ଜୟପାଟଣା, (ଶେଷ ଦେବ ବେହେରା) : ଇନ୍ଦ୍ରାବତୀ ମେଗା ଉଠା ଜଳସେଚନ ହେଡୱର୍କରେ କାର୍ଯ୍ୟରତ କନିଷ୍ଠ ଯନ୍ତ୍ରୀ ଭବାନୀ ଶଙ୍କର ମହନ୍ତ (୨୯) ଗତ ଗୁରୁବାର ଦିନଠାରୁ ନିରୁଦ୍ଧିଷ୍ଟ ଥିବାବେଳେ ଶୁକ୍ରବାର ଦିନ ସକାଳ ୯ଟା ବେଳେ ତାଙ୍କର ମୃତଦେହ ସଂପୃକ୍ତ କେନାଲରୁ ଠାବ କରିଥିବା ସୂଚନା ମିଳିଛି । ଏ ସମ୍ପର୍କରେ ବିଭାଗୀୟ ଅଧିକ୍ଷଣ ଯନ୍ତ୍ରୀ ସୂଚନା ଦେବା ପରେ ଜୟପାଟଣା ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ସୂଚନାରୁ ପ୍ରକାଶ ଯେ, ସ୍ୱର୍ଗତ ମହନ୍ତ ଗତକାଲି ୯ଟା ବେଳେ କାର୍ଯ୍ୟରେ ବାହାରି ଥିଲେ । ଅପରାହ୍ନ ଗୋଟିଏ ବେଳେ ତାଙ୍କ ଫୋନ ସ୍ଵିଚଅଫ୍ ହୋଇଯିବା ଓ ସନ୍ଧ୍ୟା ପର୍ଯ୍ୟନ୍ତ ତାଙ୍କର ଖୋଜ ଖବର ନ ମିଳିବାରୁ ଖୋଜା ଖୋଜି ଆରମ୍ଭ ହୋଇଥିଲା । ଆଜି ଶବ କେନାଲରେ ଭାସୁ ଥିବାର ଦେଖାଯାଇ ଥିଲା । ଘଟଣା ସ୍ଥଳରେ ଧର୍ମଗଡ ଏସ୍ଡିପିଓ, ଜୟପାଟଣା ଭାରପ୍ରାପ୍ତ ଅଧିକାରୀ, ସାଇଣ୍ଟିଫିକ ଟିମ, ଅଗ୍ନିଶମ ବିଭାଗ ସମୂହଙ୍କ ଉପସ୍ଥିତିରେ ଶବ ଉଦ୍ଧାର କରାଯାଇଛି । ଏକ ସନ୍ଦେହ ଜଣକ ସ୍ଥିତିରେ ମୃତ୍ୟୁ ହୋଇ ଥିବାରୁ ପୋଲିସ ତଦନ୍ତ ପରେ କାରଣ ସ୍ପଷ୍ଟ ହେବ ବୋଲି ପ୍ରକାଶ କରିଛି । ଅନ୍ୟ ପଟେ ମୃତକଙ୍କ ମୋଟର ସାଇକେଲ, ପର୍ସ, ଏବଂ ପିଠିରେ ବେଗ ରହିଥିବା ଜଣା ପଡ଼ିଛି । ବ୍ୟବଚ୍ଛେଦ ପରେ ଅନେକ ତଥ୍ୟ ସାମ୍ନାକୁ ଆସିବ ବୋଲି ପୋଲିସ ସୂତ୍ରରୁ ପ୍ରକାଶ ।