ମୁରିବାହାଲ, (ଗୌରବ ଦର୍ଜୀ) : ଚାଲିଗଲେ ଯୁବ ସାମ୍ବାଦିକ ନିମାଇଁ ଚରଣ ବଘାର(୪୭) । ଗତ ରାତି ପ୍ରାୟ ୧୦ଟା ସମୟରେ ଘରେ ଥିବା ସମୟରେ ସେ ଛାତିରେ ଯନ୍ତ୍ରଣା ଅନୁଭବ କରିଥିବା ବେଳେ ତାଙ୍କୁ ମୁରିବାହାଲ ସିଏଚ୍ସିକୁ ନିଆଯାଇଥିଲା । ସେଠାରେ ତାଙ୍କ ଦେହାନ୍ତ ହୋଇଥିବା ଜଣାପଡ଼ିଛି । ଯୁବ ସାମ୍ବାଦିକ ସ୍ୱର୍ଗତ ବଘାର ସାମ୍ବାଦିକତା କରି ବେଶ୍ ସୁନାମ ଅର୍ଜନ କରିଥିଲେ । ଦୈନିକ ଖବର କାଗଜ ପ୍ରଗତିବାଦୀର ସେ ମୁରିବାହାଲ ବ୍ଲକ ପ୍ରତିନିଧି ଭାବେ କାର୍ଯ୍ୟରତ ଥିଲେ । ଗରିବ, ଖଟିଖିଆ, ଦଳିତ, ପୀଡ଼ିତଙ୍କ ସ୍ୱର ଉତ୍ତୋଳନର ମାଧ୍ୟମ ସାଜିଥିଲା ତାଙ୍କ ସାମ୍ବାଦିକତା । ମୁରିବାହାଲ ଅଂଚଳର ଅନେକ ସାମାଜିକ ତଥା ସାଂସ୍କୃତିକ ଅନୁଷ୍ଠାନ ସହ ଜଡ଼ିତ ଥିଲେ ସେ । ତାଙ୍କ ଅକାଳ ବିୟୋଗରେ ସାରା ଅଂଚଳରେ ଶୋକର ଛାୟା ଖେଳି ଯାଇଛି ।