
ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଅଧୀନସ୍ଥ ସରକାରୀ ମହିଳା ମହାବିଦ୍ୟାଳୟ, ବଲାଙ୍ଗିରର ଏନ୍ସିସି ୟୁନିଟ୍ ପକ୍ଷରୁ ଛାତ୍ରୀ କ୍ୟାଡେଟ୍ମାନଙ୍କ ମଧ୍ୟରେ ଶୃଙ୍ଖଳା, ସମର୍ପଣ ଓ ନେତୃତ୍ୱ ଦକ୍ଷତାକୁ ସ୍ୱୀକୃତି ଦେବା ଉଦ୍ଦେଶ୍ୟରେ ୨୨ ନଭେମ୍ବର ୨୦୨୬ ରେ ଏକ ରାଙ୍କ୍ ପ୍ରଦାନ ସମାରୋହ ଆୟୋଜିତ ହୋଇଥିଲା । କାର୍ଯ୍ୟକ୍ରମର ଆରମ୍ଭରେ ବିଭୂତି ଭୂଷଣ ସାହୁ ସ୍ୱାଗତ ଅଭିଭାଷଣ ପ୍ରଦାନ କରି ଅତିଥିମାନଙ୍କୁ ସ୍ୱାଗତ କରିବା ସହ ଛାତ୍ରଛାତ୍ରୀଙ୍କ ମଧ୍ୟରେ ନେତୃତ୍ୱ ଓ ଶୃଙ୍ଖଳା ବିକାଶରେ ଏନ୍ସିସିର ଭୂମିକା ଉପରେ ଆଲୋକପାତ କରିଥିଲେ । ଏହି ସମାରୋହରେ ପ୍ରଶାସନିକ ଅଧିକାରୀ ଲେଫ୍ଟନାଣ୍ଟ କର୍ଣ୍ଣେଲ ପାଭେଲ ରୟ, ସୁବେଦାର ମେଜର ବିଜୟ ବର୍ମା, ଗାର୍ଲ କ୍ୟାଡେଟ୍ ଇନ୍ଷ୍ଟ୍ରକ୍ଟର ଅଞ୍ଜଳି ଶୁକ୍ଳା ଏବଂ ମହାବିଦ୍ୟାଳୟର ଅଧ୍ୟକ୍ଷ ଡଃ. ଅରବିନ୍ଦ କୁମାର ଓଝା ଯୋଗଦାନ କରିଥିଲେ । ବିଭୂତି ଭୂଷଣ ସାହୁ ଓ ସିଟିଓ ପ୍ରତୀକ୍ଷା ପ୍ରତିଶ୍ରୁତି ମଧ୍ୟ କାର୍ଯ୍ୟକ୍ରମରେ ଉପସ୍ଥିତ ଥିଲେ । ଅତିଥିମାନେ କ୍ୟାଡେଟ୍ମାନଙ୍କୁ ନିଜ ଦାୟିତ୍ୱକୁ ନିଷ୍ଠା, ଶୃଙ୍ଖଳା ଓ ପ୍ରତିବଦ୍ଧତାର ସହ ପାଳନ କରିବାକୁ ଉତ୍ସାହିତ କରିଥିଲେ । ଏହି ଅବସରରେ ଅତିଥିମାନେ ଏନ୍ସିସିରେ ଶୃଙ୍ଖଳା, ସମର୍ପଣ, ଦାୟିତ୍ୱବୋଧ ଓ ନେତୃତ୍ୱର ଗୁରୁତ୍ୱ ଉପରେ ମତବ୍ୟକ୍ତ କରିଥିଲେ । ନବନିଯୁକ୍ତ ରାଙ୍କ୍ଧାରୀ କ୍ୟାଡେଟ୍ମାନଙ୍କୁ ନିଜ କାର୍ଯ୍ୟ ଓ ଆଚରଣ ମାଧ୍ୟମରେ ଅନ୍ୟମାନଙ୍କ ପାଇଁ ଆଦର୍ଶ ହେବା ସହ ଏନ୍ସିସିର ମୂଳମନ୍ତ୍ର “ଏକତା ଓ ଶୃଙ୍ଖଳା”କୁ ବଜାୟ ରଖିବାକୁ ଆହ୍ୱାନ ଦେଇଥିଲେ । ଏହି ଅବସରରେ ଆଠ ଜଣ କ୍ୟାଡେଟ୍ଙ୍କୁ ବିଭିନ୍ନ ପଦବୀରେ ଅଭିଷିକ୍ତ କରାଯାଇଥିଲା । ଲୋପା ଓ ବର୍ଷାଙ୍କୁ ଲାନ୍ସ କର୍ପୋରାଲ୍ (ଏଲ୍ସିପିଏଲ୍), ରଶ୍ମି ଓ ସାଙ୍ଗ୍ୟାଙ୍କୁ କର୍ପୋରାଲ୍ (ସିପିଏଲ୍), ଶିବାନୀ ଓ ସଙ୍ଗୀତାଙ୍କୁ ସାର୍ଜେଣ୍ଟ (ଏସ୍ଜିଟି), ପୁନମ୍ଙ୍କୁ କମ୍ପାନୀ କ୍ୱାର୍ଟର ମାଷ୍ଟର ସାର୍ଜେଣ୍ଟ (ସିକ୍ୟୁଏମ୍ଏସ୍) ଏବଂ ସୁପ୍ରଭାତୀଙ୍କୁ ଜୁନିଅର ଅଣ୍ଡର ଅଫିସର (ଜେୟୁଓ) ପଦବୀ ପ୍ରଦାନ କରାଯାଇଥିଲା । ଶେଷରେ ସିଟିଓ ପ୍ରତୀକ୍ଷା ପ୍ରତିଶ୍ରୁତି ଧନ୍ୟବାଦ ଅର୍ପଣ କରି ଅତିଥିବୃନ୍ଦ, ମହାବିଦ୍ୟାଳୟର ଅଧ୍ୟକ୍ଷ, ଅଧ୍ୟାପକ-ଅଧ୍ୟାପିକା ଓ କ୍ୟାଡେଟ୍ମାନଙ୍କ ଉପସ୍ଥିତି, ସହଯୋଗ ଓ ସମର୍ଥନ ପାଇଁ କୃତଜ୍ଞତା ଜଣାଇଥିଲେ । ଏଥିସହ କାର୍ଯ୍ୟକ୍ରମର ସଫଳ ସମାପନ ହୋଇଥିଲା ।