ଲୋଇସିଂହା, (କେପିଏନ୍ଏସ୍) : ମନୁଷ୍ୟ ଭିତରୁ ଧୀରେ ଧୀରେ ହଜିଯାଉଛି ମଣିଷ ପଣିଆ । କିଛି ଯୌନ ପିପାସୁଙ୍କ କବଳରୁ ମାନସିକ ଅନଗ୍ରସର ମହିଳା ମଧ୍ୟ ବାଦ ପଡୁନାହାନ୍ତି । ଏଭଳି ଏକ ଲ୍ଜାଜନକ ଘଟଣା ଦେଖିବାକୁ ମିଳିଛି ଲୋଇସିଂହା ଥାନା ଅଂଚଳରେ । ଦୁଷ୍କର୍ମ ପିଡିତା ମହିଳାଙ୍କ ସମ୍ପର୍କୀୟ ଏ ନେଇ ଥାନାରେ ଅଭିଯୋଗ କରିବା ପରେ ପୋଲିସ ଜଣକୁ ଗିରଫ କରିଥିବା ବେଳେ ଆଉ ଜଣକୁ ଥାନାରେ ଅଟକ ରଖିଥିବା ଜଣାଯାଇଛି । ଅପରପକ୍ଷରେ ଗୁରୁତର ଅବସ୍ଥାରେ ପିଡିତା ମହିଳା ଜଣକ ସ୍ଥାନୀୟ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାଯାଇଛି । ଅଭିଯୋଗ ମତେ, ଲୋଇସିଂହା ଥାନା ସୁଜିଆ ଗ୍ରାମରେ ଏକାକୀ ରହନ୍ତି ୫୫ ବର୍ଷୀୟା ମହିଳା । ତାଙ୍କ ମାନସିକ ସ୍ଥିତି ଠିକ ନ ଥିବା ବେଳେ ବଲାଙ୍ଗିରରେ ରହନ୍ତି ସମ୍ପର୍କୀୟ । ମହିଳା ଜଣକ ଗୁରୁତର ଅବସ୍ଥାରେ ସୁଜିଆ ଗ୍ରାମ ଚର୍ଚ୍ଚର ପଛ ପଟେ ପଡିଥିବା ଖବର ପାଇ ଲୋଇସିଂହା ମାହେଶ୍ୱରୀ ସଂଗଠନର ଦେବାଶିଷ ବିଷୋୟୀ ଓ ପ୍ରତିଜ୍ଞା ସେବା ସଂଗଠନର କିଛି ସଦସ୍ୟ ତାଙ୍କୁ ଲୋଇସିଂହା ଡାକ୍ତରଖାନାରେ ଭର୍ତ୍ତି କରିଥିଲେ । ସେମାନଙ୍କ ଠାରୁ ପିଡିତା ମହିଳାଙ୍କ ସମ୍ପର୍କୀୟ ଖବର ପାଇ ଲୋଇସିଂହା ଡାକ୍ତରଖାନାରେ ପହଂଚିବା ସହିତ ଥାନାରେ ଅଭିଯୋଗ କରିଥିଲେ । ଏହି ଘଟଣାରେ ପୋଲିସ ସୁଜିଆ ଗ୍ରାମର ସୁବାସ ଭୋଇ(୩୦)ଙ୍କୁ ଗିରଫ କରି ଡାକ୍ତରୀ ମାଇନା ପାଇଁ ପଠାଇବା ସହିତ ଆଉ ଜଣକୁ ଥାନାରେ ଅଟକ ରଖି ପଚରା ଉଚୁରା ଚଳାଇଛି । ପୋଲିସ ଏକ ମାମଲା ରୁଜୁ କରି ଏହି ଘଟଣାରେ ଅଧିକ ବ୍ୟକ୍ତିଙ୍କ ସମ୍ପୃକ୍ତି ଥିବା ଯୋଗୁଁ ତଦନ୍ତ ଜାରି ରଖିଥିବା ଆଇଆଇସି ରମାକାନ୍ତ ଜେନା ସୂଚନା ଦେଇଛନ୍ତି ।