ରାଉରକେଲା, (ସସ୍ମିତା ପ୍ରଧାନ) : ଆଜି ଅପରାହ୍ନରେ ରାଉରକେଲାର କୋଏଲ ନଦୀରେ ଜଣେ ଯୁବକ ତାଙ୍କ ବନ୍ଧୁମାନଙ୍କ ସହିତ ଗାଧୋଇବା ସମୟରେ ବୁଡ଼ି ଯାଇଥିବା ସୂଚନା ମିଳିଛି । ମୃତକଙ୍କ ନାମ ମହମ୍ମଦ ଆସିଫ୍ ଅହମ୍ମଦ ଏବଂ ସେ ସେକ୍ଟର-୧୯ ସ୍ଥିତ ଆଜାଦ ବସ୍ତିର ରହୁଥିବା ବୋଲି ଚିହ୍ନଟ କରାଯାଇଛି । ଅପରାହ୍ନରେ କୋଏଲ ନଦୀରୁ ଯୁବକଙ୍କ ମୃତଦେହ ଉଦ୍ଧାର କରାଯାଇଛି । ସୂଚନା ଅନୁସାରେ, ଯୁବକ ଜଣକ ଦୁଇରୁ ତିନିଜଣ ବନ୍ଧୁଙ୍କ ସହିତ ଗାଧୋଇବା ପାଇଁ ନଦୀକୁ ଯାଇଥିଲେ । ଲଗାତାର ବର୍ଷା ଯୋଗୁଁ ନଦୀରେ ପ୍ରବଳ ସ୍ରୋତ ପ୍ରବାହିତ ହେଉଥିଲା । ଗାଧୋଇବା ସମୟରେ ସେ ପ୍ରଚଣ୍ଡ ସ୍ରୋତରେ ଭାସି ଯାଇଥିଲେ । ତାଙ୍କ ବନ୍ଧୁମାନେ ପାଟି କରିବାରୁ, ପାଟି ଶୁଣି ସ୍ଥାନୀୟ ଲୋକମାନଙ୍କ ସମେତ ଅଗ୍ନିଶମ ସେବା ଦଳ ଘଟଣାସ୍ଥଳକୁ ଯାଇ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । କିନ୍ତୁ ତାଙ୍କୁ ପାଇପାରି ନଥିଲେ । ସୋମବାର ଯୁବକଙ୍କୁ ନଦୀରୁ ବାହାର କରାଯାଇଥିଲା ଏବଂ ତୁରନ୍ତ ରାଉରକେଲା ସରକାରୀ ଡାକ୍ତରଖାନାକୁ ନିଆଯାଇଥିଲା । ଡାକ୍ତରଖାନାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ । ଏହି ଘଟଣା ସ୍ଥାନୀୟ ଅଞ୍ଚଳରେ ଦୁଃଖର ଛାଇ ଖେଳାଇ ଦେଇଛି ।
