ପ୍ରଧାନମନ୍ତ୍ରୀ ମୋଦୀ ନେତାଜୀଙ୍କ ହୋଲୋଗ୍ରାମ ପ୍ରତିମୂର୍ତ୍ତିକୁ ଉନ୍ମୋଚନ କଲେ : କହିଲେ – ଆଜି ଭାରତ ସ୍ୱାଧୀନତା ପରେ ହୋଇଥିବା ଭୁଲ୍ଗୁଡ଼ିକୁ ସଂଶୋଧନ କରୁଛି
ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଦିନ ଇଣ୍ଡିଆ ଗେଟ୍ରେ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ହୋଲୋଗ୍ରାମ ପ୍ରତିମୂର୍ତ୍ତିକୁ ଉନ୍ମୋଚନ କରିଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ, ଭାରତ ମାତାର ସାହସୀ ପୁତ୍ର ନେତାଜୀ ସୁଭାଷ ଚନ୍ଦ୍ର ବୋଷଙ୍କ ୧୨୫ତମ ଜନ୍ମ ବାର୍ଷିକୀରେ ମୁଁ ସମଗ୍ର ଦେଶ ତରଫରୁ ନେତାଜୀଙ୍କୁ ପ୍ରଣାମ କରୁଛି । ଏହି ଦିନଟି ଐତିହାସିକ, ଏହି ଅବଧି ମଧ୍ୟ ଐତିହାସିକ ଏବଂ ଏହି ସ୍ଥାନ ଯେଉଁଠାରେ ଆମେ ସମସ୍ତେ ଏକତ୍ରିତ ହୋଇଛୁ, ଏହା ମଧ୍ୟ ଐତିହାସିକ । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଭାରତର ମାଟିରେ ପ୍ରଥମ ସ୍ୱାଧୀନ ସରକାର ପ୍ରତିଷ୍ଠା କରିଥିବା ଆମର ନେତାଜୀଙ୍କ ମହାନ ପ୍ରତିମୂର୍ତ୍ତିକୁ ଆଜି ଇଣ୍ଡିଆ ଗେଟ୍ ନିକଟରେ ଡିଜିଟାଲ୍ ଫର୍ମରେ ସ୍ଥାପନ କରାଯାଉଛି । ଖୁବ୍ ଶୀଘ୍ର ଏହି ହୋଲୋଗ୍ରାମ୍ ପ୍ରତିମୂର୍ତ୍ତିକୁ ଏକ ବିରାଟ ଗ୍ରାନାଇଟ୍ ପ୍ରତିମୂର୍ତ୍ତିରେ ପରିଣତ କରାଯିବ ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଗୁଜୁରାଟରେ ୨୦୦୧ ଭୂକମ୍ପ ପରେ ଯାହା ଘଟିଥିଲା, ତାହା ବିପର୍ୟ୍ୟୟ ପରିଚାଳନାର ଅର୍ଥ ବଦଳାଇ ଦେଇଛି । ଆମେ ସମସ୍ତ ବିଭାଗ ଏବଂ ମନ୍ତ୍ରଣାଳୟକୁ ରିଲିଫ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ କଲୁ। ଗୁଜୁରାଟ ବିପର୍ଯ୍ୟୟର ମୁକାବିଲା ପାଇଁ ଏଭଳି ଆଇନ ପ୍ରଣୟନ କରିବାରେ ଗୁଜୁରାଟ ଦେଶର ପ୍ରଥମ ରାଜ୍ୟ ହୋଇପାରିଛି । ପରେ, କେନ୍ଦ୍ର ସରକାର ଗୁଜୁରାଟର ନିୟମରୁ ଶିକ୍ଷା ଗ୍ରହଣ କରି ସମଗ୍ର ଦେଶ ପାଇଁ ୨୦୦୫ରେ ସମାନ ବିପର୍ୟ୍ୟୟ ପରିଚାଳନା ଆଇନ ପ୍ରଣୟନ କରିଥିଲେ । ଆଜାଦି କେ ଅମୃତ ମହୋତ୍ସବର ସଂକଳ୍ପ ରହିଛି ଯେ, ଭାରତ ନିଜର ପରିଚୟ ଏବଂ ପ୍ରେରଣାକୁ ପୁନର୍ଜୀବିତ କରିବ । ଏହା ଦୁର୍ଭାଗ୍ୟଜନକ ଯେ ସ୍ୱାଧୀନତା ପରେ ଦେଶର ସଂସ୍କୃତି ଏବଂ ରୀତିନୀତି ସହିତ ବହୁ ମହାନ ବ୍ୟକ୍ତିତ୍ୱର ଅବଦାନକୁ ଲିଭାଇବା ପାଇଁ କାର୍ଯ୍ୟ କରାଯାଇଥିଲା ।