ରାଉରକେଲା, (ସସ୍ମିତା ପ୍ରଧାନ) : ଶ୍ରୀ ଶ୍ରୀ ରବିଶଙ୍କର ବିଦ୍ୟାମନ୍ଦିର ପରିଚାଳିତ ସେକ୍ଟର ୨୦ ଇସ୍ପାତ ଇଂରାଜୀ ମାଧ୍ୟମ ବିଦ୍ୟାଳୟ ଠାରେ ଆରଏସପି ପକ୍ଷରୁ ନିଆଁରୁ ସୁରକ୍ଷା ଏକ କର୍ମଶାଳା ବିଦ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି । ଅଗ୍ନି ନିର୍ବାପନ ଅପେକ୍ଷା ଅଗ୍ନି ନିବାରଣ ଶ୍ରେୟସ୍କର ଉକ୍ତିରୁ ସ୍ପଷ୍ଟ କରିବା ପାଇଁ ଆର୍ଏସ୍ପି ଅଗ୍ନି ବିଭାଗ ପକ୍ଷରୁ ଛାତ୍ରଛାତ୍ରୀଙ୍କ ପାଇଁ ଏକ ସଚେତନତାମୂଳକ କାର୍ଯ୍ୟକ୍ରମ କରାଯାଇଥିଲା । ଅକସ୍ମାତ ନିଆଁ ଲାଗିଗଲେ ସେଥିରୁ କିପରି ନିଜକୁ ସୁରକ୍ଷିତ ରଖିବେ ଓ ଅନ୍ୟକୁ କିପରି ସୁରକ୍ଷା ଦେଇପାରିବେ ତା’ର ବିଭିନ୍ନ କଳାକୌଶଳ ପ୍ରଦର୍ଶିତ କରାଯାଇଥିଲା । ଅଗ୍ନି ଦୁର୍ଘଟଣାରେ ତିନି ତାଲା ଛାତରୁ କିପରି ଆହତଙ୍କୁ ଉଦ୍ଧାର, ନିଆଁ ଲିଭାଇବାର କୌଶଳ ପ୍ରଦର୍ଶିତ କରିବା ସହ ଶିକ୍ଷୟିତ୍ରୀ ଶିକ୍ଷକ ଛାତ୍ରଛାତ୍ରୀମାନେ ନିଜେ ଏହାର ପ୍ରୟୋଗ ଶିଖିଥିଲେ । ବିଦ୍ୟାଳୟର ନିର୍ଦ୍ଦେଶକ ଡ. ଗିରିଜା ଶଙ୍କର ଦାସଙ୍କ ଅଧ୍ୟକ୍ଷତା, ଅଧ୍ୟକ୍ଷା ଡ. ଖୁସୁବୁ ଜ୍ୟୋତିଙ୍କ ଆବାହକତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ରାଉରକେଲା ଇସ୍ପାତ କାରଖାନା ଅଗ୍ନି ନିର୍ବାପକ ସଂସ୍ଥାର ମୁଖ୍ୟ ମହାପ୍ରବନ୍ଧକ ହୀରାଲାଲ ମହାପାତ୍ର, ମହାପ୍ରବନ୍ଧକ ପିଏସ୍ ଠାକରେ, ଡେପୁଟି ମ୍ୟାନେଜର ଶୁଭବ୍ରତ ସାହୁ, ଆସିଷ୍ଟାଣ୍ଟ ମ୍ୟାନେଜର ମୋହିତ ସିଂ, ଟିମ୍ ଲିଡର ଆର୍ସି ମହନ୍ତ ପ୍ରମୁଖ ଯୋଗଦେଇ ଅଗ୍ନି ବିତ୍ପାତରୁ ସୁରକ୍ଷା ସମ୍ପର୍କରେ ପ୍ରତ୍ୟକ୍ଷ କୌଶଳ ପ୍ରଦର୍ଶିତ କରାଇଥିଲେ । ଏହି କର୍ମଶାଳାରେ ବିଦ୍ୟାଳୟର ବରିଷ୍ଠ ଅଧିକାରୀ ସୁଚିନ୍ଦ୍ରମ ସେନଗୁପ୍ତ, ଯଶବିନ୍ଦର କୌର, ମୀନାକ୍ଷୀ ପାଢ଼ୀ, ଅମ୍ରିତ ନିଲମ, ମନପ୍ରିତ କୌର, ଶିବାନୀ, ମଞ୍ଜୁଲତା, ମଧୁମିତା, ସୁପ୍ରିୟା, ସିଦ୍ଧାର୍ଥ, ବିଶାଲ, ଧୀରଜ, ବନ୍ଦିତା, ପ୍ରଗତୀ ପ୍ରମୁଖ ଶିକ୍ଷକ ଶିକ୍ଷୟିତ୍ରୀମାନେ ଉପସ୍ଥିତ ରହି ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିଲେ । ଶେଷରେ ଅମ୍ରିତା ନିଲମ ଧନ୍ୟବାଦ ଅର୍ପଣ କରିଥିଲେ ।