ଭୁବନେଶ୍ଵର : ପ୍ରତିଦିନ ଓଡିଶାରେ ହେଉଥିବା ଗୋହତ୍ୟା ଓ ଗୋଚାଲାଣ ପ୍ରତିବାଦରେ ଗର୍ଜିଲେ ଗୋସୁରକ୍ଷା ଦିଗରେ କାର୍ଯ୍ୟକରୁଥିବା ବହୁ ସଂଗଠନ ଓ ବ୍ୟକ୍ତିବିଶେଷ । ରାଜ୍ୟରେ ଗୋ-ହତ୍ୟା ବନ୍ଦ କରିବା ଓ ବିଧାନସଭାରେ ଆଗତ ଓଡ଼ିଶା ଗୋ-ହତ୍ୟା ନିଷେଧ ଓ ଗୋ-ସଂରକ୍ଷଣ ବିଲ୍ ୨୦୨୪କୁ ତୁରନ୍ତ ପାରିତ କରିବା ଦାବିରେ ପିଏମ୍ଜି ଛକଠାରେ ଏକ ବିଶାଳ ଗୋ-ରକ୍ଷା ମହାସମାବେଶ କରାଯାଇଛି । ଗୋ-ହତ୍ୟା ନିଷେଧ, ଗୋ-ଚାଲାଣ ଓ ଗୋ-ମାଂସ ଚାଲାଣ ଉପରେ ଅଙ୍କୁଶ ତଥା ଗୋ-ଅନୁକୂଳ ଶାସକୀୟ ନୀତି ପ୍ରଣୟନ ପାଇଁ ଏହି ବିଲକୁ ଅଗ୍ରାଧିକାର ଦେଇ ବିଧାନସଭାରେ ଅତି ଶୀଘ୍ର ପାରିତ କରିବା ପାଇଁ ଦାବି କରାଯାଇଛି । ରାଜ୍ୟ ସରକାର ତୁରନ୍ତ ଗୋ-ସୁରକ୍ଷା ଦିଗରେ କାର୍ଯ୍ୟ କରିବାକୁ ଦାବି କରାଯାଇଛି । ମହାସମାବେଶରେ ସାଧୁ, ସନ୍ୟାସୀଙ୍କ ସମେତ ବିଭିନ୍ନ ମନ୍ଦିର, ସଂଗଠନ, ସାମାଜିକ ଅନୁଷ୍ଠାନ, ଗୋ-ପ୍ରେମୀ, ଗୋ-ସେବକମାନେ ସାମିଲ ହୋଇଛନ୍ତି । ଏହି ଅବସରରେ ପ୍ରାଣୀସମ୍ପଦ ବିଭାଗରେ କାର୍ଯ୍ୟରତ ଏଆଇଟିମାନଙ୍କୁ ସ୍ଥାୟୀ ନିଯୁକ୍ତି ପାଇଁ ଦାବି କରାଯାଇଛି । ଓଡିଶା ଏଆଇ କର୍ମଚାରୀ ସଂଘ ପକ୍ଷରୁ ଏକ ବିଶାଳ ଶୋଭାଯାତ୍ରା କରି ସମାବେଶରେ ଏଆଇଟିମାନେ ଯୋଗଦେଇ ଗୋ-ସୁରକ୍ଷା ଦିଗରେ କାର୍ଯ୍ୟ କରୁଥିବାରୁ ସେମାନଙ୍କୁ ସ୍ଥାୟୀ କରିବାକୁ ଦାବି ହୋଇଛି । ଦୀର୍ଘ ୧୪ ବର୍ଷ ଧରି ପ୍ରାଣୀସମ୍ପଦ ବିଭାଗରେ ଏଆଇଟିମାନେ ଗ୍ରାମ ପଞ୍ଚାୟତ ଗୁଡିକରେ କୃତ୍ରିମ ପ୍ରଜନନ, ଟୀକାକରଣ, ପ୍ରାଥମିକ ଚିକିତ୍ସା ଓ ଭ୍ରାମ୍ୟମାଣ ଚିକିତ୍ସା ଆଦି ଯୋଗାଇ ଦେଉଛନ୍ତି । ତେଣୁ ଗୋ-ସୁରକ୍ଷା ଦିଗରେ କାର୍ଯ୍ୟରତ ଏହି କର୍ମଚାରୀମାନଙ୍କୁ ସରକାର ତୁରନ୍ତ ସ୍ଥାୟୀ ନିଯୁକ୍ତି ଦେବାକୁ ଏହି ଅବସରରେ ଦାବି କରାଯାଇଛି । ରାଜ୍ୟର ବିଭିନ୍ନ ଗୋ-ସୁରକ୍ଷା କ୍ଷେତ୍ରରେ କାର୍ଯ୍ୟରତ ବିଭିନ୍ନ ସଂଗଠନର ହଜାର ହଜାର କର୍ମୀ ସାମିଲ ହୋଇଥିଲେ । ଏହି ସମାବେଶରେ ବିଶ୍ୱ ଗୋ-ସୁରକ୍ଷା ବାହିନୀର ସଭାପତି ସୁରେଶ କୁମାର ପଣ୍ଡା ଓ ଅମୃତାନନ୍ଦ ମହାରାଜ ଏହି ଆଇନକୁ ତୁରନ୍ତ ପ୍ରଣୟନ କରିବା ପାଇଁ ସରକାରଙ୍କ ପାଖରେ ଅନୁରୋଧ କରିଥିଲେ ।