ପଦ୍ମପୁର, (ନିରୋଜ କୁମାର ପାଣୀ) : ବାଣିଜ୍ୟ ବିଭାଗର ନବାଗତ ଛାତ୍ରଛାତ୍ରୀମାନଙ୍କୁ ସ୍ୱାଗତ କରିବା ପାଇଁ ଅଞ୍ଚଳ ମହାବିଦ୍ୟାଳୟ କନ୍ଫରେନ୍ସ କୋଠରିରେ ଏକ ସମ୍ବର୍ଦ୍ଧନା ଉତ୍ସବ ଅଧ୍ୟକ୍ଷ ଡ଼. ଲଲାତେନ୍ଦୁ ନାୟକଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି । ଡ଼. ନାୟକ ଛାତ୍ରଛାତ୍ରୀଙ୍କୁ ମୂଲ୍ୟଭିତ୍ତିକ ଶିକ୍ଷାକୁ ପାଥେୟ କରିବା ପାଇଁ ମାର୍ଗଦର୍ଶନ କରିଥିଲେ । ବିଭାଗୀୟ ମୁଖ୍ୟ ନବକୃଷ୍ଣ ମିଶ୍ର ସ୍ୱାଗତ ସମ୍ବର୍ଦ୍ଧନା ଜ୍ଞାପନ କରିବା ସହ ଛାତ୍ରଛାତ୍ରୀମାନଙ୍କ ନିମନ୍ତେ ବାଣିଜ୍ୟ ବିଭାଗର ଏକ ସ୍ୱତନ୍ତ୍ର ଲାଇବ୍ରେରୀ ଓ ପଠନ କୋଠରିର ବ୍ୟବସ୍ଥା ଆଜିଠୁ ଆରମ୍ଭ କରାଯାଇଥିବା ସୂଚନା ଦେଇଥିଲେ । ଏହି ସଭାରେ ଅର୍ଥନୀତି ବିଭାଗର ମୁଖ୍ୟ ପ୍ରାଧ୍ୟାପକ ଡ଼.ବିରଞ୍ଚି ସାହୁ, ଓଡ଼ିଆ ବିଭାଗର ବରିଷ୍ଠ ଅଧ୍ୟାପକ ଡ଼.ସରୋଜ କୁମାର ନାଏକ, କମ୍ପ୍ୟୁଟର ବିଭାଗର ମୁଖ୍ୟ ମିଥୁନ ମେହେର, ବାଣିଜ୍ୟ ବିଭାଗ ଅଧ୍ୟାପକ ବ୍ରଜ କୁମ୍ଭାର, ଦେବାଶିଷ ରାଉତ ଓ ଅଧ୍ୟାପିକା ନିଖତ ଅଞ୍ଜୁମ ଅତିଥି ଭାବେ ଯୋଗଦାନ କରି ନିଜ ନିଜ ବକ୍ତବ୍ୟ ରଖିଥିଲେ । ଉକ୍ତ ଉତ୍ସବରେ ଶତାଧିକ ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧନା ଦିଆ ଯାଇଥିବା ସହ ସେମାନେ ନିଜ ପ୍ରତିଭା ପ୍ରଦର୍ଶନ କରିଥିଲେ । ସମସ୍ତ କାର୍ଯ୍ୟକ୍ରମକୁ ତୃତୀୟ ବର୍ଷ ଛାତ୍ର ଆଦେଶ ଶର୍ମା ଓ ଓମକାର ହୋତା ପରିଚାଳନା କରିଥିବା ବେଳେ ଆଦର୍ଶ ସରାଫ, ମୁକେଶ ପାଣ୍ଡେ, ଏମ.ଡି. ଇମ୍ରାନ, ନୀଳାମ୍ବର ସାହୁ, ମାମିନା ବିଶି, ମନୀଷା ବାରିକ, ଯାଜ୍ଞସେନି ଦାଶ, ତୁଷାର ଅଗ୍ରୱାଲ ଓ ମୋଇନ ଶେଖ ସହଯୋଗ କରିଥିଲେ । ପରିଶେଷରେ ବୀର ଶର୍ମା ଧନ୍ୟବାଦ ଅର୍ପଣ କରିଥିଲେ ।