ନବରଙ୍ଗପୁର : ଚାଷ ଟଙ୍କାକୁ କେନ୍ଦ୍ର କରି ପୁଅକୁ ହତ୍ୟା କଲା ବାପା । ଏଭଳି ଅଭାବନୀୟ ଘଟଣା ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ ପାପଡ଼ାହାଣ୍ଡି ଥାନା ଅନ୍ତର୍ଗତ ନୀଳଗୁଣ୍ଡି ଗାଁରେ ଘଟିଛି । ସୂଚନା ଅନୁସାରେ, ନୀଳଗୁଣ୍ଡି ଗ୍ରାମର ସଲମାନ ଖୁରା ଓ ତାଙ୍କ ବାପା ନବୀନ ଖୁରା ମଙ୍ଗଳବାର ସନ୍ଧ୍ୟାରେ ଚାଷ କାମ ସଂପର୍କରେ ଆଲୋଚନା କରୁଥିଲେ । ଏହି ସମୟରେ ଚାଷ ପାଇଁ ଟଙ୍କାକୁ କେନ୍ଦ୍ର କରି ଦୁହିଁଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଉତ୍କ୍ଷିପ୍ତ ହୋଇ ବାପା ନବୀନ ଖୁରା ଛୁରିରେ ସଲମାନଙ୍କୁ ଭୁସି ଦେବାରୁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା । ପାପଡ଼ାହାଣ୍ଡି ପୁଲିସ ଖବର ପାଇ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହ ନବୀନଙ୍କୁ ଗିରଫ କରିଥିଲା । ଏନେଇ ସଲମାନଙ୍କ ଭାଇ ଅମିଲାଲ ଖୁରା ପାପଡ଼ାହାଣ୍ଡି ଥାନାରେ ଏତଲା ଦେବାରୁ ପୁଲିସ ଏକ ହତ୍ୟା ମାମଲା ରୁଜୁ କରି ଶବ ବ୍ୟବଚ୍ଛେଦ କରିଥିଲା ।