ବଲାଙ୍ଗିରରେ ଗଂଜେଇ ହାଟ, ପୁଣି ୯୨୦ କେଜି ଗଂଜେଇ ଧରିଲା ବଲାଙ୍ଗିର ପୋଲିସ : ଟ୍ରକ୍ ଜବତ୍, ଡ୍ରାଇଭର୍ ଗିରଫ୍
ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିରରେ ଗଂଜେଇ ହାଟ । ଏଇ କିଛି ଦିନ ଭିତରେ ତୁହାକୁ ତୁହା ଗଂଜେଇ ଚୋରା ଚାଲାଣକାରୀଙ୍କୁ ପୋଲିସ କାବୁ କରିବା ସହ ଗଦା ଗଦା ଗଂଜେଇ ଜବତ୍ କରୁଛି । ପୁଣି ଆଜି ଭୋର୍ ସାଢେ ୫ଟା ସମୟରେ ଗଂଜେଇ ଚୋରା ଚାଲାଣ ବେଳେ ପୋଲିସ ହାତରେ ଲାଗିଛି ଏକ ଗଂଜେଇ ବୋଝେଇ ଟ୍ରକ୍ । ଏ ସଂପର୍କରେ ଆଜି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବଲାଙ୍ଗିର ଏସ୍ପି ରିଷିକେଶ ଖିଲାରୀ । ସୂଚନା ଅନୁସାରେ କୌଣସି ବିଶ୍ୱସ୍ତ ସୂତ୍ରରୁ ଖବର ପାଇବା ପରେ ବଲାଙ୍ଗିର ଟାଉନ୍ ଥାନା ଅଧିକାରୀ ବିଶ୍ୱଜିତ ମନବୋଧ ନିଜ ସ୍ୱତନ୍ତ୍ର ପୋଲିସ୍ ଟିମ୍ ସହ ବଲାଙ୍ଗିର-ସମ୍ବଲପୁର ରୋଡ଼ ସତ୍ୟନାରାୟଣପଡ଼ା ସ୍ଥିତ ହିରୋ ସୋରୁମ୍ ନିକଟରେ ଗଂଜେଇ ଚୋରା ଚାଲାଣ ହେଉଥିବା ଡବ୍ଲୁବି ୧୪ଡି ୫୯୬୧ ନମ୍ବର ବିଶିଷ୍ଟ ଏକ ଟ୍ରକ୍କୁ କାବୁ କରିଥିଲେ । ଏହି ଟ୍ରକ୍ରୁ ୯୨୦ କେଜି ଗଂଜେଇ ଜବତ୍ ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ୪୬ ଲକ୍ଷ ଟଙ୍କା ହେବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି । ଏହି ମାମଲାରେ ଟ୍ରକ୍ ଡ୍ରାଇଭର୍ ବିହାର ରାଜ୍ୟର ସିୱାନ୍ ଜିଲ୍ଲା ଅନ୍ତର୍ଗତ ଅଲିପୁର ନିବାସୀ ବିରେନ୍ଦ୍ର ସିଂହ(୫୩)କୁ ଗିରଫ୍ କରିଛି ପୋଲିସ । ଏଥିସହ ଡ୍ରାଇଭରଙ୍କ ଠାରୁ ୪୦୦ଟଙ୍କା ମଧ୍ୟ ଜବତ୍ କରାଯାଇଥିବା କୁହାଯାଇଛି । ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ ବୌଦ୍ଧ ଜିଲ୍ଲାର କଂଟାମାଲ ଅଂଚଳରୁ ଏହି ଗଂଜେଇ ଆସୁଥିଲା ଏବଂ ରାୟପୁରକୁ ଚୋରା ଚାଲାଣ ହେଉଥିଲା । ତେବେ ଏହି ମାମଲାରେ ଆହୁରି କିଛି ଲୋକ ସାମିଲ୍ ଥିବା ମଧ୍ୟ ପୋଲିସ ଅଭିଯୁକ୍ତ ଡ୍ରାଇଭର୍ଙ୍କ ଠାରୁ ସୂଚନା ପାଇଥିବା ଜଣାପଡ଼ିଛି । ତେବେ ସେମାନଙ୍କୁ ଗିରଫ୍ କରିବା ପାଇଁ ବଲାଙ୍ଗିର ପୋଲିସ ତନାଘନା ଉଦ୍ୟମ ଜାରି ରଖିଛି । ଆଜି ସଂଧ୍ୟାରେ ଟାଉନ୍ ଥାନାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଏସ୍ପି ଶ୍ରୀ ଖିଲାରୀଙ୍କ ସହ ଏସ୍ଡିପିଓ ତୋଫାନ ବାଗ ଏବଂ ଆଇଆଇସି ଶ୍ରୀ ମନବୋଧ ଉପସ୍ଥିତ ଥିଲେ ।
