ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ପୃଥିବୀ ସୁରକ୍ଷା ପାଇଁ ପ୍ରତିବର୍ଷ ମାର୍ଚ୍ଚ ମାସର ଶେଷ ଶନିବାର ଦିନ ପୃଥିବୀବାସୀ ଏକ ଘଣ୍ଟା ପର୍ଯ୍ୟନ୍ତ ନିଜର ଅନାବଶ୍ୟକ ଲାଇଟିକୁ ସୁଇଚ୍ ଅଫ୍ କରିଥାନ୍ତି । ଏହା ହେଉଛି ଆର୍ଥ ଆୱାର ପାଳନ ଉଦ୍ଦେଶ୍ୟ । ପ୍ରତ୍ୟେକ ବର୍ଷ ଭଳି ଚଳିତ ବର୍ଷ ୨୫ ମାର୍ଚ୍ଚରେ ‘ପୃଥିବୀ ପାଇଁ ଘଣ୍ଟାଏ ଦିବସ’ ପାଳନ କରାଯାଉଛି । ଏହି ଦିନ, ଶକ୍ତି ସଞ୍ଚୟ କରିବା ଏବଂ ଗ୍ରୀନ୍ ହାଉସ୍ ଗ୍ୟାସ୍ ବା ସବୁଜ ଗୃହ ବାଷ୍ପ ନିର୍ଗମନକୁ ହ୍ରାସ କରିବା ପାଇଁ ସମସ୍ତ ଅଣ-ଅତ୍ୟାବଶ୍ୟକ ବା ଅନାବଶ୍ୟକ ବିଜୁଳି ଆଲୁଅ ଏବଂ ଇଲେକ୍ଟ୍ରୋନିକ୍ ଉପକରଣକୁ ଏକ ଘଣ୍ଟା ପାଇଁ ବନ୍ଦ କରିବାକୁ ଜନସାଧାରଣଙ୍କୁ ଉତ୍ସାହିତ କରାଯାଏ ।
‘ପୃଥିବୀ ପାଇଁ ଘଣ୍ଟାଏ’ର ବିଷୟ କେବଳ ଏକ ଘଣ୍ଟା ପାଇଁ ଶକ୍ତି ସଞ୍ଚୟ କରିବା ନୁହେଁ ; ଏହା ମଧ୍ୟ ଏକ ସାଙ୍କେତିକ ବିଶ୍ଵସ୍ତରୀୟ ଘଟଣା ଯାହା ଦର୍ଶାଏ ଯେ ଜଳବାୟୁ ପରିବର୍ତ୍ତନକୁ ନିୟନ୍ତ୍ରଣରେ ରଖିବାରେ ଆମେ ସମସ୍ତେ ଏକ ସୁଚିନ୍ତିତ ପ୍ରୟାସ ଜାରି ରଖିବା । ଯଦି ଆମେ ସମସ୍ତେ ଏକାଠି କାମ କରିବା, ଛୋଟ ଛୋଟ ପରିବର୍ତ୍ତନ ମଧ୍ୟ ଏକ ବଡ଼ ପରିବର୍ତ୍ତନ ଆଣିପାରେ । ‘ପୃଥିବୀ ପାଇଁ ଘଣ୍ଟାଏ’ ୨୦୨୩ ସ୍ଥାନୀୟ ସମୟ ରାତି ୮.୩୦ରେ ଆରମ୍ଭ ହୋଇ ୯.୩୦ରେ ଶେଷ ହୋଇଥିଲା । ୨୦୨୩ ରେ, ‘ପୃଥିବୀ ପାଇଁ ଘଣ୍ଟାଏ’ ର ବିଷୟବସ୍ତୁ ହେଉଛି ‘ଆମ ଗ୍ରହରେ ବିନିଯୋଗ’ । ଏଥିରେ ‘ଲାଇଟ୍ ଅଫ୍’ ଘଣ୍ଟାଏ ରହିବ, କିନ୍ତୁ ପୂର୍ବ ବର୍ଷ ତୁଳନାରେ, ବିଶ୍ଵର ଲୋକମାନେ ସେହି ଘଣ୍ଟାଏ ମଧ୍ୟରେ ଆମ ଗ୍ରହ ପୃଥିବୀର ସ୍ଥିତିରେ ସୁଧାର ଆଣିବା ପାଇଁ କିଛି ଉପକାରୀ ବା ଲାଭଦାୟକ କାର୍ଯ୍ୟ କରିବାକୁ ଉତ୍ସାହିତ ହେବେ ।