ବାଲିଗୁଡ଼ା, (ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ଦଣ୍ଡପଦର ନିକଟସ୍ଥ ଖଡଗ ନଦୀ ନିକଟରୁ ବେଆଇନ୍ ଭାବେ ମୋରମ୍ ଖନନ ସହ ଚାଲାଣ ହେଉଥିବାବେଳେ ମାଡ଼ି ବସିଲା ପୋଲିସ୍ । ଘଟଣାସ୍ଥଳରୁ ମୋରମ୍ ଖନନ କାର୍ଯ୍ୟରେ ନିୟୋଜିତ ୨ଟି ଜେସିବି ସହ ଚାଲାଣରେ ବ୍ୟବହୃତ ୫ଟି ଟ୍ରାକ୍ଟର ଜବତ କରିଛି ବାଲିଗୁଡ଼ା ପୋଲିସ୍ । ଘଟଣାରେ ସମ୍ପୃକ୍ତ ୨ଜଣ ଜେସିବି ଅପରେଟର ଓ ୫ଜଣ ଟ୍ରାକ୍ଟର ଡ୍ରାଇଭରକୁ ଅଟକରଖି ପଚରାଉଚରା କରୁଛି ପୋଲିସ୍ । ସୂଚନା ପ୍ରକାରେ ଦୀର୍ଘ ଦିନ ହେବ ଅଞ୍ଚଳର ବିଭିନ୍ନ ସ୍ଥାନରୁ ମୋରମ୍, ମାଟି, ପଥର,ବାଲି ଭଳି ବିଭିନ୍ନ ପଦାର୍ଥ ବିନା ଅନୁମତିରେ ଖନନ ଓ ଚୋରା ଚାଲାଣ ହେଉଥିବା ଏବଂ ରାଜସ୍ୱ ବିଭାଗର ବିନା ଅନୁମତି ଓ ବିନା ରୟାଲଟିରେ ଚାଲାଣ ହେଉଥିବା ଅଭିଯୋଗ ପରେ କୌଣସି ଏକ ବିଶ୍ୱସ୍ତ ସୂତ୍ରରୁ ଖବରପାଇ ଘଟଣାକୁ ଗୁରୁତର ସହ ନେଇ ରବିବାର ବାଲିଗୁଡ଼ା ପୋଲିସ୍ ପକ୍ଷରୁ ଚଢ଼ାଉ କରାଯାଇ ଅଧିକ ତଦନ୍ତ ଅବ୍ୟାହତ ରହିଥିବା ବିଷୟ ଥାନା ଅଧିକାରୀ ଶିବଶଙ୍କର ସିଙ୍ଗ ପ୍ରକାଶ କରିଛନ୍ତି ।
