ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଗଞ୍ଜାମ ଜିଲ୍ଲା ମହକୁମା ଛତ୍ରପୁର ଶାନ୍ତି ଅନୁଭୂତି କେନ୍ଦ୍ର ତଥା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟ ସଂଗଠନ ଶାଖା ଆନୁକୂଲ୍ୟରେ ଦାଦିଜୀ ବ୍ରହ୍ମାକୁମାରୀ ହୃଦୟ ମୋହିନୀଙ୍କ ପ୍ରଥମ ଶ୍ରାଦ୍ଧବାର୍ଷିକୀ ଅବସରରେ ବିଧିବଦ୍ଧ ସ୍ୱରୂପ ଭକ୍ତିପୂତ ଭାବେ ସ୍ମୃତିଚାରଣ କରାଯାଇଛି । ବ୍ରହ୍ମା ବାବାଙ୍କ ପରେ ଉତ୍ତର ଦାୟୀ ଭାବେ ଦାଦିଜୀ ମୁଖ୍ୟ ପ୍ରଶାସିକା ଭାବେ ଦାୟିତ୍ୱ ଗ୍ରହଣ କରି ବାବାଙ୍କ ପ୍ରଚଳିତ ମୁରଲୀ ପାଠର ପ୍ରଚାରକ ଥିଲେ । ସେ ୧୯୨୭ରେ ସିନ୍ଧୁପ୍ରଦେଶ ଅନ୍ତର୍ଗତ ହାଇଦ୍ରାବାଦ ସହରରେ ଜନ୍ମଗ୍ରହଣ କରି ବାଲ୍ୟ ସମୟ ଆଠ ବର୍ଷ ବୟସରୁ ବ୍ରହ୍ମାକୁମାରୀ ସଂସ୍ଥାରେ ବାଲ୍ୟବ୍ରହ୍ମଚାରୀ ଭାବେ ନିୟୋଜିତ ହୋଇଥିଲେ । ପରବର୍ତ୍ତୀ ପର୍ଯ୍ୟାୟରେ ଭାରତ ପାକିସ୍ଥାନ ବିଭାଜନ ପରେ ସେ ରାଜସ୍ଥାନରେ ପ୍ରତିଷ୍ଠିତ ମାଉଣ୍ଟଆବୁରେ ରହି ଅବସ୍ଥାନ କରି ପ୍ରଜାପିତା ବ୍ରହ୍ମାକୁମାରୀ ସଂସ୍ଥାନରେ ଭଗବତ ସେବାରେ ବ୍ରତୀ ହୋଇ ଦେଶର ତଥା ପୃଥିବୀରେ ଶାନ୍ତିପ୍ରତିଷ୍ଠା ଦିଗରେ ଅହରହ ସଂଗ୍ରାମ ଜାରୀ ରଖିଥିଲେ । ଗତ ୨୦୨୧ ମାର୍ଚ୍ଚ ୧୧ ତାରିଖରେ ସେ ଇହଲୀଳା ସମ୍ୱରଣ କରିଥିଲେ । ତାଙ୍କରି ଉଦ୍ଦେଶ୍ୟରେ ଆଜି ଶାଖା ସଂଚାଳିକା ବ୍ରହ୍ମାକୁମାରୀ ବିଜୟ ଲକ୍ଷ୍ମୀ ଏହି କାର୍ଯ୍ୟକ୍ରମ ସଂଯୋଜନା ଓ ପରିଚାଳନା କରିଥିଲେ । ବ୍ରହ୍ମାକୁମାର ଶାନ୍ତନୁ କୁମାର ପଟ୍ଟନାୟକ ମହୋଦୟ ଯୋଗଦେଇ ଏହି ସ୍ମୃତି ଦିବସର ମହତ୍ତ୍ଵ ପ୍ରତିପାଦନ କରିଥିଲେ ।