ଫିରିଙ୍ଗିଆ : ଯାତ୍ରା ଦେଖି ଘରକୁ ଫେରୁଥିବା ସମୟରେ ରାସ୍ତା କଡରେ ଥିବା ଏକ ଗଛରେ ଭାରସାମ୍ୟ ହରାଇ ପିଟି ହୋଇଗଲା ବାଇକ ଫଳରେ ଜଣେ ଯୁବକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ୨ଜଣ ଗୁରୁତର ହୋଇଛନ୍ତି । ଏମିତି ଏକ ଘଟଣା ଘଟିଛି ଫିରିଙ୍ଗିଆ ବ୍ଲକ ସାଡିଙ୍ଗିଆ ଅଂଚଳରେ । ମୃତକ ଜଣକ ହେଲେ ସାଡିଙ୍ଗିଆ ପଞ୍ଚାୟତ ପିଡିଆକୁଟି ଗ୍ରାମର କାଣ୍ଡି ବାଙ୍କ (୧୭) ହୋଇଥିବା ବେଳେ ଗୁରୁତରମାନେ ହେଲେ ବାନ୍ଦାଦଣୀର ସନାତନ କହଁର ଓ ଡାଙ୍ଗାଣିପଦରର ମାନସ ମଲିକ । ସୂଚନା ଅନୁସାରେ ଶୁକ୍ରବାର ସାଡିଙ୍ଗିଆ ଠାରେ ଚାଲିଥିବା ରାହାସ ଯାତ୍ରା ଦେଖିବା ପାଇଁ ଏହି ୩ ଜଣ ଏକ ବାଇକରେ ଆସିଥିଲେ । ଯାତ୍ରା ସରିବା ପରେ ନିଜ ଗାଁକୁ ଫେରୁଥିବା ସମୟରେ ସାଡିଙ୍ଗିଆ – ବାନ୍ଦାଦଣୀ ରାସ୍ତାର କିଆମୁଣ୍ଡା ଟିକାରପଦର ଘାଟି ରାସ୍ତା ପାର୍ଶ୍ୱରେ ଥିବା ଏକ ଶାଳ ଗଛରେ ବାଇକଟି ଭାରସାମ୍ୟ ହରାଇ ପିଟି ହୋଇଥିଲା ଫଳରେ ସେମାନେ ଗୁରୁତର ହୋଇଯାଇଥିଲେ । ଏହା ଦେଖି ସ୍ଥାନୀୟ ଲୋକେ ସେମାନଙ୍କୁ ଏକ ଅଟୋ ରିକ୍ସାରେ ଫିରିଙ୍ଗିଆ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇ ଭର୍ତ୍ତି କରିଥିଲେ । ସେଠାରେ ଡାକ୍ତର କାଣ୍ଡିଙ୍କୁ ମୃତ ଘୋଷଣା କରିଥିଲେ । ଫିରିଙ୍ଗିଆ ପୁଲିସ ମେଡିକାଲରେ ପହଂଚି ଶବ ଜବତ କରିବା ସହ ଶବ ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇ ଥିବା ଫିରିଙ୍ଗିଆ ଥାନା ଅଧିକାରୀ ଗୋପୀନାଥ ପ୍ରଧାନ ସୂଚନା ଦେଇଛନ୍ତି ।