ବଲାଙ୍ଗିର, (କେପିଏନ୍ଏସ୍) : ମଣିଷ ସଭ୍ୟତାକୁ ବିଜ୍ଞାନର ଅବଦାନ ଅତୁଳନୀୟ, ଏହା ମଣିଷକୁ କାର୍ଯ୍ୟକ୍ଷମ ଓ ଉତ୍ପାଦନଶୀଳ କରାଇଥାଏ । ବିଜ୍ଞାନ ମଣିଷକୁ ଅନୁସନ୍ଧିସ୍ତୁ କରେ । ସାମ୍ପ୍ରତିକ ପରିସ୍ଥିତିରେ ମଣିଷର ଦୈନନ୍ଦିନ ଜୀବନରେ ବିଜ୍ଞାନର ଭୂମିକା ରହିଛି । ଶକ୍ତି ସଙ୍କଟ ସୃଷ୍ଟି ହେଲା ପରେ ଆଣବିକ ଶକ୍ତିର ଏକ ପ୍ରମୁଖ ବିକଳ୍ପ ଉତ୍ସବ ଭାବରେ ବ୍ୟବହୃତ ହେଉଛି । ଆଣବିକ ଶକ୍ତିର ଏହି ଗୁରୁତ୍ୱ ଓ ଅବଦାନକୁ ସାଧାରଣ ମଣିଷ ଉପଲବ୍ଧି କରିବାର ଉଦ୍ଦେଶ୍ୟ ନେଇ ଆଜି ସେଞ୍ଚୁରିଅନ ବିଦ୍ୟାଳୟ ପରିସରରେ ସେଞ୍ଚୁରିନ ବିଶ୍ୱବିଦ୍ୟାଳୟ, ପଦାର୍ଥ ବିଜ୍ଞାନ ଅନୁଷ୍ଠାନ ଭୁବନେଶ୍ୱର (ଯାହାକି ଭାରତର ଏକ ମାତ୍ର ପଦାର୍ଥ ବିଜ୍ଞାନର ଗବେଷଣା ଅନୁଷ୍ଠାନ ଅଟେ ) ଓ ଭାରତୀୟ ଆଣବିକ ରାସାୟନବିତ ମାନଙ୍କ ସଙ୍ଘର ମିଳିତ ଆନୁକୂଲ୍ୟରେ ଏକ ଅଭିନବ କର୍ମଶାଳା ଅନୁଷ୍ଠିତ ହୋଇଯାଇଛି । ଉତ୍ସବରେ ମୁଖ୍ୟ ଅତିଥି ଭାବେ ପଦାର୍ଥ ବିଜ୍ଞାନ ଅନୁଷ୍ଠାନ ଭୁବନେଶ୍ୱରର ନିର୍ଦେଶକ ପ୍ରଫେସର କେ. କେ. ନନ୍ଦ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବରେ ପଦାର୍ଥ ବିଜ୍ଞାନ ଅନୁଷ୍ଠାନର ରେଜିଷ୍ଟାର ପ୍ରଫେସର ପି.କେ. ସାହୁ ଯୋଗ ଦେଇଥିଲେ । ମୁଖ୍ୟବକ୍ତା ଭାବରେ ଡ଼. ଏସ୍ଏନ୍. ଷଡ଼ଙ୍ଗୀ ଯୋଗଦାନ କରିଥିଲେ । ମୁଖ୍ୟ ଅତିଥି, ସମ୍ମାନିତ ଅତିଥି ଓ ମୁଖ୍ୟବକ୍ତା ଦୈନନ୍ଦିନ ଜୀବନରେ ବିଜ୍ଞାନର ଆବଶ୍ୟକତା, ସାମ୍ପ୍ରତିକ ପରିସ୍ଥିତିରେ ଆଣବିକ ଶକ୍ତିର ଆବଶ୍ୟକତା ଓ ତାର ପ୍ରୟୋଗ ଉପରେ ଆଲୋକପାତ କରିଥିଲେ । କାର୍ଯ୍ୟକ୍ରମଟିରେ ଅନୁଷ୍ଠାନର ଆଞ୍ଚଳିକ ନିର୍ଦେଶକ ପ୍ରଦୀପ ଷଡ଼ଙ୍ଗୀ ଉପସ୍ଥିତ ରହିଥିଲେ ଏବଂ ତାଙ୍କର ପ୍ରତ୍ୟକ୍ଷ ତତ୍ତ୍ୱବଧାନରେ କାର୍ଯ୍ୟକ୍ରମଟି ସମ୍ପାଦିତ ହୋଇଥଲା । ଅନୁଷ୍ଠାନର ଆଞ୍ଚଳିକ ନିର୍ଦେଶକ ପ୍ରଦୀପ ଷଡ଼ଙ୍ଗୀ ଉତ୍ସବର ଉଦ୍ଘାଟନ କରିଥିଲେ । କାର୍ଯ୍ୟକ୍ରମରେ ଜେ.ଆଇ.ଟି.ଏମ୍ ଯୁକ୍ତ ଦୁଇ ବିଜ୍ଞାନର ଅଧ୍ୟକ୍ଷ ଅନଙ୍ଗ ଉଦୟ ନାଏକ ଏବଂ ଉପାଧ୍ୟକ୍ଷା ଅଙ୍କିତା ଶୁଭ୍ରସ୍ମିତା ଗଡ଼ତ୍ୟା ଉପସ୍ଥିତ ରହି ଛାତ୍ରଛାତ୍ରୀଙ୍କର ଉଚିତ୍ ମାର୍ଗଦର୍ଶନ କରିଥିଲେ । ଉତ୍ସବରେ ବିଶ୍ୱବିଦ୍ୟାଳୟର ଫର୍ମାସୀ ବିଭାଗର ଅଧ୍ୟକ୍ଷ ପ୍ରଫୁଲ୍ଲ ଚନ୍ଦ୍ର ସାହୁ, ବି.ଏସ୍.ସି ବିଭାଗର ଅଧ୍ୟକ୍ଷ ସୋମନାଥ ଷଡ଼ଙ୍ଗୀ ଉପସ୍ଥିତ ରହି କାର୍ଯ୍ୟକ୍ରମଟିର ସଫଳ ପରିଚାଳନା କରିଥିଲେ । କାର୍ଯ୍ୟକ୍ରମ ଶେଷରେ ବିଦ୍ୟାଳୟର ଛାତ୍ରଛାତ୍ରୀମାନଙ୍କ ସହିତ ସମ୍ମାନିତ ଅତିଥିମାନଙ୍କର ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା. ଏହି କାର୍ଯ୍ୟକ୍ରମରେ ବିଶ୍ୱବିଦ୍ୟାଳୟର ଏସ.ସି, ଏମ୍ଏସ୍ସି, ଫର୍ମାସୀ ଓ ବିଦ୍ୟାଳୟର ଛାତ୍ରଛାତ୍ରୀମାନେ ଅନେକ ନୂତନ ଓ ଅଭିନବ ବିଷୟରେ ତଥ୍ୟ ଓ ସୂଚନା ପାଇ ଆନନ୍ଦିତ ହୋଇଥିଲେ । ବିଜ୍ଞାନର ଅଭିନବ ପରୀକ୍ଷଣ ଗୁଡିକ ଅତ୍ୟନ୍ତ ଆକର୍ଷଣୀୟ ଓ ସୂଚନା ପ୍ରଦାୟକ ଥିଲା । ଅନୁଷ୍ଠାନର ଏପରି ଅଭିନବ ପ୍ରୟାସ ବାସ୍ତବରେ ସ୍ୱାଗତଯୋଗ୍ୟ ଓ ପ୍ରଶଂସାଯୋଗ୍ୟ ହୋଇପାରିଛି । ଏହି ଆଲୋଚନାଚକ୍ର ବର୍ତ୍ତମାନ ସହରରେ ଏକ ଚର୍ଚ୍ଚାର ବିଷୟ ପାଲଟିଛି । ବାସ୍ତବରେ ଅନୁଷ୍ଠାନର ଏହି ପଦକ୍ଷେପ ସ୍ୱାଗତଯୋଗ୍ୟ ଅଟେ ।