୟୋଜିତ କରାଯିବ । ପ୍ରତିଯୋଗିତା ବର୍ଗରେ ଦଳଗତ ଲୋକନୃତ୍ୟ ୬ରୁ ୧୦ ଜଣ (୩ ଜଣ ସହାୟକ)ଙ୍କ ସହ, ସେହିପରି ଦଳଗତ ଲୋକ ସଙ୍ଗୀତ ବର୍ଗରେ ୬ରୁ ୧୦ ଜଣ (୩ ଜଣ ସହାୟକ), ବ୍ୟକ୍ତିଗତ ବର୍ଗ ଚିତ୍ରକଳାରେ ୧ ଜଣ, ଔପଚାରିକ ବକ୍ତୃତାରେ ୧ ଜଣ (ଓଡିଆ/ ହିନ୍ଦୀ /ଇଂରାଜୀ ), ପଦ୍ୟ ଲିଖନ ପ୍ରତିଯୋଗିତାରେ ୧ ଜଣ (ଓଡିଆ/ ହିନ୍ଦୀ / ଇଂରାଜୀ) ନିମନ୍ତେ ଅଂଶ ଗ୍ରହଣ କରିପାରିବେ । ପୁନଶ୍ଚ ଆୟୋଜିତ ବିଜ୍ଞାନ ମେଳା ପ୍ରତିଯୋଗିତା ନିମନ୍ତେ ସରକାରୀ ତଥା ବେସରକାରୀ ଶିକ୍ଷାନୁଷ୍ଠାନ ଉଭୟରୁ ଅଂଶ ଗ୍ରହଣର ସୁଯୋଗ ରହିଥିବା ବେଳେ ଗଳ୍ପ ଲିଖନ ପ୍ରତିଯୋଗିତା ବ୍ୟକ୍ତିଗତ ବର୍ଗ ନିମନ୍ତେ କେବଳ ୧ ଜଣ ପ୍ରତିଯୋଗୀ ଭାଗ ନେଇପାରିବେ । ପ୍ରତିଯୋଗୀ ନିଜର ବୟସ ପ୍ରମାଣ ନିମନ୍ତେ ସାଙ୍ଗରେ ଆଧାର କାର୍ଡ ଆଣିବେ । ଯୋଗ୍ୟ ପ୍ରତିଯୋଗୀ ବାଛିବା ନିମନ୍ତେ ଜିଲ୍ଲା ସ୍ତରୀୟ ପ୍ରତିଯୋଗିତା ଜିଲ୍ଲା ପ୍ରଶାସନ, ସୁବର୍ଣ୍ଣପୁର ଦ୍ୱାରା ଜିଲ୍ଲା ସଂସ୍କୃତି ଭବନ, ସୁବର୍ଣ୍ଣପୁର ଠାରେ ଆୟୋଜନ କରାଯିବ । ଅତ୍ୟଧିକ ବିବରଣୀ ତଥା ଆବଶ୍ୟକ ସୂଚନା ପାଇଁ ଜିଲ୍ଲା କ୍ରୀଡା କାର୍ଯ୍ୟାଳୟ ଏବଂ ଜିଲ୍ଲା ସଂସ୍କୃତି କାର୍ଯ୍ୟାଳୟ ସୁବର୍ଣ୍ଣପୁରକୁ ଯୋଗାଯୋଗ କରିବାକୁ ଜିଲ୍ଲାପ୍ରଶାସନ ତରଫରୁ ଅନୁରୋଧ କରାଯାଇଛି ।
Prev Post