ଟିଟିଲାଗଡ, (ସଞ୍ଜୟ କୁମାର ନାୟକ) : ଟିଟିଲାଗଡ଼ ପୋଲିସ ଜଣେ ମହିଳାଙ୍କର ଗୋପନୀୟତା ଉଲ୍ଲଂଘନ କରି ତାଙ୍କର ଅଶ୍ଳୀଳ ଭିଡିଓ ଗୁପ୍ତରେ ରେକର୍ଡ କରିଥିବା ଅଭିଯୋଗରେ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି । ଦେବନ୍ଧପଡ଼ା ଅଞ୍ଚଳର ଜଣେ ମହିଳାଙ୍କ ଅଭିଯୋଗ ଆଧାରରେ ଟିଟିଲାଗଡ଼ ଥାନାରେ କେସ୍ ନମ୍ବର ୨୧୬, ତାରିଖ ୧୭.୦୬.୨୦୨୬ରେ ବିଏନଏସ୍ର ଧାରା ୭୭, ୭୮, ୩(୫) ଏବଂ ସୂଚନା ପ୍ରଯୁକ୍ତି ଆଇନର ଧାରା ୬୬(ଇ) ଓ ୬୭(ଏ) ଅନୁଯାୟୀ ମାମଲା ରୁଜୁ କରାଯାଇଥିଲା । ତଦନ୍ତରେ ଜଣାପଡ଼ିଥିଲା ଯେ, ପୀଡ଼ିତା ନିଜ ଘରର ସ୍ନାନଗୃହରେ ସ୍ନାନ କରୁଥିବା ସମୟରେ ଅଭିଯୁକ୍ତମାନେ ବାଥରୁମ ସହ ସଂଯୁକ୍ତ ସ୍କାଇଲାଇଟ୍ର ସୁଯୋଗ ନେଇ ଗୁପ୍ତରେ ତାଙ୍କର ଭିଡିଓ ରେକର୍ଡିଂ କରିଥିଲେ । ଘଟଣା ସମ୍ପର୍କରେ ସ୍ଥାନୀୟ ଲୋକମାନେ ଅବଗତ ହେବା ପରେ ଉଭୟଙ୍କୁ କାବୁ କରି ୧୧୨ ଜରୁରୀକାଳୀନ ସେବା ମାଧ୍ୟମରେ ପୋଲିସକୁ ସୂଚନା ଦେଇଥିଲେ । ପୋଲିସ ଘଟଣାରେ ବ୍ୟବହୃତ ମୋବାଇଲ ଫୋନ ଜବତ କରି ଯାଞ୍ଚ କରିବା ବେଳେ ପୀଡ଼ିତାଙ୍କ ସମ୍ପର୍କିତ ଆପତ୍ତିଜନକ ଭିଡିଓ ଉଦ୍ଧାର କରିଥିଲା । ପରେ ପୀଡ଼ିତାଙ୍କ ବୟାନ ବିଏନଏସ୍ଏସ୍ ଧାରା ୧୮୩ ଅନୁଯାୟୀ ମାନ୍ୟବର ଅଦାଲତରେ ରେକର୍ଡ କରାଯାଇଥିଲା । ଗିରଫ ହୋଇଥିବା ଅଭିଯୁକ୍ତମାନେ ହେଲେ ଦେବାନନ୍ଦ ଗହୀର (୨୬) ଓ ରାଜ ମହାନନ୍ଦ (୨୫), ଉଭୟେ ଟିଟିଲାଗଡ଼ ଦେବନ୍ଧପଡ଼ା ଅଞ୍ଚଳର ବାସିନ୍ଦା । ତଦନ୍ତରୁ ଏହି ଅପରାଧରେ ସେମାନଙ୍କ ପ୍ରାଥମିକ ସମ୍ପୃକ୍ତତା ସ୍ଥାପିତ ହୋଇଥିବା ପୋଲିସ ସୂଚନା ଦେଇଛି । ଉଭୟଙ୍କୁ ଗିରଫ କରି ମାନ୍ୟବର ଅଦାଲତକୁ ପଠାଯାଇଛି । ଟିଟିଲାଗଡ଼ ପୋଲିସ ମହିଳାମାନଙ୍କ ସୁରକ୍ଷା, ସମ୍ମାନ ଓ ଗୋପନୀୟତା ରକ୍ଷା ପ୍ରତି ନିଜର ଦୃଢ଼ ପ୍ରତିବଦ୍ଧତା ପୁନର୍ବ୍ୟକ୍ତ କରିଛି । ଏଭଳି କୌଣସି ଘଟଣା ଘଟିଲେ ତୁରନ୍ତ ପୋଲିସକୁ ଅବଗତ କରିବା ପାଇଁ ନାଗରିକମାନଙ୍କୁ ଟିଟିଲାଗଡ଼ ଥାନାଧିକାରୀ ମନୋଜ କୁମାର ମୁଣ୍ଡା ଅନୁରୋଧ କରିଛନ୍ତି ।