• ଆନ୍ଦୋଳନକୁ ଓହ୍ଲାଇଲେ ଟ୍ରକ ମାଲିିକ ସଂଘ
• ମିଳୁନି କାମ ଧନ୍ଦା : ଫାଇନାନ୍ସ ସୁଜିବେ କେମିତି ?
ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଛତ୍ରପୁର ଉପକଣ୍ଠ ମାଟିଖାଲ ଠାରେ ଅବସ୍ଥାପିତ ଭାରତ ସରକାରଙ୍କ ପ୍ରତିଷ୍ଠାନ ଆଇଆରଇଏଲ କମ୍ପାନୀ ପରିସରରେ କଳାବାଲି ପରିବହନକୁ ନେଇ ପୁଣି ବିବାଦ ଦେଖାଦେଇଛି । ସ୍ଥାନୀୟ ଅଂଚଳର ଟ୍ରକ ମାଲିକମାନଙ୍କୁ ଏହି କାର୍ଯ୍ୟରେ ସାମିଲ ନ କରାଯାଇ ଅନ୍ୟ ଅଂଚଳର ଟ୍ରକ ମାଲିକମାନଙ୍କୁ ପରିବହନ କାର୍ଯ୍ୟରେ ନିୟୋଜିତ କରାଯାଉଛି । ଏନେଇ ସ୍ଥାନୀୟ ଟ୍ରକ ମାଲିକମାନେ ତଥା ଗୋପାଳପୁର ପୋର୍ଟ ଟ୍ରକ ମାଲିକ ସଂଘ ପକ୍ଷରୁ ବାରମ୍ବାର ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନଙ୍କ ନିକଟରେ ଗୁହାରୀ ଜଣାଇଥିଲେ ସୁଦ୍ଧା ଏହାର କୌଣସି କାର୍ଯ୍ୟକାରୀ ହୋଇନାହିଁ ବୋଲି ଅଭିଯୋଗ ହୋଇଛି । ଯାହା ଫଳରେ ସେମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ମାଲିକମାନେ ଟ୍ରକ ଗୁଡିକୁ କିଣି ଖାଲିରେ ପକାଇ ରଖିବା ଫଳରେ ସେମାନେ ମାସିକ କିସ୍ତି ବାନ୍ଧିବାରେ ଅସମର୍ଥ ହେଉଛନ୍ତି ଏବଂ ସେମାନଙ୍କର ପରିବାର ପ୍ରତିପୋଷଣ କରିବାରେ ମଧ୍ୟ ବାଧା ଉପୁଜିଛି । ଆଇଆରଇଏଲ କମ୍ପାନୀ ପକ୍ଷରୁ କଳାବାଲି ପରିବହନ ନିମନ୍ତେ ସେମାନଙ୍କୁ ଲୋଡ୍ ମିଳୁନଥିବାରୁ ଏହାକୁ ବିରୋଧ କରି ସେମାନେ ଗତ ୧୭ ତାରିଖରେ ଆନ୍ଦୋଳନକୁ ଓହ୍ଲାଇ ଥିଲେ । କିଛି ଘଣ୍ଟା ନିମନ୍ତେ କଳାବାଲି ପରିବହନ ନିମନ୍ତେ ନିୟୋଜିତ ହୋଇଥିବା ଅନ୍ୟ ଟ୍ରକ ମାଲିକ ସଂଘ ଗାଡି ଗୁଡିକ ଚଳାଚଳ ବନ୍ଦ କରିବା ନିମନ୍ତେ ରାସ୍ତା ମଧ୍ୟ ଅବରୋଧ କରାଯାଇଥିଲେ । ଏନେଇ ସ୍ଥାନୀୟ ଟ୍ରକ ମାଲିକ ସଂଘ ଓ ଅନ୍ୟ ଟ୍ରକ ମାଲିକ ସଂଘ ମଧ୍ୟରେ ଉତ୍ତେଜନା ହେବା ସହ ଉଭୟ ସଂଘ ମଧ୍ୟରେ ହାତାହାତି ହୋଇଥିଲା । ଏ ସଂକ୍ରାନ୍ତରେ ଚମାଖଣ୍ଡି ଥାନାରେ ମଧ୍ୟ ଦୁଇଟି ଏତଲା ଦାୟର ହୋଇଥିଲା । ପୋଲିସ ପକ୍ଷରୁ ଉପଯୁକ୍ତ ତଦନ୍ତ ନ କରି ମିଥ୍ୟା ମକଦ୍ଦମା ରୁଜୁ କରି ଗୋପାଳପୁର ପୋର୍ଟ ଟ୍ରକ ମାଲିକ ସଂଘର ୪ଜଣ ସଦସ୍ୟମାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ ବୋଲି ମଧ୍ୟ ସେମାନେ ଅଭିଯୋଗ କରିଛନ୍ତି ।
ତେବେ ଏହାର ପୁନରାବୃତ୍ତି ଘଟିବାରୁ ପୁଣି ଗୋପାଳପୁର ପୋର୍ଟ ମାଲିକ ସଂଘର କର୍ମକର୍ତ୍ତାମାନେ ଏହାକୁ ବିରୋଧ କରିଛନ୍ତି । ଏନେଇ ଶୁକ୍ରବାର ପୁଣି ଗୋପାଳପୁର ପୋର୍ଟ ମାଲିକ ସଂଘର ୪ ଜଣ ସଦସ୍ୟଙ୍କୁ ଖାଲି ଖାଲିରେ ପାଲିସ ଉଠାଇ ନେବା ସହ ସେମାନଙ୍କୁ ପୂର୍ବ ନିଷ୍ପତ୍ତି ଅନୁଯାୟୀ ଆଇଆରଆଇ କମ୍ପାନୀରୁ କିଛି ଟ୍ରକଙ୍କୁ ପରିବହନ ନିମନ୍ତେ ଦେବା ପାଇଁ ଦୁଇ ଟ୍ରକ ସଂଘ ମଧ୍ୟରେ ନିଷ୍ପତ୍ତି ହୋଇଥିଲେ ମଧ୍ୟ ତାହାର କାର୍ଯ୍ୟକାରୀ କରାଯାଇ ନଥିବାରୁ ଏହାର ପ୍ରତିବାଦରେ ଆଜି ସେମାନେ ପୁଣି ଆନ୍ଦୋଳନକୁ ଓହ୍ଲାଇବା ସହ କିଛି ଗାଡିକୁ ମଧ୍ୟ ଅଟକ ରଖିଥିଲେ । ଏହାର ସୂଚନା ପାଇ ଚମାଖଣ୍ଡି ଥାନା ଅଧିକାରୀ ସିତାଂଶୁ ଶେଖର ମାନ୍ଧାତା, ଛତ୍ରପୁର ଥାନାର ସବ୍ ଇନିସ୍ପେକ୍ଟର ସିଲୁ ଧଳ ଏବଂ କିଛି ପୋଲିସ କର୍ମଚାରୀ ଘଟଣା ସ୍ଥଳରେ ପହଂଚି ସେଠାରେ ଆନ୍ଦୋଳନରତ ଟ୍ରକ ମାଲିକମାନଙ୍କୁ ବୁଝାସୁଝା କରିଥିଲେ ମଧ୍ୟ କୌଣସି ସମାଧାନ ହୋଇପାରିନଥିଲା । ସେମାନେ କହିଥିଲେ ଯେ, ଆମେ ଲକ୍ଷ ଲକ୍ଷ ଟଙ୍କା ଗାଡି କିଣିଛୁ ମାତ୍ର କାମ ନଥିବାରୁ ସେମାନଙ୍କ ଫାଇନାନ୍ସ ବାନ୍ଧିବାରେ ଅସମର୍ଥ ହେଉଛୁ । ଆମକୁ ଜିଲ୍ଲା ପ୍ରଶାସନ ଜାଣି ଶୁଣି ଅବହେଳା କରୁଛନ୍ତି । ଆମକୁ କାମ ଯୋଗାଇବା ନିମନ୍ତେ ସେମାନେ ବାରମ୍ବାର ପ୍ରଶାସନକୁ ଗୁହାରୀ କରିଥିଲେ ମଧ୍ୟ ପ୍ରଶାସନ ମିଥ୍ୟା ପ୍ରତିଶୃତି ଦେଇ ସେମାନଙ୍କୁ ଭଣ୍ଡାଇ ଦେଉଥିବା ଅଭିଯୋଗ କରିଛନ୍ତି । ତୁରନ୍ତ ଏହାର ସ୍ଥାୟୀ ସମାଧାନ କରିବା ନିମନ୍ତେ ଗୋପାଳପୁର ପୋର୍ଟ ଟ୍ରକ ମାଲିକ ସଂଘ ପକ୍ଷରୁ ଦାବୀ କରାଯାଇଛି । ଏହା ସହିତ ପୋଲିସ ଆଜି ଉଠାଇଥିବା ୪ଜଣ ଟ୍ରକ ମାଲିକଙ୍କୁ ତୁରନ୍ତ ଛାଡିବା ନିମନ୍ତେ ମଧ୍ୟ ସେମାନେ ଦାବୀ କରିଥିଲେ । ନଚେତ୍ ଆଗାମୀ ଦିନରେ ବଡ ଆନ୍ଦୋଳନ କରାଯିବ ବୋଲି ଗୋପାଳପୁର ପୋର୍ଟ ଟ୍ରକ ମାଲିକ ସଂଘ ପକ୍ଷରୁ ଚେତାବନୀ ଦିଆଯାଇଛି ।