କନ୍ଧମାଳ, (ସୁରେନ୍ଦ୍ର କୁମାର ପାଣିଗ୍ରାହୀ) : ଗତ ଦୁଇ ଦିନ ହେଲା ୟୁକ୍ରେନ ଓ ଋଷିଆ ମଧ୍ୟରେ ଯୁଦ୍ଧ ଲାଗି ରହିଛି । ବୋମା ମାଡରେ ୟୁକ୍ରେନର ସେନା ଘାଟି, ସାମରିକ ସ୍ଥଳ ଆଦି ଧ୍ବଂସ ହେବା ସହ ଶତାଧିକ ଲୋକ ପ୍ରାଣ ହରାଇଲେଣି । ଏପଟେ ଉଚ୍ଚ ଶିକ୍ଷା ପାଇଁ ଓ ଚାକିରି କରୁଥିବା ୟୁକ୍ରେନର ବିଭିନ୍ନ ସହରରେ ଅନେକ ଓଡିଆ ଛାତ୍ରଛାତ୍ରୀ ଫଶି ରହିଛନ୍ତି । ଏପରି ସ୍ଥଳେ କନ୍ଧମାଳ ଜିଲା ଫୁଲବାଣୀ ସହରର ବ୍ରାହ୍ମଣ ସାହିରେ ରହୁଥିବା କୁମୁଦ ଚନ୍ଦ୍ର ମଲ୍ଲିକ ଓ ଦ୍ରୌପଦି କହଁରଙ୍କ ପୁଅ ଜଗଦୀପ୍ ମଲ୍ଲିକ ଜଣେ ଡାକ୍ତରୀ ପଢ଼ୁଆ ଛାତ୍ର । ୟୁକ୍ରେନର ସହର ଡିମ୍ପପ୍ରୋରେ ଫସି ରହିଛନ୍ତି । ଜଗଦୀପ୍ ମଲ୍ଲିକ ଡିମ୍ପପ୍ରୋ ପେଟ୍ରୋ ଭୋକ୍ସ ଷ୍ଟେଟ ମେଡିକାଲ କଲେଜର ଚତୁର୍ଥ ବର୍ଷ ଅଧୟନ କରୁଛନ୍ତି । ଗତ କାଲିଠାରୁ ବୋମା ବର୍ଷଣର ଶବ୍ଦ ଶୁଭୁଥିବାରୁ ଭୟ ଓ ଆଶଙ୍କାରେ ରହିଛନ୍ତି ସେ । ଏପଟେ ବାପା ମାଙ୍କ ଗୋଟିଏ ପୁଅ ଜଗଦୀପ । ପରିବାରର ଚିନ୍ତା କିପରି ସୁରକ୍ଷିତ ଭାବରେ ପୁଅ ପହଁଞ୍ଚିବ । ଜଗଦୀପ୍ ଚାରି ବର୍ଷ ହେଲା ସେଠାରେ ରହି ଡାକ୍ତରୀପାଠ ପଢୁଛନ୍ତି । ତେବେ ପରିସ୍ଥିତିକୁ ଦେଖି ନିକଟସ୍ଥ ଦୋକାନରୁ ସାଙ୍ଗମାନଙ୍କ ସହ କିଛି ଦିନର ସୌଦା କିଣି ଆଣିଛନ୍ତି । ତେବେ ପୁଅ ଭଲରେ ଅଛି ବୋଲି ପୁଅ ଜଗଦୀପ ବାପା ମା’ଙ୍କୁ ଭିଡିଓ କଲ୍ ଯୋଗେ କହିଛନ୍ତି । ଜଗଦୀପ୍ ଓ ସାଙ୍ଗମାନଙ୍କ ଭିତରେ ଏକ ଭୟର ବାତାବରଣ ଖେଳି ଯାଇଛି ବୋଲି ବାପା କହିଛନ୍ତି । ସୁରକ୍ଷିତ ଭାବେ ଜଗଦୀପ୍ ସହ ସମସ୍ତ ଭାରତୀୟ ଛାତ୍ରଙ୍କୁ ଫେରାଇ ଆଣିବା ପାଇଁ ରାଜ୍ୟ ତଥା କେନ୍ଦ୍ର ସରକାରଙ୍କୁ ଜଗଦୀପ୍ଙ୍କ ବାପା ଅବସରପ୍ରାପ୍ତ ପ୍ରଶାସନିକ ଅଧିକାରୀ, କୁମୁଦ ଚନ୍ଦ୍ର ମଲ୍ଲିକ ଓ ମା କ.ନୂଆଗାଁ ସି.ଡି.ପି.ଓ ଦ୍ରୌପଦୀ କହଁର ନିବେଦନ କରିଛନ୍ତି ।
