ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଓଡ଼ିଶା ସରକାର ଯୋଜନା ଓ ସମନ୍ୱୟ ବିଭାଗ ଭୁବନେଶ୍ୱର ବିଜ୍ଞପ୍ତି ଚିଠି ନଂ. ୧୪୭୯ /ପି, ତାରିଖ ୦୩-୧୦-୨୦୨୬ ପ୍ରକାରେ ଓଡ଼ିଶା ଜିଲ୍ଲା ଯୋଜନା କମିଟଶ ଆଇନ, ୧୯୯୮ (୧୯୯୮ ର ଓଡ଼ିଶା ଆଇନ ୮) ର ଧାରା ୩ ର ଉପ-ଧାରା (୩) ର କ୍ଲଜ୍ (ସସସ) ସହ ଧାରା ୪ ର ଉପ-ଧାରା (୧) ଅନୁଯାୟୀ ପ୍ରଦତ୍ତ କ୍ଷମତା ବଳରେ, ରାଜ୍ୟ ସରକାର ଏତଦ୍ୱାରା ନିମ୍ନଲିଖିତ ବ୍ୟକ୍ତିମାନଙ୍କୁ ଗଞ୍ଜାମ ଜିଲ୍ଲାର ଜିଲ୍ଲା ଯୋଜନା କମିଟିରେ ବିଶେଷଜ୍ଞ ସଦସ୍ୟ ଭାବେ ମନୋନୀତ କରିଛନ୍ତି । ଯେଉଁ କମିଟି ପୂର୍ବତନ ଯୋଜନା ଓ ସମନ୍ୱୟ ବିଭାଗର ବିଜ୍ଞପ୍ତି ନଂ. ୯୩୯୧/ପି, ଡିପିସି-୩୧/୨୦୦୧, ତାରିଖ ୧୯ ମେ, ୨୦୦୩ ଦ୍ୱାରା ପୁନର୍ଗଠିତ ହୋଇଥିଲା । “କ୍ରମିକ ନଂ.୧୮ – ଦେବଦତ୍ତ ପଣ୍ଡା – ବିଶେଷଜ୍ଞ ସଦସ୍ୟ ଓ କ୍ରମିକ ନଂ.୧୯ – ସୁଧୀର ସାବତ – ବିଶେଷଜ୍ଞ ସଦସ୍ୟ ଭାବେ ଓଡିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସୁପାରିଶ କ୍ରମେ ରାଜ୍ୟପାଳଙ୍କ ଆଦେଶ ଦ୍ୱାରା ଓଡ଼ିଶା ସରକାରଙ୍କ ଯୋଜନା ଓ ସମନ୍ୱୟ ବିଭାଗ ଗଞ୍ଜାମ ଜିଲ୍ଲା ପାଇଁ ନିଯୁକ୍ତି ଦେଇଛନ୍ତି । ଗଞ୍ଜାମ ଜିଲ୍ଲାର ମାଟିରୁ ସ୍ୱେଚ୍ଛାସେବୀ ଭାବେ ୧୯୮୧ ମସିହାରୁ ଆରମ୍ଭ କରିଥିବା ସୁଧୀର ସାବତଙ୍କ ସମାଜସେବା ବିଭିନ୍ନ ସାମାଜିକ କ୍ଷେତ୍ରକୁ ସ୍ପର୍ଶ କରିଛି । ତାଙ୍କ ଯାତ୍ରାର ମୂଳମନ୍ତ୍ର ହେଉଛି—“ସେବା କେବଳ ସମସ୍ୟାର ସମାଧାନ ନୁହେଁ; ଲୋକଙ୍କୁ ନିଜ ଅଧିକାର ଓ ସମ୍ଭାବନା ପାଇଁ ନିଜେ ଠିଆ ହେବାକୁ ସଶକ୍ତ କରିବା ।” ଶିଶୁର ହସ, ମହିଳାଙ୍କ ସୁରକ୍ଷା, ଗରିବ ପରିବାରର ଆତ୍ମନିର୍ଭରତା ଏବଂ ଗ୍ରାମୀଣ ସମାଜର ସମ୍ମାନଜନକ ଜୀବନ—ଏହି ସବୁକୁ ନିଜ ସମାଜସେବାର ଲକ୍ଷ୍ୟ କରି ସୁଧୀର ସାବତ ଦୀର୍ଘ ସମୟ ଧରି ନିରନ୍ତର କାର୍ଯ୍ୟ କରିଆସୁଛନ୍ତି । ତାଙ୍କ ସେବା ଯାତ୍ରା ଏକ ବ୍ୟକ୍ତିର କାହାଣୀ ମାତ୍ର ନୁହେଁ; ଏହା ହେଉଛି ଗଞ୍ଜାମର ଗ୍ରାମୀଣ ସମାଜରୁ ଉଠିଥିବା ଏକ ମାନବିକ ପ୍ରୟାସର ଦୀର୍ଘ ଯାତ୍ରା—ଯାହାର କେନ୍ଦ୍ରରେ ରହିଛି ମଣିଷ, ଅଧିକାର, ସୁରକ୍ଷା ଓ ସମ୍ମାନ।ସୁଧୀର ସାବତଙ୍କ ସମାଜସେବାର ଏକ ମୁଖ୍ୟ ମଞ୍ଚ ହେଉଛି Indian Society for Rural Development (ISRD)। ଗ୍ରାମୀଣ ଓ ଦୁର୍ବଳ ବର୍ଗର ଲୋକମାନଙ୍କ ଅଧିକାର, ବିକାଶ ଓ ସଶକ୍ତିକରଣକୁ ନେଇ ସଂସ୍ଥାଟି ଦୀର୍ଘଦିନ ଧରି କାର୍ଯ୍ୟ କରିଆସୁଛି । ଏକ ଛୋଟ ପ୍ରୟାସରୁ ଆରମ୍ଭ ହୋଇଥିବା ଏହି ସେବା ଯାତ୍ରା କ୍ରମେ ଅନେକ ଗ୍ରାମ, ପରିବାର, ମହିଳା, ଶିଶୁ ଓ ଅବହେଳିତ ସମୁଦାୟ ପର୍ଯ୍ୟନ୍ତ ପହଞ୍ଚିଛି । ସରକାରୀ ବିଭାଗ, ପ୍ରଶାସନ, ପୋଲିସ, ସ୍ଥାନୀୟ ନେତୃତ୍ୱ, ସ୍ୱେଚ୍ଛାସେବୀ ସଂଗଠନ ଓ ସମୁଦାୟକୁ ଏକାଠି କରି ସମସ୍ୟାର ସମାଧାନ କରିବା ତାଙ୍କ କାର୍ଯ୍ୟଶୈଳୀର ଏକ ବିଶେଷ ଦିଗ । ସମାଜସେବା କେବଳ ଏକ ପେଶା ନୁହେଁ; ଏହା ହେଉଛି ମଣିଷର ଦୁଃଖକୁ ନିଜର ଦୁଃଖ ଭାବିବା, ଅବହେଳିତଙ୍କ ସ୍ୱରକୁ ନିଜର ସ୍ୱର କରିବା ଏବଂ ସମାଜର ଶେଷ ଧାଡ଼ିରେ ଥିବା ମଣିଷଙ୍କ ଜୀବନରେ ଆଶାର ଆଲୋକ ଜଳାଇବା। ଏହି ମାନବିକ ଚିନ୍ତାଧାରାକୁ ଜୀବନର ଲକ୍ଷ୍ୟ କରି ଦୀର୍ଘ ଦଶକ ଧରି କାର୍ଯ୍ୟ କରିଆସୁଥିବା ଜଣେ ସମାଜସେବୀ ସୁଧୀର ସାବତ ଜାତୀୟ ଏବଂ ଅନ୍ତର୍ଜାତୀୟ ସ୍ତରରେ ବିଭିନ୍ନ ସମୟରେ ସମ୍ମାନିତ ହୋଇଛନ୍ତି । ଗଞ୍ଜାମ ଜିଲ୍ଲା ଯୋଜନା ବୋର୍ଡର ସଦସ୍ୟ ଭାବେ ଦାୟିତ୍ୱ ପ୍ରଦାନ କରିଥିବାରୁ ସୁଧୀର ସାବତ ଓଡ଼ିଶାର ମୁଖ୍ୟମନ୍ତ୍ରୀ ମହୋଦୟ, ଗଞ୍ଜାମ ଜିଲ୍ଲା ଯୋଜନା ବୋର୍ଡର ଅଧ୍ୟକ୍ଷ ମହୋଦୟ ଏବଂ ଗଞ୍ଜାମ ଜିଲ୍ଲାର ସମସ୍ତ ବିଧାୟକ ଓ ସାଂସଦ ମହୋଦୟମାନଙ୍କୁ ହୃଦୟରୁ କୃତଜ୍ଞତା ଓ ଧନ୍ୟବାଦ ଜଣାଇଛନ୍ତି ।