ଲୋଇସିଂହା, (ବିମଳେନ୍ଦୁ ସାହୁ) : ବଲାଙ୍ଗିର ଜିଲ୍ଲା ଲୋଇସିଂହା ବ୍ଲକ ରୁଗୁଡିଖାଲ ସ୍ଥିତ ମାନସ ବିହାର ଠାରେ ରାମଚରିତ ମାନସ ଯଜ୍ଞ ଆରମ୍ଭ ହୋଇଛି । ଏହି ଅବସରରେ ତ୍ରିବେଣୀ ଅମାବାସ୍ୟା ତିଥିରେ କଳସ ଶୋଭାଯାତ୍ରା ଅନୁଷ୍ଠିତ ହୋଇଥିଲା । ବେନ୍ଦ୍ରା ରଘୁନାଥ ମନ୍ଦିର ମହନ୍ତ ଯମୁନା ଦାସଙ୍କ ପୌରହିତ୍ୟରେ ଯଜ୍ଞାରମ୍ଭ ଓ ରାମଚରିତ ମାନସ ପାରାୟଣ ଆରମ୍ଭ ହୋଇଛି । ନବଦିନ ବ୍ୟାପୀ ଆୟୋଜିତ ହେଉଥିବା ଏହି କାର୍ଯ୍ୟକ୍ରମ ଆସନ୍ତା ଫେବୃୟାରୀ ୭ରେ ପୂର୍ଣ୍ଣାହୁତି ହେବ । ଓଡ଼ିଆ ରାମାୟଣ ପଠନରେ ଚୈତନ୍ୟ ମିଶ୍ର ଓ ହିନ୍ଦୀରେ ଛନ୍ଦାଚରଣ ଦାସ ବ୍ୟାସ ଭାବେ ରହିଛନ୍ତି । ଏହି ଅବସରରେ ପ୍ରତ୍ୟହ ଭଜନ ପରିବେଷଣ ସାଙ୍ଗକୁ ପ୍ରଭୁ ଶ୍ରୀରାମଙ୍କ ନୌକାପାରି, କୈବର୍ତ୍ତ ପ୍ରସଙ୍ଗ, ଅହଲ୍ୟା ତାରଣ, ଶବରୀର ଫଳଖିଆ, ସୀତା ବିବାହ, ଭରତ ମିଳନ ଇତ୍ୟାଦି ରୂପକ ମାଧ୍ୟମରେ ପ୍ରଦର୍ଶନ କରାଯିବ । ସୁନ୍ଦରଗଡ଼ର କରମା ନୃତ୍ୟ, ପୁରୀର ଘୋଡାନାଚ, ସମ୍ବଲପୁରୀ ନୃତ୍ୟ, ମିକ୍ଚର୍ ରାମଲୀଳା ସାଙ୍ଗକୁ ସମ୍ବଲପୁରୀ ଭଜନ ପରିବେଷଣ ତଥା ଷୋହଳ ପ୍ରହର ନାମଯଜ୍ଞ ଓ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ମାନସ ଯଜ୍ଞ ପରିଚାଳନା କମିଟି ସଭାପତି ଯୁଧିଷ୍ଠିର ପଧାନଙ୍କ ପ୍ରତ୍ୟକ୍ଷ ତତ୍ୱାବଧାନରେ ବେଦପତି ପଧାନ, ସୁଧାଂଶୁ ସାହୁ, ଗଣେଶ ପଧାନ, କିଶୋର ଦର୍ଜି, ଘାସିରାମ ବେହେରାଙ୍କ ସମେତ ଆଖପାଖ ଗ୍ରାମର ଶତାଧିକ ଜନସାଧାରଣ କାର୍ଯ୍ୟକ୍ରମ ପରିଚାଳନାରେ ସହଯୋଗ କରୁଥିବା ଜଣାଯାଇଛି ।