ଚଳଚ୍ଚିତ୍ର ଜଗତ ୪୯ତମ ବାର୍ଷିକ ଉତ୍ସବରେ ସମ୍ମାନିତ ହେଲେ ଅଭିନେତା ତଥା ପ୍ରତିଷ୍ଠିତ ବ୍ୟବସାୟୀ କିଶୋର କୁମାର ରଥ
ବଲାଙ୍ଗିର, (କେପିଏନ୍ଏସ୍) : ଭୁବନେଶ୍ୱର ରବିନ୍ଦ୍ର ମଣ୍ଡପରେ ଆୟୋଜିତ ଚଳଚ୍ଚିତ୍ର ଜଗତ ୪୯ତମ ବାର୍ଷିକ ଉତ୍ସବରେ ସମ୍ମାନିତ ହୋଇଛନ୍ତି ବଲାଙ୍ଗିର ମାଟିର ଅଭିନେତା ତଥା ପ୍ରତିଷ୍ଠିତ ବ୍ୟବସାୟୀ କିଶୋର କୁମାର ରଥ । ଗତ ୨୩ ତାରିଖ ଦିନ ଆୟୋଜିତ ଏହି ଉତ୍ସବରେ ଅତିଥିମାନଙ୍କ ଠାରୁ ପ୍ରତିଭା ସମ୍ମାନ ଗ୍ରହଣ କରିଛନ୍ତି ଶ୍ରୀ ରଥ । ସୂଚନାଯୋଗ୍ୟ ଯେ, ଶ୍ରୀ ରଥ ବଲାଙ୍ଗିର ମାଟିର ଜଣେ ପ୍ରତିଷ୍ଠିତ ବ୍ୟବସାୟୀ ତଥା ଜଣେ ସଫଳ ଅଭିନେତା । ଶ୍ରୀ ରଥଙ୍କ ଦ୍ଵାରା ପ୍ରତିଷ୍ଠିତ ‘ସାମୁକା ଷ୍ଟିଲ ସେଣ୍ଟର’ ବହୁ କାରିଗରଙ୍କ ରୋଜଗାରର ପନ୍ଥା ସାଜିଛି ଓ ଅନ୍ୟମାନଙ୍କୁ ମଧ୍ୟ ସ୍ୱଚ୍ଛଳ କରିବାରେ ସଫଳ ହୋଇଛି । ଏଯାବତ୍ ଶ୍ରୀ ରଥ ୧୦୪ଟି ଦେଶ ଭ୍ରମଣ କରି ୩୨ଟି ଦେଶର ବିଭିନ୍ନ ପ୍ରତିଷ୍ଠାନ ପକ୍ଷରୁ ସମ୍ମାନିତ ହୋଇଛନ୍ତି । ପୁଣି ଅଭିନୟ କ୍ଷେତ୍ରରେ ଶ୍ରୀ ରଥ ସଫଳତା ହାସଲ କରିବାର ସୌଭାଗ୍ୟ ଅର୍ଜନ କରିଛନ୍ତି । ଏପର୍ଯ୍ୟନ୍ତ ୭୫ଟି ମଞ୍ଚ ନାଟକ, ୧୭ଟି ଟିଭି ସିରିଏଲ୍, ୭ଟି ଓଡ଼ିଆ ଚଳଚ୍ଚିତ୍ର ଓ ୨ଟି ହିନ୍ଦୀ ଚଳଚ୍ଚିତ୍ରରେ ସେ ଅଭିନୟ କରି ଦର୍ଶକଙ୍କ ପ୍ରିୟ ପାତ୍ର ହୋଇପାରିଛନ୍ତି । ତାଙ୍କ ଅପୂର୍ବ ପ୍ରତିଭା ଯୋଗୁଁ ଶ୍ରୀ ରଥଙ୍କୁ ଚଳଚ୍ଚିତ୍ର ଜଗତ ୪୯ତମ ବାର୍ଷିକ ଉତ୍ସବରେ ସମ୍ମାନିତ କରାଯାଇଥିବା କୁହାଯାଇଛି ।