ବଲାଙ୍ଗିର, (ଦେବାଶିଷ ମିଶ୍ର) : ଚଳିତ ବର୍ଷ ଲୋକସେବା ଆୟୋଗଙ୍କ ଦ୍ୱାରା ଡାକ୍ତରି ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଛି । ଉକ୍ତ ପଦବୀ ପାଇଁ ଫର୍ମ ପୂରଣର ଅବଧି ଗତ ମାର୍ଚ୍ଚ ମାସ ୨୫ରୁ ଆରମ୍ଭ ହୋଇଥିବା ବେଳେ ଆସନ୍ତା ଅପ୍ରିଲ ୨୪ ତାରିଖରେ ବନ୍ଦ ହୋଇଯିବା ନେଇ ସୂଚନା ରହିଛି । ତେବେ ଏଭଳି କ୍ଷେତ୍ରରେ ବଲାଙ୍ଗିର ଭୀମ ଭୋଇ ମେଡିକାଲ କଲେଜର ଛାତ୍ରଛାତ୍ରୀମାନେ ଏଥିରେ ଆବେଦନ କରି ପାରିବେ ନାହିଁ ବୋଲି ଭୀମ ଭୋଇ ହାଉସ ସର୍ଜନ ୟୁନିଅନ ଅଭିଯୋଗ କରିଛି । ତା ଛଡା ଭୀମସାର, ବୁର୍ଲା ଓ ରାଉଲକେଲା ହାଇଟେକ୍ର ଛାତ୍ରଛାତ୍ରୀମାନେ ମଧ୍ୟ ଏଥିରୁ ବାଦ ପଡିବେ ବୋଲି କୁହାଯାଇଛି । ପ୍ରକାଶ ଯେ, ଭୀମ ଭୋଇ ମେଡିକାଲ କଲେଜ, ବଲାଙ୍ଗିର ଓ ରାଉଲକେଲା ହାଇଟେକ କଲେଜର ହାଉସ ସର୍ଜନସିପ ଟ୍ରେନିଂ ଅପ୍ରିଲ ୨୧ରେ ସଂପୁର୍ଣ୍ଣ ହେବାକୁ ଥିବା ବେଳେ ବୁର୍ଲା ସ୍ଥିତ ଭୀମସାରର ଅପ୍ରିଲ ୨୫ରେ ସରିବ । ଟ୍ରେନିଂ ସମ୍ପୁର୍ଣ୍ଣ ହୋଇଥିଲେ ସୁଦ୍ଧା ଉପରୋକ୍ତ ପଦବୀ ପାଇଁ ଛାତ୍ରଛାତ୍ରୀମାନଙ୍କୁ ଓସିଏମଆର୍ର ପାର୍ମାନେଣ୍ଟ ରେଜିଷ୍ଟ୍ରେସନ ଥିବା ନିହାତି ଆବଶ୍ୟକ । ଆହୁରି ରେଜିଷ୍ଟ୍ରେସନ ପାଇଁ ଅନ୍ତତଃ ୭ ରୁ ୧୦ ଦିନ ସମୟ ଲାଗିଥାଏ । ଏଭଳି କ୍ଷେତ୍ରରେ ଭୀମ ଭୋଇ ମେଡିକାଲ ଓ ହାଇଟେକ୍ର ୨୧ରେ ଟ୍ରେନିଂ ସମ୍ପୁର୍ଣ୍ଣ ହେବା ସୁଦ୍ଧା ଅବଧି ମୁତାବକ ଅପ୍ରିଲ ୨୫ ତାରିଖ ସୁଦ୍ଧା ସେମାନେ ଓସିଏମଆର ରେଜିଷ୍ଟ୍ରେସନ ପାଇବା ଆଶା ଖୁବ କ୍ଷିଣ । ସେହିପରି ଭିମସାର, ବୁର୍ଲାର ଟ୍ରେନିଂ ଠିକ ଅପ୍ରିଲ ୨୫ରେ ସଂପୁର୍ଣ୍ଣ ହେଉଥିବା ଯୋଗୁଁ ସେମାନେ ପଦବୀ ପାଇବା ଏକ ରକମର ଅସମ୍ଭବ ହୋଇପଡିଛି । ଏହି ସମସ୍ୟାକୁ ନେଇ ଭୀମ ଭୋଇ ମେଡିକାଲ ଓ ଭୀମସାରର ହାଉସ ସର୍ଜନ ୟୁନିଅନ ଗତ ୩୦ ତାରିଖ ଦିନ ବାଲଙ୍ଗିର ଭୀମ ଭୋଇ ମେଡିକାଲଠାରେ ସ୍ୱାସ୍ଥ୍ୟ ମନ୍ତ୍ରୀ ଡା ମୁକେଶ ମହାଲିଙ୍ଗଙ୍କୁ ଏନେଇ ଏକ ଦାବିପତ୍ର ପ୍ରଦାନ କରିଥିଲେ । କିନ୍ତୁ ଏଯାଏଁ ଫର୍ମ ପୁରଣ ଅବଧି ବଢା ଯାଇନଥିବା ବେଳେ ସମୁଦାୟ ୪୦୦ ଜଣ ଡାକ୍ତରଙ୍କ ଭବିଷ୍ୟତ ଅନ୍ଧାରରେ ଥିବା ଭୀମ ଭୋଇ ମେଡିକାଲ ହାଉସ ସର୍ଜ ୟୁନିଅନ ଅଭିଯୋଗ କରିଛି ।