କୋଟଗଡ : କନ୍ଧମାଳ ଜିଲ୍ଲାପାଳ ଆଶିଷ ଈଶ୍ୱର ପାଟିଲ ଗୁରୁବାର କୋଟଗଡ଼ ଗସ୍ତ କରି ବ୍ଲକରେ ପହଞ୍ଚି ବିଭିନ୍ନ ଉନ୍ନୟନମୂଳକ କାର୍ୟ୍ୟର ସମୀକ୍ଷା କରିଥିଲେ । କୋଟଗଡ଼ ବ୍ଲକର ସମସ୍ତ ବିଭାଗ କାର୍ଯ୍ୟକ୍ରମ ସମୀକ୍ଷା ସହ ବିଭିନ୍ନ ନଥିପତ୍ର ଯାଞ୍ଚ କରିବା ଦେଖିବାକୁ ମିଳିଛି । ଯାଞ୍ଚ ପରେ ସେ କୋଟଗଡ଼ ଓଡ଼ିଶା ଆଦର୍ଶ ବିଦ୍ୟାଳୟକୁ ଯାଇ ମଧ୍ୟାହ୍ନ ଭୋଜନର ମାନ ଦେଖିଥିଲେ ଓ ଛାତ୍ର ଛାତ୍ରୀଙ୍କ ପାଠପଢା ଉପରେ ପଚାରି ବୁଝିଥିଲେ । ପରେ ହଷ୍ଟେଲ କୋଠା ନିରୀକ୍ଷଣ କରିଥିଲେ । ସରକାରୀ ସେବାଶ୍ରମ ନୂଆଗାଁ ଯାଇ ସେଠାରେ ବି ମଧ୍ୟାହ୍ନ ଭୋଜନର ମାନ ନିରୀକ୍ଷଣ କରିଥିଲେ । ସେଠାକାର ଛାତ୍ରୀମାନଙ୍କୁ ସଫାସୁତରା ରହିବା, ପରିବେଶ ସଫା ରଖିବା ଓ ସ୍ୱାସ୍ଥ୍ୟ ଉପରେ ଧ୍ୟାନ ଦେବାକୁ ପରାମର୍ଶ ଦେଇଥିଲେ । କୋଟଗଡ଼କୁ ଜିଲାପାଳଙ୍କ ଏହା ଦ୍ୱିତୀୟ ଗସ୍ତ । ଏହି ଖବର ପାଇ ଦୂରଦୂରାନ୍ତରୁ ସମସ୍ୟା ନେଇ ଆସିଥିବା ଅଞ୍ଚଳବାସୀ ଜିଲାପାଳଙ୍କୁ ଭେଟି ନ ପାରି ନିରାଶରେ ଫେରିଯିବା ଦେଖିବାକୁ ମିଳିଛି ।