ଭୁବନେଶ୍ୱର : ସଂପର୍କରେ ବିଷ ଦେଇ ଧରମ ଭାଇ ସାଜି ୩୦ ହଜାର ଟଙ୍କା ଲୁଟିନେବା ଭଳି ଏକ ଖବର ଆସିଛି । ବିଶ୍ବାସ ଜନ୍ମାଇ ଜଣେ ଯୁବତୀଙ୍କୁ ଯୁବକ ଜଣକ ଲୁଟ୍ କରିଛି । ଏହି ଘଟଣା କଳ୍ପନା ଟ୍ରାଫିକ୍ ଛକ ନିକଟରେ ଘଟିଥିବା ଜଣାପଡ଼ିଛି। ଟଙ୍କା ହରାଇଥିବା ମହିଳା ଜଣଙ୍କ ବିଶେଶ୍ବର ବସ୍ତିର ଲଳିତା ମୁଣ୍ଡା ହୋଇଥିବା ବେଳେ ତାଙ୍କ ଘର ଯାଜପୁର ସୁକିନ୍ଦା ଅଞ୍ଚଳରେ ବୋଲି ଜଣାପଡ଼ିଛି। ଏକ ଘରୋଇ ହସ୍ପିଟାଲରେ ଲଳିତା କାର୍ୟ୍ୟ କରନ୍ତି । ଖାରବେଳ ନଗର ଥାନାରେ ସେ ଅଭିଯୋଗ କରିଥିବା ଜଣାପଡ଼ିଛି । ଲଳିତାଙ୍କ ଅଭିଯୋଗ ଅନୁସାରେ ଲୁଟ୍ କରିଥିବା ଯୁବକ ଜଣଙ୍କ ଦୁଇଦିନ ତଳେ ଏକ ଅଜଣା ନମ୍ବରରେ କଲ୍ କରି କହିଥିଲା- ‘ତୁମେ ମୋର ଭଉଣୀ ପରି। ମତେ ଧରମ ଭାଇ କର । ମୋର ଅସୁବିଧା ଅଛି, କିଛି ଟଙ୍କା ସାହାଯ୍ୟ କର । ପରେ ମୁଁ ୨ଲକ୍ଷ ଟଙ୍କା ଦେବି’ ବୋଲି କହିଥିଲା। ଏମିତି କହି ଲଳିତାଙ୍କୁ ତିନି ଦିନ ଧରି ଫୋନ୍ କଲା ପରେ ବୁଧବାର ଉଭୟ ରାମ ମନ୍ଦିର ନିକଟରେ ଭେଟ ହୋଇଥିଲେ । ଦେଖାହେବା ପରେ ହାତରେ ସୂତା ବାନ୍ଧି ତୁଳସୀ ଖୁଆଇ ଆଜିଠୁ ଭାଇ ଭଉଣୀ ବୋଲି ସତ୍ୟ କରିଥିଲେ । ପରେ ଦୁର୍ବୃତ୍ତ ଜଣଙ୍କ ଯୁବତୀଙ୍କୁ ବାଇକ୍ରେ ବସାଇ ବ୍ୟାଙ୍କକୁ ଯିବା କହି ସାଙ୍ଗରେ ନେଇଥିଲା । ହେଲେ ବାଟରେ ହେଲ୍ମେଟ ଚେକ୍ ହେଉଛି କହି ଯୁବତୀ ଜଣଙ୍କୁ ଓହ୍ଲାଇ ଦେଇ ଲଳିତା ପାଖରୁ ୩୦ହଜାର ଟଙ୍କା ଥିବା ବ୍ୟାଗ୍ ନେଇ ସେ ଚମ୍ପଟ ମାରିଥିଲା ।