ରାଉରକେଲା, (ସସ୍ମିତା ପ୍ରଧାନ) : ରାଉରକେଲା ଇସ୍ପାତ କାରଖାନାର ଆନୁକୂଲ୍ୟରେ ଏବଂ ଗୃହସ୍ଥୀ ଉଦ୍ୟୋଗ ପ୍ରାଇଭେଟ୍ ଲିମିଟେଡର ସହଯୋଗରେ ସ୍ପନ୍ଦନ, ରାଉରକେଲା ଦ୍ୱାରା ଆୟୋଜିତ ୨୦ତମ ଶିଶୁ ମହୋତ୍ସବ-୨୦୨୫ ରାଉରକେଲା ସିଭିକ ସେଣ୍ଟର ଠାରେ ସଫଳତାର ସହ ସମାପ୍ତ ହୋଇଛି । ନଭେମ୍ବର ୧୬ରୁ ୧୮ ପର୍ଯ୍ୟନ୍ତ ଅନୁଷ୍ଠିତ ଏହି ତିନିଦିନିଆ କାର୍ଯ୍ୟକ୍ରମରେ ସହରର ବିଭିନ୍ନ ପ୍ରାନ୍ତରୁ ଶିଶୁମାନେ ଉତ୍ସାହର ସହ ଅଂଶଗ୍ରହଣ କରିଥିଲେ । ଏହି କାର୍ଯ୍ୟକ୍ରମରେ ଗୃହସ୍ଥୀ ଉଦ୍ୟୋଗ ପ୍ରାଇଭେଟ୍ ଲିମିଟେଡର ନିର୍ଦ୍ଦେଶିକା ଶ୍ରୀମତୀ ମଞ୍ଜୁ ଦେବୀ ବାଗରିଆ, ପରିଚାଳନା ନିର୍ଦ୍ଦେଶକ ଗୋକୁଲ ଆନନ୍ଦ ବାଗରିଆ ଏବଂ ବିଧାୟକ ସାରଦା ନାୟକ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ । ସେମାନଙ୍କ ଉପସ୍ଥିତି ଏହି ଉତ୍ସବର ଗାରିମା ବୃଦ୍ଧି କରିବା ସହ ପିଲାମାନଙ୍କୁ ଅନୁପ୍ରାଣିତ କରିଥିଲା । ସ୍ପନ୍ଦନର ସାଧାରଣ ସମ୍ପାଦକ ଡକ୍ଟର ସମର ମୁଦାଲି ଆୟୋଜକ ଦଳର ନେତୃତ୍ୱ ନେଇଥିଲେ ଏବଂ ସମସ୍ତ କାର୍ଯ୍ୟକ୍ରମ ଓ ପ୍ରତିଯୋଗିତାର ସୁଚାରୁ ପରିଚାଳନା ନିଶ୍ଚିତ କରିଥିଲେ । ଉଦଯାପନୀ ଉତ୍ସବରେ ଶ୍ରୀମତୀ ମଞ୍ଜୁ ଦେବୀ ବାଗରିଆ, ଗୋକୁଲ ଆନନ୍ଦ ବାଗରିଆ ଏବଂ ବିଧାୟକ ସାରଦା ନାୟକ ମିଳିତ ଭାବେ ବିଭିନ୍ନ ପ୍ରତିଯୋଗିତାର କୃତି ପ୍ରତିଯୋଗୀମାନଙ୍କୁ ପଦକ, ଟ୍ରଫି ଏବଂ ପ୍ରମାଣପତ୍ର ପ୍ରଦାନ କରିଥିଲେ । ଏହା ଯୁବ ପ୍ରତିଭାମାନଙ୍କୁ ସେମାନଙ୍କର ଉତ୍କୃଷ୍ଟ ପ୍ରଦର୍ଶନ ପାଇଁ ଉତ୍ସାହିତ କରିଥିଲା । ଏକ ବିଶେଷ ମୁହୂର୍ତ୍ତରେ, ସହରର ସାଂସ୍କୃତିକ ଓ ସାମାଜିକ କ୍ଷେତ୍ରରେ ନିରନ୍ତର ସହଯୋଗ ଏବଂ ଉଲ୍ଲେଖନୀୟ ଅବଦାନ ପାଇଁ ଟିମ୍ ସ୍ପନ୍ଦନ, ରାଉରକେଲା ପକ୍ଷରୁ ଶ୍ରୀମତୀ ମଞ୍ଜୁ ଦେବୀ ବାଗରିଆଙ୍କୁ ସମ୍ବର୍ଦ୍ଧିତ କରାଯାଇଥିଲା । ଉପସ୍ଥିତ ଦର୍ଶକ ଓ ପ୍ରତିଯୋଗୀମାନଙ୍କ କରତାଳି ମଧ୍ୟରେ ସେ ଏହି ସମ୍ମାନ ଗ୍ରହଣ କରିଥିଲେ । ଏହି ଶିଶୁ ମହୋତ୍ସବ ପୁଣି ଥରେ ଯୁବ ଶିକ୍ଷାର୍ଥୀମାନଙ୍କ ସୃଜନଶୀଳତା, ସଂସ୍କୃତି ଏବଂ ଉତ୍ସାହକୁ ପାଳନ କରିବା ପାଇଁ ଏକ ଶ୍ରେଷ୍ଠ ମଞ୍ଚ ବୋଲି ପ୍ରମାଣିତ ହୋଇଛି ।