ବଲାଙ୍ଗିର, (ଦେବାଶିଷ ମିଶ୍ର) ବଲାଙ୍ଗୀର ଜିଲ୍ଲା ସଇଁତଲା ବ୍ଲକ ଆମ୍ବପାଲି ପଞ୍ଚାୟତ ଭେରୁଆଭଟ୍ଟା ଗ୍ରାମରେ ଦୁଇ ଶିଶୁ ଅନାଥ ହେବା ପରେ ତାଙ୍କ ଅଜା ଆଈ ବାଧ୍ୟ ହୋଇ ସେମାନଙ୍କୁ ଆଦରି ଥିଲେ । ଏହି ଖବର ଗଣମାଧ୍ୟମରେ ପ୍ରକାଶିତ ହେବା ପରେ ଏହି ଖବରକୁ ମନ୍ତ୍ରୀ ଟୁକୁନୀ ସାହୁ, ପୂର୍ବତନ ସାଂସଦ କଳିକେଶ ସିଂଦେଓ ଓ ବଲାଙ୍ଗିର ଜିଲ୍ଲାପାଳକୁ ଟ୍ୱିଟ୍ କରାଯାଇଥିଲା । ସାଂସଦ କଳିକେଶ ନାରାୟଣ ସିଂ ଦେଓଙ୍କୁ ଟ୍ୱିଟ କରିବା ପରେ ଜିଲ୍ଲା ବିଜୁ ଜନତା ଦଳ ଏକ ପ୍ରତିନିଧି ଦଳ ଆଜି ଉକ୍ତ ଗ୍ରାମକୁ ପହଂଚି ଅସହାୟ ପରିବାରଙ୍କୁ ଭେଟି ତାଙ୍କ ସମସ୍ୟା ଉପରେ ଆଲୋଚନା କରିଥିଲେ । ପରିବାରବର୍ଗଙ୍କୁ କିଛି ଆର୍ଥିକ ସାହାଯ୍ୟ ସହିତ ପନିପରିବା ଓ କିରାନା ସାମଗ୍ରୀ ପ୍ରଦାନ କରିଥିଲେ । ତେବେ ପୂର୍ବତନ ସାଂସଦ ଶ୍ରୀ ସିଂଦେଓ ବ୍ୟକ୍ତିଗତ ଭାବରେ ବଲାଙ୍ଗିର ଜିଲ୍ଲାପାଲ ଓ ଟିଟିଲାଗଡ଼ ଉପଜିଲାପାଳଙ୍କ ସହିତ ଏହି ଘଟଣା ସମ୍ବନ୍ଧରେ ଫୋନରେ କଥା ହୋଇ ତୁରନ୍ତ ପଦକ୍ଷେପ ନେବା ପାଇଁ ଆଲୋଚନା କରିବା ପ୍ରକାଶ କରିଥିବା ଦଳ କହିଛି । ଆଜିର ଏହି କାର୍ଯ୍ୟକ୍ରମରେ ଜିଲ୍ଲା ଆଇଟି ସଂଯୋଜକ ବିଭୁତି ଭୂଷଣ ମିଶ୍ର, ଯୁବ ବିଜେଡି ସମ୍ପାଦକ ଗୋବିନ୍ଦ ଶତପଥୀ, ବ୍ଲକ ଆଇ. ପି ଟିକେଶ୍ୱର ସାହୁ, ପୂର୍ବତନ ସରପଂଚ ରାଜକିଶୋର ବୁଡେ଼କ ଓ କିଶୋର ସାହୁ ପ୍ରମୁଖ ଉପସ୍ଥିତ ଥିଲେ । ସେହିପରି ଜିଲ୍ଲାପାଳ ଚଂଚଳ ରାଣା ଅସହାୟ ପରିବାର କିଭଲି ତାଙ୍କର ନ୍ୟାର୍ଯ୍ୟଦାବୀ ପାଇପାରିବେ ସେନେଇ ଏମାର୍ଜେନ୍ସି ବିଭାଗକୁ ନିର୍ଦ୍ଦେଶ କରିଥିବା କହିଛନ୍ତି । ପ୍ରକାଶ ଥାଉ ଯେ, ରବି ଚନ୍ଦ୍ର ସାହୁ, ତାଙ୍କ ସ୍ତ୍ରୀ ରେବତୀ ଓ ପୁଅ ଭୀମସେନ(୧୬), ସୁଜାତା(୧୫), ଭଗବତୀ (୧୪) ଓ ମାଳତୀ(୧୨) ଚାରି ପୁଅ ଝିଅଙ୍କୁ ନେଇ ସୁଖୀ ପରିବାର ଥିଲେ । ରବି ରୋଗଗ୍ରସ୍ତ ହୋଇ ମୃତ୍ୟୁବରଣ କରିଥିବା ପରେ ଚାରି ପୁଅ ଝିଅ ମାନଙ୍କୁ ଧରି ରେବତୀ ପରିବାରକୁ ପରିପୋଷଣ କରିଆସୁଥିଲେ । ଗତ ୨୦୨୦ ସେପ୍ଟେମ୍ବର ମାସରେ ରେବତୀ ଓ ପୁଅ ଭୀମସେନ ଚାଷ କ୍ଷେତରୁ ଫେରୁଥିବା ସମୟରେ ହଠାତ ବଜ୍ରାଘାତ ଘଟିଥିଲା । ଏଥିରେ ମା’ ରାବତୀଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା । ହେଲେ ଭୀମସେନ ଗୁରୁତର ଆହତ ହୋଇ ସଇଁତଲା ଡାକ୍ତରଖାନାରେ ପ୍ରାଥମିକ ଚିକିତ୍ସିତ ହେବା ପରେ ବଲାଙ୍ଗିର ଭୀମଭୋଇ ମେଡିକାଲ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା । ତାପରେ ଭୀମସେନ ସୁସ୍ଥ ହୋଇ ଘରକୁ ଫେରିଥିଲେ । ଏ ଖବର ଗଣମାଧ୍ୟମରେ ପ୍ରକାଶ ପାଇବା ପରେ ବଲାଙ୍ଗିର ପ୍ରଶାସନଙ୍କ ନିର୍ଦ୍ଦେଶରେ ଶିଶୁ ସୁରକ୍ଷା ଟିମ ପହଂଚି ୪ ଜଣ ଅସହାୟ ଶିଶୁଙ୍କୁ ଉଦ୍ଧାର କରିଥିଲେ । ପରେ ଅଜାଆଈ ୨ ଜଣ ଭଗବତୀ ଓ ମାଳତୀଙ୍କୁ ଛାଡିବା ପାଇଁ ରାଜି ହୋଇଥିଲେ । ଏବେ ଘରେ ଭୀମସେନ ଓ ଝିଅ ସୁଜାତା ରହିଛନ୍ତି । କିନ୍ତୁ ପଂଚାୟତ ତରଫରୁ ଚାରି ପୁଅ ଝିଅଙ୍କ ନାମରେ ମାତ୍ର ୨୦ କେଜି ଚାଉଳ ମିଳୁଥିବା ଜଣାପଡ଼ିଛି । ପରେ ପଂଚାୟତ କର୍ତ୍ତୃପକ୍ଷ ପହଂଚି ଅନ୍ତୋଦୟ ତାଲିକାରେ ସାମିଲ କରିବା ପାଇଁ ପ୍ରତିଶୃତି ଦେଇଥିଲେ ସୁଦ୍ଧା ଆଜି ପର୍ଯ୍ୟନ୍ତ ସେମାନଙ୍କୁ ପ୍ରଶାସନ ତରଫରୁ କୋଣସି ସରକାରୀ ଯୋଜନା ସାମିଲ କରାଯାଇନାହିଁ । ଏହା ସହିତ ତହସିଲଦାର ଅଫିସରୁ ମଧ୍ୟ ମାଆଙ୍କ ମୃତ୍ୟୁ ପରେ କୋଣସି ଆର୍ଥିକ ସହାୟତା ମିଳି ନଥିବା ପରିବାର ବର୍ଗ ଅଭିଯୋଗ କିରଛନ୍ତି । ବର୍ତମାନ ଦୁଇ ଅସହାୟ ଶିଶୁ ଅଜାଆଈଙ୍କ ଭରସାରେ ରହିଁଛନ୍ତି । ତେଣୁ ଜିଲ୍ଲା ପ୍ରଶାସନକୁ ତୁରନ୍ତ ନିରୀହ ଅନାଥ ଶିଶୁଙ୍କ ପାଇଁ ସରକାରୀ ଆବାସ ଯୋଜନା ସାଙ୍ଗକୁ ଆର୍ଥିକ ସହାୟତା ଦିଆଯିବା ପାଇଁ ଅଂଚଳବାସୀଙ୍କ ତରଫରୁ ଦାବୀ ପ୍ରକାଶ ପାଇଛି ।
