ବ୍ରିଟେନର ପ୍ରଧାନମନ୍ତ୍ରୀଙ୍କ ସହ ମିଳିତ ପ୍ରେସ ବିବୃତ୍ତି ସମୟରେ ପ୍ରଧାନମନ୍ତ୍ରୀଙ୍କ ପ୍ରେସ ବିବୃତ୍ତି

ମହାମହିମ ପ୍ରଧାନମନ୍ତ୍ରୀ ଷ୍ଟାରମର,
ଉଭୟ ଦେଶର ପ୍ରତିନିଧି,
ଗଣମାଧ୍ୟମର ବନ୍ଧୁ,
ନମସ୍କାର

ପ୍ରଧାନମନ୍ତ୍ରୀ କୀର ଷ୍ଟାରମରଙ୍କୁ ଆଜି ମୁମ୍ବାଇରେ ତାଙ୍କର ପ୍ରଥମ ଭାରତ ଗସ୍ତରେ ସ୍ୱାଗତ କରି ମୁଁ ଆନନ୍ଦିତ ।
ବନ୍ଧୁଗଣ,
ପ୍ରଧାନମନ୍ତ୍ରୀ ଷ୍ଟାରମରଙ୍କ ନେତୃତ୍ୱରେ, ଭାରତ-ୟୁକେ ସମ୍ପର୍କରେ ଉଲ୍ଲେଖନୀୟ ପ୍ରଗତି ହୋଇଛି । ଏହି ବର୍ଷ ଜୁଲାଇରେ ମୋର ୟୁକେ ଗସ୍ତ ସମୟରେ, ଆମେ ଐତିହାସିକ ବ୍ୟାପକ ଅର୍ଥନୈତିକ ଏବଂ ବାଣିଜ୍ୟ ଚୁକ୍ତି (ସିଇଟିଏ) ଚୁଡାନ୍ତ କରିଥିଲୁ । ଏହି ଚୁକ୍ତିନାମା ଉଭୟ ଦେଶ ମଧ୍ୟରେ ଆମଦାନୀ ଖର୍ଚ୍ଚ ହ୍ରାସ କରିବ, ଯୁବକମାନଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ, ବାଣିଜ୍ୟକୁ ବୃଦ୍ଧି କରିବ ଏବଂ ଆମର ଶିଳ୍ପ ଏବଂ ଗ୍ରାହକ ଉଭୟଙ୍କୁ ଲାଭ ଦେବ ।
ଚୁକ୍ତିନାମା ସ୍ୱାକ୍ଷରିତ ହେବାର ଅଳ୍ପ କିଛି ମାସ ପରେ ଆପଣଙ୍କର ଭାରତ ଗସ୍ତ ଏବଂ ଆପଣଙ୍କ ସହିତ ଆସିଥିବା ସବୁଠାରୁ ବଡ଼ ବ୍ୟବସାୟିକ ପ୍ରତିନିଧିମଣ୍ଡଳୀ, ଭାରତ-ୟୁକେ ସହଭାଗୀତାରେ ନୂତନ ଶକ୍ତି ଏବଂ ବ୍ୟାପକ ଦୃଷ୍ଟିକୋଣର ପ୍ରତୀକ ।
ବନ୍ଧୁଗଣ,
ଗତକାଲି, ଭାରତ ଏବଂ ୟୁକେ ମଧ୍ୟରେ ବ୍ୟବସାୟିକ ନେତାମାନଙ୍କର ସର୍ବବୃହତ ଶିଖର ସମ୍ମିଳନୀ ଅନୁଷ୍ଠିତ ହୋଇଥିଲା । ଆଜି, ଆମେ ଭାରତ-ୟୁକେ ସିଇଓ ଫୋରମ୍ ଏବଂ ଗ୍ଲୋବାଲ୍ ଫିନଟେକ୍ ଫେଷ୍ଟିଭାଲ୍କୁ ମଧ୍ୟ ସମ୍ବୋଧିତ କରିବୁ । ଏସବୁ ଭାରତ-ୟୁକେ ସହଯୋଗକୁ ଆହୁରି ମଜବୁତ କରିବା ପାଇଁ ବହୁମୂଲ୍ୟ ପରାମର୍ଶ ଏବଂ ନୂତନ ସମ୍ଭାବନା ପ୍ରଦାନ କରିବ ।
ବନ୍ଧୁଗଣ,
ଭାରତ ଏବଂ ୟୁକେ ପରସ୍ପରର ସ୍ୱାଭାବିକ ଅଂଶୀଦାର । ଆମର ସମ୍ପର୍କ ଗଣତନ୍ତ୍ର, ସ୍ୱାଧୀନତା ଏବଂ ଆଇନର ଶାସନ ଭଳି ମୂଲ୍ୟବୋଧ ଉପରେ ଏକ ସମାନ ବିଶ୍ୱାସ ଉପରେ ପ୍ରତିଷ୍ଠିତ । ବର୍ତ୍ତମାନର ବିଶ୍ୱ ଅସ୍ଥିରତାର ଯୁଗରେ, ଭାରତ ଏବଂ ୟୁକେ ମଧ୍ୟରେ ଏହି ବଢ଼ୁଥିବା ସହଭାଗୀତା ବିଶ୍ୱ ସ୍ଥିରତା ଏବଂ ଆର୍ଥିକ ପ୍ରଗତି ପାଇଁ ଏକ ଗୁରୁତ୍ୱପୂର୍ଣ୍ଣ ସ୍ତମ୍ଭ ହୋଇ ରହିଛି ।
ଆଜିର ବୈଠକରେ, ଆମେ ଭାରତ-ପ୍ରଶାନ୍ତ ମହାସାଗର, ପଶ୍ଚିମ ଏସିଆରେ ଶାନ୍ତି ଏବଂ ସ୍ଥିରତା ଏବଂ ୟୁକେନରେ ଚାଲିଥିବା ସଂଘର୍ଷ ଉପରେ ମଧ୍ୟ ମତାମତ ଆଦାନପ୍ରଦାନ କରିଛୁ । ୟୁକେନ୍ ସଂଘର୍ଷ ଏବଂ ଗାଜା ପ୍ରସଙ୍ଗରେ, ଭାରତ ଆଲୋଚନା ଏବଂ କୂଟନୀତି ମାଧ୍ୟମରେ ଶାନ୍ତି ପୁନଃସ୍ଥାପନ ପାଇଁ ସମସ୍ତ ପ୍ରୟାସକୁ ସମର୍ଥନ କରେ । ଆମେ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ସାମୁଦ୍ରିକ ସୁରକ୍ଷା ସହଯୋଗ ବୃଦ୍ଧି କରିବା ପାଇଁ ସମ୍ପୂର୍ଣ୍ଣ ପ୍ରତିବଦ୍ଧ ।
ବନ୍ଧୁଗଣ,
ଭାରତ ଏବଂ ୟୁକେ ମଧ୍ୟରେ ପ୍ରଯୁକ୍ତିବିଦ୍ୟା ସହଭାଗୀତା ଅପାର ସମ୍ଭାବନା ରହିଛି । ଆମେ ୟୁକେର ଶିଳ୍ପ ବିଶେଷଜ୍ଞତା ଏବଂ ଗବେଷଣା ଏବଂ ବିକାଶକୁ ଭାରତର ପ୍ରତିଭା ଏବଂ ବିଶାଳତା ସହିତ ମିଶ୍ରଣ କରିବା ପାଇଁ କାର୍ଯ୍ୟ କରୁଛୁ ।
ଗତ ବର୍ଷ, ଆମେ ଭାରତ-ୟୁକେ ପ୍ରଯୁକ୍ତି ସୁରକ୍ଷା ପଦକ୍ଷେପ ଆରମ୍ଭ କରିଥିଲୁ । ଏହି ପଦକ୍ଷେପ ଅଧୀନରେ, ଆମେ ଗୁରୁତ୍ୱପୂର୍ଣ୍ଣ ଏବଂ ଉଦୀୟମାନ ପ୍ରଯୁକ୍ତିବିଦ୍ୟାରେ ମିଳିତ ଗବେଷଣା ଏବଂ ନବସୃଜନ ପାଇଁ ଏକ ଦୃଢ଼ ପ୍ଲାଟଫର୍ମ ସୃଷ୍ଟି କରିଥିଲୁ । ନବସୃଜନ ମାଧ୍ୟମରେ ଉଭୟ ଦେଶର ଯୁବ ପିଢ଼ିଙ୍କୁ ସଂଯୋଗ କରିବା ପାଇଁ, ଆମେ ସଂଯୋଗ ଏବଂ ନବସୃଜନ କେନ୍ଦ୍ର ଏବଂ ମିଳିତ ଏଆଇ ଗବେଷଣା କେନ୍ଦ୍ର ଭଳି ଅନେକ ପଦକ୍ଷେପ ନେଇଛୁ ।
ଆମେ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ ଉପରେ ସହଯୋଗ କରିବା ପାଇଁ ଏକ ଶିଳ୍ପ ଗିଲ୍ଡ ଏବଂ ଯୋଗାଣ ଶୃଙ୍ଖଳା ଅବଜରଭେଟୋରୀ ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଛୁ । ଏହାର ସାଟେଲାଇଟ୍ କ୍ୟାମ୍ପସ୍ ଆଇଏସଏମ୍ ଧନବାଦରେ ହେବ ।
ସ୍ଥାୟୀ ବିକାଶ ଲକ୍ଷ୍ୟ ପାଇଁ ଆମର ଏକ ମିଳିତ ପ୍ରତିବଦ୍ଧତା ଅଛି । ଆମେ ଏହି ଦିଗରେ ଭାରତ-ୟୁକେ ଅଫଶୋର ପବନଶକ୍ତି ଟାସ୍କଫୋର୍ସ ଗଠନକୁ ସ୍ୱାଗତ କରୁଛୁ ।
ଆମେ ଜଳବାୟୁ ପ୍ରଯୁକ୍ତିବିଦ୍ୟା ଷ୍ଟାର୍ଟଅପ୍ ପାଣ୍ଠି ପ୍ରତିଷ୍ଠା କରିଛୁ । ଏହା ଜଳବାୟୁ, ପ୍ରଯୁକ୍ତିବିଦ୍ୟା ଏବଂ ଏଆଇରେ କାର୍ଯ୍ୟ କରୁଥିବା ଉଭୟ ଦେଶର ଉଦ୍ଭାବକ ଏବଂ ଉଦ୍ୟୋଗୀମାନଙ୍କୁ ସମର୍ଥନ କରିବ ।

ବନ୍ଧୁଗଣ,
ପ୍ରତିରକ୍ଷା ଏବଂ ସୁରକ୍ଷାଠାରୁ ଶିକ୍ଷା ଏବଂ ନବସୃଜନ ପର୍ଯ୍ୟନ୍ତ, ଭାରତ-ୟୁକେ ସମ୍ପର୍କରେ ନୂତନ ଦିଗ ସୃଷ୍ଟି ହେଉଛି ।
ଆଜି, ପ୍ରଧାନମନ୍ତ୍ରୀ ଷ୍ଟାରମରଙ୍କ ସହିତ ଶିକ୍ଷା କ୍ଷେତ୍ରର ଆଜି ପର୍ଯ୍ୟନ୍ତ ସବୁଠାରୁ ବଡ଼ ଏବଂ ପ୍ରଭାବଶାଳୀ ପ୍ରତିନିଧିମଣ୍ଡଳୀ ଅଛନ୍ତି । ଏହା ଖୁସିର କଥା ଯେ ନଅଟି ୟୁକେ ବିଶ୍ୱବିଦ୍ୟାଳୟ ଏବେ ଭାରତରେ କ୍ୟାମ୍ପସ୍ ଖୋଲିଛନ୍ତି । ସାଉଥାମ୍ପଟନ୍ ବିଶ୍ୱବିଦ୍ୟାଳୟର ଗୁରୁଗ୍ରାମ କ୍ୟାମ୍ପସ୍ ନିକଟରେ ଉଦଘାଟନ ହୋଇଛି, ଏବଂ ପ୍ରଥମ ଛାତ୍ର ଗୋଷ୍ଠୀ ନାମ ଲେଖାଇସାରିଛନ୍ତି । ଗିଫ୍ଟ ସିଟିରେ ଆଉ ତିନୋଟି ୟୁକେ ବିଶ୍ୱବିଦ୍ୟାଳୟ କ୍ୟାମ୍ପସ୍ ନିର୍ମାଣ ମଧ୍ୟ ଚାଲିଛି ।
ଆମର ପ୍ରତିରକ୍ଷା ସହଯୋଗ ମଧ୍ୟ ବୃଦ୍ଧି ପାଇଛି । ଆମେ ପ୍ରତିରକ୍ଷା ସହ-ଉତ୍ପାଦନ ଏବଂ ଉଭୟ ଦେଶର ପ୍ରତିରକ୍ଷା ଶିଳ୍ପକୁ ସଂଯୋଗ କରିବା ଦିଗରେ ଅଗ୍ରସର ହେଉଛୁ । ପ୍ରତିରକ୍ଷା ସହଯୋଗକୁ ଆଉ ଏକ ପାଦ ଆଗକୁ ନେଇ, ଆମେ ସାମରିକ ତାଲିମ କ୍ଷେତ୍ରରେ ସହଯୋଗ ପାଇଁ ଏକ ଚୁକ୍ତି ସ୍ୱାକ୍ଷର କରିଛୁ । ଏହି ଚୁକ୍ତି ଅନୁଯାୟୀ, ଭାରତୀୟ ବାୟୁସେନାର ଫ୍ଲାଇଂ ପ୍ରଶିକ୍ଷକମାନେ ୟୁକେର ରୟାଲ୍ ବାୟୁସେନାରେ ପ୍ରଶିକ୍ଷକ ଭାବରେ କାର୍ଯ୍ୟ କରିବେ ।
ଏହା ଏକ ବିଶେଷ ସଂଯୋଗ ଯେ ଏହି ବୈଠକ ଦେଶର ଆର୍ଥିକ ରାଜଧାନୀ ମୁମ୍ବାଇରେ ହେଉଥିବା ବେଳେ, ଆମର ନୌସେନା ଜାହାଜ “କୋଙ୍କଣ ୨୦୨୫” ମିଳିତ ଅଭ୍ୟାସ କରୁଛନ୍ତି ।

ବନ୍ଧୁଗଣ,
ୟୁକେରେ ରହୁଥିବା ୧.୮ ନିୟୁତ ଭାରତୀୟ ଆମର ସହଭାଗୀତାରେ ଏକ ଗତିଶୀଳ ସଂଯୋଗ । ବ୍ରିଟିଶ ସମାଜ ଏବଂ ଅର୍ଥନୀତିରେ ସେମାନଙ୍କର ମୂଲ୍ୟବାନ ଅବଦାନ ମାଧ୍ୟମରେ, ସେମାନେ ଆମ ଦୁଇ ଦେଶ ମଧ୍ୟରେ ବନ୍ଧୁତା, ସହଯୋଗ ଏବଂ ବିକାଶର ସେତୁକୁ ମଜବୁତ କରିଛନ୍ତି ।
ବନ୍ଧୁଗଣ,
ଭାରତର ଗତିଶୀଳତା ଏବଂ ଯୁକ୍ତରାଜ୍ୟର ବିଶେଷଜ୍ଞତା ମିଳିତ ଭାବରେ ଏକ ଅନନ୍ୟ ସମନ୍ୱୟ ସୃଷ୍ଟି କରନ୍ତି । ଆମର ସହଭାଗୀତା ବିଶ୍ୱସନୀୟ, ପ୍ରତିଭା ଏବଂ ପ୍ରଯୁକ୍ତିବିଦ୍ୟା-ଚାଳିତ । ଏବଂ ଆଜି, ଯେତେବେଳେ ପ୍ରଧାନମନ୍ତ୍ରୀ ଷ୍ଟାରମର ଏବଂ ମୁଁ ମଞ୍ଚ ଉପରେ ଏକାଠି ଠିଆ ହୋଇଛୁ, ଏହା ଆମର ସ୍ପଷ୍ଟ ପ୍ରତିବଦ୍ଧତା ଯେ ଏକାଠି, ଆମେ ଉଭୟ ଦେଶର ଲୋକଙ୍କ ପାଇଁ ଏକ ଉଜ୍ଜ୍ୱଳ ଭବିଷ୍ୟତ ନିର୍ମାଣ କରିବୁ ।
ମୁଁ ପୁଣିଥରେ ପ୍ରଧାନମନ୍ତ୍ରୀ ଷ୍ଟାରମର ଏବଂ ତାଙ୍କ ପ୍ରତିନିଧିମଣ୍ଡଳକୁ ଭାରତ ଗସ୍ତ ପାଇଁ ମୋର ହୃଦୟରୁ ଧନ୍ୟବାଦ ଜଣାଉଛି ।

ଆପଣଙ୍କୁ ବହୁତ ବହୁତ ଧନ୍ୟବାଦ ।